16
Godeïe mihalälo falo gifalädalïagi usi dilo amo söga sali
1 Na nabaha nebegi, Godeïe mosöa amila afädëa selesaia fii gifalädalïa amolima ado gelolafalï uuala sähalea, Dilia Godeïe mihalälo falo gifalädalïagi usi dibe amoli, nagadaia söga salimolö mosalola säsio.
2 Amalebe, selesaia fii age amea awälahilä, ïe falogi usi gaula nelo amo nagadaia söga salasio. Amala söga salasebegi, udia dolö sugua ilaba gadoi amoïe magi negela, ïe ausulubo gadoi ilibiala gauia adaha nefolalo amolima, äyo ayägöloi sëlo edefade ilile domalogi aligisa maadesio.
3 Selesaia fii agedu amea ïe falogi usi gaula nelo amo ödä duhuludaia söga salasio. Amala söga salasebegi, ödä duhulu amo dolö baagoi gu heale gadoi hamola besela galasebegi, ödä duhulugi sefolalo amoli sulubadela baagosa maadesio.
4 Hä, selesaia fii osoda amea ïe falogi usi gaula nelo amo ödä afufui difolalebe amolidaiage, ödä gü besela galasebea amige söga salasio. Amala söga salasebegi, ödä amoli heale uui besela galasio.
5 Amala hamose amo gaalu, na aso, nabelebe, ödä amoli beaha aligilo selesaia fii amea sähalea, Eleloi-e, walio neebewege, dafidi nelo amoge, dia amala mogei ameada, dida asigi mogoi nea.
6 Mida, ilia dïe udia dolö nefolalo amolilege, dïe bea sälo nefolalo amolilege, nufi heale digasebegi, dia heale hili muäia neala ï amoda, ilia nafade hamoi amo gadola bidi mogola ïmelëla säse nabi.
7 Odala ïlo auli amea säla obëgësalea, Dafidilo Geloi Gode, Sulubadelaïe Geloifalï Geloi-e, dofä. Dia udia dolö mogesaleada, dofä dibe amo gadolage, mogoi dibe amo gadolage, mogola gudilo nebegola säse nabi.
8 Selesaia fii biyidu amea ïe falogi usi gaula nelo amo esodaia söga salasio. Amala söga salasebegi, nulo söa gadoia udia dolö giamäiaïe esoma geloi ïasio.
9 Eso hëgï geloi hïdo elöi amea udia dolö amoli giasebegi, neala nafadelasilo geloi amoïe beaha aligilo Gode neebe amoïe ëima ilia dolälela ado nafadela säsio. Amala hamose amogida, ilia Godeïe ëi gauia adogomolöïela helësëla, asigi made besusio.
10 Selesaia fii bi amea ïe falogi usi gaula nelo amo sugua ilaba gadoi amoïe beaha aligilo filodaia ami söga salasio. Amala söga sali amea, ïe beaha aligilo dibea ami gasimidulä negesisebegi, udia dolöea së edefade nahalea, besea hilile elï damula naha dibeo.
11 Ili së nase amogige, äyo aligise amogige, Gode Hebeni neebe amoma dolälela ado nafadela säha dialeada, ilia nafade hamosa nelo amo fisila asigi made besusio.
12 Selesaia fii gafe amea ïe falogi usi gaula nelo amo ödä edefade Yubeledisi amodaia söga salasio. Amala söga salasebegi, eso maasido gini nefolalo amoli mofiamäia, idi doga negesalea, ödä amo usisa maadesio.
13 Amase, na beahaleamelebe, mugabe nafade ohodoa sai gadoi sebe melï. Sai gadoi amolida, game gadoi amoïe nafi idigilage, sugua ilaba gadoi amoïe nafi idigilage, amase, wäfalï bea sälo neebe amoïe nafi idigilage, doadigila maase melï.
14 Ilida mugabe nafade, hamomolöi made gadoi nofe elöi hamolo. Gädili sulubadelagi afufulahilä, Gode, Sulubadelaïe Geloifalï Geloi neebe amoïe segeyo edefadegi nudumäiaïe, ilile gini amoli gegedolasilo.
15 Wae! Neda fa nelo mulo amo gadoi moholömelë. Afädë süwia made diala, ïe fagulo nelebo hï e sebe gaalu ami negesiä sebe ameada, obeägïsa neamelë. Mida, e udia dolöïe siigi, dudugïmu hewai made moholö amea.
16 Hä, gesami nafade amolia sege ëi Hibulu adoeada, Amagedono ami gini amoli maala gegedolasisio.
17 Selesaia fii gifalädalü amea ïe falogi usi gaula nelo amo mudaia söga salasio. Amala söga salasebegi, Godeïe mosöa beaha aligilo filodaia amila, ado afädë gelola uuala sähalea, Hä amo! Wagai gomelëla säsio.
18 Amala säi amole, sege yabagelelage, goba hïdo elöige, hahalä edefade dagabolage, amase, fogoli edefade afädëge maasio. Fogoli misi amoda, siiba amo gadoi maase melï made. Amoda, dolö mi gäwila nagadaia neloa amila misi amoli gidogolahilä, dofä edefade gelola maasio.
19 Gaamu ilibia edefade amoda, ohodoala gagabogila dusulahilä, udia dolö odoaïe gaamu difolalo amolige, mugulula digaha maadesio. Amase, Godea Babilono gaamu edefadeïe mala amo helësëlahilä, wani ödä gaabogi usi dilo amo muäia ïasio. Wani ödä amoda, ïe mihalälo edefade usi dilo amo mualasio.
20 Ödä södölo difolalo amoli sulubadela fisäla awäha maadesalea, segebi nefolalo amoligi afädë neëge, bimolöi mademelë.
21 Sege gägä boboga mudaiala digala, udia dolödaia daala negesio. Amo digase amo hïdo hïdolaïe yöi giloda, nabülasi bia gadoi gabio. Neala nafadelasilo geloi dofä nafade ameada, sege gägä boboga digai amogida, udia dolö ilia, oböla, Godema dolälela ado nafadela säha nefolalebeo.