17
Idigi nawela susugu hamolo udia amea bidi nafade nii
1 Selesaia fii gifalädalïaea falo gifalädalïa gaula nefolalo amoligi, afädë maalahilä nema sähalea, Idigi nawela susugu hamolo udia ëi sälo, ödä yafie nedase amolile agesugi ami sebe amoda, hï nafade hamoi amoïe bidi nimolö amo oledelä, di misië.
2 Nagadaia gini nefolalebe amolia udia amobalä susugu hamosa aligisio. Amase, wani ödä naala gagaolo amo gadola, udia dolö nagadaia nefolalebe amoliage, ebalä susugu hamolo amea, gagaosa difolalebeola säsio.
3 Gesami e nema salugasisebegi, selesaia fii amea sege udia dolö aligisia made ami, ne sigi awäsio. Ami awäla besela galahamelebe, sugua ilaba bëi edefade afädëïe baagidaia, udia afädë sebe melï. Sugua amoïe domalo sulubadelagi, Gode gagadela sälo ëi amoli dëdësa maadei nea, ïe busa gifalädalïa osogoloi amogi, beseda nabülasi gabio.
4 Udia amea fagulo hogale uiige bëige salugalahilä, goloea hamoi si dëdëgï yafie ameage, igi elöi muni edefadea nelo ameage, bageïe isogi momadoi hedabi amo gadoi helebe näia ameage, e momadola sebeo. Mala nafadefalï nafade elö elöla hamosa nelo amoge, e susugu hamosalea, nigime baai elö elöla hamosa nelo amoge, ödä i goloea hamoi amogi nobai amo gaula sebeo.
5 Udia amoïe odagia ëi afädë galone musügä negela gomalä dëdëla negei dibeo.
Babilono ilibia edefade,
idigi nawela susugu hamolo udia amolilege,
mala nafadefalï nafade nagadaia hamolo amolilege Ememelëla
säla dëdëla negei dibeo.
6 Udia amoda, Godeïe udia dolö, Yesuïe ëi säla ulufaha nefolalo nufi amolile heale amo, hï naala gagaosa sebeo. Na amo beahalea, edefademalä fudugila säosäosa nelomelë.
7 Amala hamosebegi, selesaia fii amea nema sähalea, Di edogi fudugila säosäosebe. Udia amoïege, sugua ilaba gadoi, busa gifalädalïa osogoloige bese nabülasige, e amodaia fila aulo amoïege, galone musügä negei dibe amoda, na dima awala säla ïmolömelë.
8 Sugua ilaba dia melï amoda, dafidi nelo, walioda maademelë, amase, sege uli nafade mia made dibea amila e fedasegi, nufudadigimolöïe sigi moholömelë. Naga föi hamola made nea, nagadaia udia dolö ilile ëi namolöi namolö bebagi made dëdëla negei nefolalebe amoliada, sugua ilaba amo beala, fudugila bimolömelë. Mida, sugua ilaba amoda, dafidi nelo, walio maade amoda, oböla, bu obëgëla moholömelë.
9 Dolö asigi falagasei neebe ameada, nelebo amo gowe gadoi gabula helësëmalo. Sugua busa gifalädalïa amolida, segebi gifalädalïa amo gadoi gabio. Udia amoda, amolidaia sebeo.
10 Busa gifalädalïa amolida, gini gifalädalïa gadoige gabio. Gini gifalädalïa amoligi, biada, baagoi. Gafe afädëa walio sigi nea, gifalädalü afädëda, aso, made misi. Hobea, e maaseda, segeyo ede madegi sigi namolö dialeamelë.
11 Sugua ilaba gadoi dafidi nelolahilä, walio wegi maade amo, hï eda, gini gödö nea. Gini gifalädalïa amoli gadoi neëgi, e nufudadigimolöïe sigi moholömelë.
12 Dia bese nabülasi neebe melï amolida, gini nabülasia sigi namolö geloi amo, aso, made neala neebe amolimelë. Iliada, sugua ilaba gadoi amobalä segeyo ede made holöbögi sigi namiäia geloi nimolömelë.
13 Gini nabülasi amolia ado afädë negela, ilile geloige, beaha aligilo geloige, sugua ilaba gadoi amoma ïmolömelë.
14 Ilia Sugua Sibi Malö amobalä nudumolö gaso, eda dafidilo nefolalebe amolile Dafidilo Geloige, gini nefolalebe amolile Ginige neebe amea, ilibalä nudula salolela baagila moholömelë. Amase, udia dolö hï memelela wela ifosisi, e bëgëla aulo asigi falagasei nefolalo amoli, ebalä gedola namolömelëla säla ïasio.
15 Selesaia fii amea nema sähamu nea sähalea, Ödä yafie nedase amolile agesugi, dia idigi nawela susugu hamolo udia sebe melï ödä amolida, gädili elö elöi amolige, udia dolö sämolö asusugai gegedoi amolige, gafodo elö elöi amolige, ado elö elöla sälo amolige nefolalea.
16 Amaimo, dia bese nabülasi neebe melï amoliage, sugua ilaba gadoi ameage, idigi nawela susugu hamolo udia amoma, edefademalä bimolö habobamolömelë. Ïe nelebo difolalo amo neala gaula awäsegi, hï eda gumusui dudugïmu samialamolömelë. Amase, ilia ïe hü nalahilä, giwida nulogi gobemolömelë.
17 Godea dafidi säla negesalea, amala hamomolömelëla säla negei amo gadola hamomäia, ilile iso asigigi helësëlasisegi, ilia ado afädë negelahilä, sigi namolö geloi nii amo sugua ilaba gadoi amoma ïmolömelë. Godea ado säla negei dibe amo gadola gausiaha maademäia, ilia amala hahamola awäha namolö gabio.
18 Udia dia melï amoda, gaamu ilibia edefade amo gadoi gabio. Gaamu ameada, nagadaia gini nefolalebe amoli sigi aligisebemelëla säla ïasio.