8
Baḏuwaḏuyurruna walala warrpam'nha Yäyinydja wäŋa
8:1–29 (They captured the city of Ai and destroyed it)
1 Bala Garrayyunydja waŋana Djatjuwanha bitjarra, “Yaka nhe barrariyanydja, ga yaka nhe ganydjarr‐winya'yurra. Ma' märraŋa dhuwala nhuŋuway miriŋunha walalanha bukmaknha yana, bala yana marrtjiyana balayi roŋiyiyayi Yäyilili wäŋalili. Bukmaknha ŋarra wekaŋalanydja ŋunhanydja nhokalaynha goŋlili dhayuŋara; wäŋanydja ŋunhiyi ga Giŋ ŋunhi ga bukmak nhä malanha warrpam' ŋunhanydja yurru nhumalaŋguwaynha.
2 Bumanydja nhuma yukurra yurru warrpam'thun yana dhawar'marama Yäyinydja wäŋa, ŋayilpikuŋa yana yurru, biyaka yana liŋgu bitjarra nhuma ŋunhala Djariku bumara dhawar'maraŋala yana, yurru wäyindja malanha ŋunhi ga wiripunydja girri' malanha nhumalaŋguwaynha yurru warrpam'nha. Djuy'yurra wiripu‐guḻku'nhanydja miriŋunha, walala yurru marrtji gali'kurru, bala galkun gali'ŋurana yukurra yurru nhina, märr yurru walala gärri ŋunhimalayi wäŋalili ŋuliŋuruyinydja gayulnha lili yurru.” Bitjarrana ŋayi Garrayyu waŋananydja Djatjuwanha.
3 Ga dhunupana yana ŋayi Djatjuwanydja gaŋgathinana, rrambaŋina walala ŋunhi miriŋuna walala nhanbala miṯtjina bukmaknha, girri'‐ŋamathinanydja walala buwayakkunharawuna warrpam'thunarawuna ŋuriki Yäyipuyŋuwunydja. Ŋayi djarr'yurrunanydja ŋutu'mirrinha ganydjarrnha ḏarramuwurrunhanydja yana, bala waŋananydja ŋayi bitjarrana walalanha,
4 “Gatjuy marrtjiyana walala. Marrtjiyanydja gayul yukirriya‐a‐a ŋunha bala gali'kurru gal'ŋu, ga ŋunhana bala wiripuŋulilina gali'lili nhuma yurru djuḻuḻ'yundja, märr barrku biyaka ya' yarrkthurra ŋulaŋuru wäŋaŋurunydja wal'ŋu, ga ŋunhiliyina yukirriya galkurranydja.
5 Goḏarrny'tja ŋanapurru boŋguŋu wiripu‐guḻkuny'tja marrtji, bala boŋguŋu walalanydja Yäyipuyŋuyunydja yolŋuyu walalay nhäŋuna ŋanapurrunha, bala boŋguŋu walala dhawaṯthurrunydja, bala dhunupana ŋupuruna ŋanapurrunha boŋgama. Ga ŋanapurrunydja boŋgama bilyurru, bala yana gundupuŋuna boŋguŋu walalambala, ŋunhiyinydja yana mayali'‐wilkthurru boŋguŋu ŋanapurru. Gundupuŋunydja ŋanapurru boŋguŋu yukirri biyakuna ya' ṉinydjiyalilina,
6 ga walalanydja boŋguŋu ga ŋupurruyi ŋanapurrunha.
7 Bala nhumanydja yana boŋguŋu gärrina yanana‐wala ŋunhimala wäŋalilinydja, bala yana Garrayyunydja boŋguŋu wekaŋuna nhumalaŋgala.
8 Ga ŋunhi nhuma boŋguŋu märraŋu wäŋanydja ŋunhayi, ga dhunupa nhuma boŋguŋu dhuŋgur'yurruna gurthayuna yulŋunydja, biyaku yana liŋgu yulŋunydja ŋunhi ŋayi Garrayyu ŋayipi ḻakaraŋala.” Bitjarrayina ŋayi Djatjuwayu djuy'yurrunanydja ŋunhinha ḏarramuwurrunhanydja.
9 Marrtjinanydja walala yukurrana‐a‐a, yana liŋgu‐u‐u ga wäŋanydja ŋayathaŋala, ga ŋunhalayina walala yukurrana galkurrunanydja.
10-13 Ga wiripuŋuyunydja munhayu munhakumirri, Djatjuwa ga nhanŋu miṯtji marrtjina wäŋgaŋala, bala dhunupana yana withiyarana Yäyinydja wäŋa.
14 Bala ŋayi Giŋdhunydja ga ŋuriŋi yolŋu'‐yulŋuyunydja walalanha nhäŋalana, walala marrtjina lili wäŋgaŋala, ga dhunupana walala ŋuparana walalanha Yäyipuyŋuyunydja ŋuriŋinydja miriŋuyu; yaka walala marŋgi ŋunhi walala wiripu‐guḻkuny'tja miriŋu ŋunhalana bala yukurrana nhinana.
15-16 Walalanydja Djatjuwanydja ga wiripu‐guḻku' ŋunhi nhanbala mala dhunupa bilyu'‐bilyurrunana, bala gundupuŋalana yana roŋiyina wäŋalilina, yana walala bitjarra ya' mayali'‐wilkthurruna. Gundupuŋalanydja walala yukurrana mukthurruna yana‐a‐a, ga walalanydja mukthurruna ŋupara miriŋuyunydja ŋuriŋi Yäyipuyŋuyunydja, yana liŋgu ga wuyupthurruna wal'ŋu ŋunhiyi wäŋa walalaŋgu.
17 Ga ŋunhalayi Yäyinydja yakana waŋgany ŋula ḏarramu nhinana yukurrana ŋuruku wäŋawunydja goŋ‐nherraṉmina, ga ḻoḻunydja ŋunhiyi dhä‐ḻapthurrunana, ḻapthunarana yukurrana dhärrana.
18 Bala ŋayi Garray waŋana Djatjuwawala bitjarra, “Märraŋa dhuwala nhuŋuway gara, bala yana dhunupamirriyaŋana ŋunhayi wäŋanhanydja. Ŋarranydja yukurra wekama nhokalana ŋunhayi wäŋanydja.” Yuwalkthi ŋayinydja Djatjuwayunydja ŋunhi märraŋalana garanydja, bala yana dhunupamirriyaŋalana yukurrana.
19 Bala walalanydja marrtjina ŋulaŋurunydja bala gali'ŋuru miriŋu dhawa'‐yawaṯthurrunana, bala yana gärrinana‐wala ŋunhimala wäŋalilina. Walala ḏaw'‐ḏawyurrunana marrtjina ŋunhi wäŋanydja warrpam'nha dhikana, bala yana dhuŋgur'yurrunana, gonhana marrtjina nhärana, ṉoluŋdhinana marrtjina, ŋawululny'tja bena marrtjina gaŋgathina.
20 Walalanydja ŋunha Yäyipuyŋunydja mukthurruna yana ŋupara yukurrana Djatjuwawa ŋunhi malanha, bala walala ŋunhi waṯthurrunanydja nhäŋala bitjarra bala roŋiyina ŋunhiyi wäŋanydja walalaŋguway, nhäŋala warray ŋayi marrtjina gurthana ŋawulul'nha gaŋgathina, ṉoluŋdhina.
21 Bala walalanydja bilyu'‐bilyurrunana yana ŋunhi Yitjuralpuyŋunydja, bala galkiŋuruna walalanhanydja marrtjina bumara ḏatthurruna.
22 Ga walalanydja lili warray gumurr‐roŋiyina ŋunhinydja walala ŋunhi walala wäŋa ḏul'yurruna, ga ŋunhalanydja walala ḻiw'maraŋalana walalanha ṉapuŋga'kuŋalana, ḻiw‐ḏap bitjarrayi walalanha, yurru walala marrtjina bumarana gay' wiṯthurrunana dhikana, dhawar'maraŋalana Yäyipuyŋunhanydja miriŋunha, waŋga'‐waŋganynha yana dhawar'maraŋala, yakana ŋula waŋgany walŋathinanydja.
23 Yurru ŋanyapinyaynha walala ḏapmaraŋalanydja märraŋala buŋgawanhana, bala walala gäŋalana ŋanya lili nhanukala Djatjuwawalana.
24 Yo, ŋuriŋi Yitjuralpuyŋuyunydja bumara warrpam'thurruna yana dhawar'maraŋala ŋunhi miriŋunhanydja ŋunhalana bala warraŋulnha, ga bitjarrayi liŋgu walala roŋiyina balanydja wäŋalilinydja, ga ŋunhalanydja bumara walala bukmaknhana, dhawar'maraŋalana yana, yakana ŋula waŋgany walŋathina.
25-26 Ga ŋayinydja yukurrana Djatjuwanydja dhärrana yana bitjarra liŋgu, ga dhunupamirriyaŋalanydja yukurrana ŋunha bili yana wäŋa garayu nhanukiyingalay ŋayi. Yakana ŋayi goŋ‐yupthurruna ŋuliŋuruyi, yana liŋgu ga dhawar'maraŋala wal'ŋu walala bumara marrtjina yolŋu'‐yulŋunha ŋunhi bukmaknha.
27-28 Yo, ŋuriŋi Yitjuralpuyŋuyunydja ḏul'yurrunana ŋunhiyi wäŋanydja, buku‐yapmaraŋalana warrpam'nha, yurru walala märra'‐marraŋalanydja ŋuliŋuruyi djaw'‐djawyurrunanydja wäŋaŋurunydja wäyinnha ga girri'na walalaŋguwaynha walala, bitjarra liŋgu yana ŋunhi ŋayi Garrayyu ḻakaraŋala yukurrana walalaŋgu.
29 Ga ŋayi Djatjuwayunydja bumara ŋunhi Giŋnhanydja walalaŋgu rakunyguŋalana, bala walala rumbalnydja ŋanya ŋurrkaŋala dhurrwaralilina galki ŋunhi ḻoḻulilina. Bala walala guṉḏana ŋal'‐ŋalmaraŋala yukurrana maŋutji‐ŋäkirrmaraŋalanydja ŋanya rumbalnydja, ga ŋunhiyinydja malanha guṉḏanydja mukthun yana dhiyaŋunydja‐wala ŋunha djingaryun yukurra.
Djatjuwayu mel‐ḻaw'maraŋala dhäruknha ŋanya Godnha yolŋu'‐yulŋuwala
8:30–35 (Joshua read God’s laws to the people)
30-32 Bala yana walala ŋuliŋurunydja giṯthurrunana marrtjina dhawaṯthurruna ŋunha bukulili wäŋalili yäkulili Yepallilina, ga ŋunhamalayina ŋayi Djatjuwayu dhuḻ'yurruna ŋal'‐ŋalmaraŋala guṉḏanydja Garraywuna buku‐ŋal'yunarawu. Bala walala yukurrana ŋunhalayina bumara wäyindja malanha, bitjarra galkithinana marrtjina lili Godkalana ŋuriŋiyinydja maŋgu'‐waṉḏinyarayu wäyingalanydja, buku‐ŋal'yurrunanydja walala yukurrana batharanydja wäyindja malanha, mundhurrnha wekaŋala Garraywuna.
33 Ga gali'ŋuranydja ŋunhiliŋumi ga buku maṉḏanha wäŋa yukurrana gorruŋala, waŋganydja yäku Yepalwuy ga wiripunydja Giritjimbuy, ga walalanydja yolŋu'‐yulŋunydja ŋunhi guḻk‐guḻkthunmina, waŋganynha miṯtji dhipala bala waŋganylili bukulili ŋal'‐ŋalyurruna, ga wiripu‐guḻkuny'tja ga dhipala bala gali'lili wiripulili bukulili, ga ŋunhi Dhawu'‐nherraṉminyarawuynydja Bathi ŋunhala yukurrana djingaryurruna ṉapuŋga' ŋunhili walalaŋgala.
34-35 Bala yana ŋayinydja Djatjuwayunydja djorra'na mel‐ḻaw'maraŋala, bala marrtjina waŋanana makarrnha dhäruknha, bukmaknha yana ŋunhi Godthu yukurrana ḻakaraŋala ŋäthili dhäruk nherraṉmina Mawtjitjkala; ŋayi waŋananydja marrtjina ŋunhi dhawu'‐nherraṉminyarawuy dhäruktja malanha, ga bitjarrayi liŋgu ŋayi raypirri'yunaranydja dhäruk ŋunhiyi marrtjina waŋana bukmakkalana ŋurikala yolŋu'‐yulŋuwala, ḏarramuwurruŋgala ga dhäykawurruŋgala ga bitjarrayi bili yumurrku'walanydja, ga ŋurikala wiripu‐guḻku'wala mulku'‐mulkuruwala yolŋu'‐yulŋuwala ŋunhi walala yukurrana nhinana mala‐manapara ŋunhiliyi walalaŋgala malaŋura ŋunhi Godku nhanŋuway wal'ŋu yolŋu'‐yulŋu.