9
Gipiyanbuyŋuyu mayali'‐wilkthurruna Djatjuwanha
9:1–27 (The Gibeonites deceived Joshua)
1 Ga bukmakthu yolŋu'‐yulŋuyu miṯtjiyu ga miṯtjiyu ŋäkulanydja, bala borrk‐beyaṉiyinana yukurrana ŋurikinydja yolŋuwu miṯtjiwu, Yitjuralpuyŋuwunydja.
2 Bala walala yukurrana ḻuŋ'maranhaminana waŋganynha miṯtjinydja, märr bini walala bunha gukunha Djatjuwawu miṯtjinha.
3 Ga wiripuwurruyunydja yolŋu'‐yulŋuyu Gipiyanbuyŋuyunydja ŋäkulana walalanha Yitjuralpuyŋunhanydja, nhaltjarra walala ŋunhi baḏuwaḏuyurruna bumara Djariku wäŋa ga ŋunhala Yäyi. Bala walala ŋunhiyi ḻuŋ'maranhaminana, bala waŋanharamina bitjanmina,
4 “Gul' ŋilimurru ŋi', mayali'‐wilkthunna Djatjuwanhanydja, märr yurru ŋuruŋu nhanukala miriŋuyunydja yakana buma ŋilimurrunha dhawar'marama,” bitjarra. Bala yana walala märraŋala ŋatha malaŋgarr'mirrina dhika, ŋäthiliŋuna ŋayaŋay', ga märraŋalayi walala bathinydja malanha ŋarŋgamirri barrŋbarrŋ, bala ŋal'maraŋala wäyingala ḏiltjililina.
5 Ga bitjarrayi liŋgu walala dhaṯthunminanydja rumballilinydja nherra'‐nhirrara ŋäthiliŋuna girri', ga ḻukuwuy nherra'‐nhirrarayi barrŋbarrŋmirriyi yana wal'ŋu murrŋaram'mirrina girri', bala yana walala martj‐martjurrunana.
6 Martj‐gay walala yakaŋga weyindja, bala bunanana, wäŋanydja ŋunha ŋayathaŋala, bala waŋana Djatjuwanhanydja bitjarrana gam' ḻakaranhaminanydja, “Ŋanapurrunydja dhuwala marrtjina lili ŋulaŋuru beŋuruna‐wala birr wäŋaŋuru, marrtjinanydja ŋanapurru lili, märr yurru ŋilimurru goŋ‐nherraṉmirri dhawu'‐nherraṉmirri bala‐lili'yunmirri, märr yurru ŋilimurru ḻundu'manydjina yanana, nhuŋu mala ga ŋanapurru mala; ŋilimurru yurru ḻundukunhamirrina yanana yukurra nhina,” bitjarra.
7 Bala walala Yitjuralpuyŋuyunydja buku‐ḏuwaṯthurruna warray dhä‐wirrka'yurruna walalanha bitjarra, “Nhäku yurru ŋanapurru dhawu'‐nherraṉmirri nhumalaŋgalanydja? Mak nhumanydja dhuwala bäy galkiwuy yana gal'ŋu wäŋawuy dhiyakuy.”
8-10 Ga walalanydja buku‐wakmaraŋala ḻakaranhamina nhanukala Djatjuwawala bitjarra, “Ŋanapurrunydja dhuwala nhumalaŋgu djämamirrina walala beŋuruna‐wala birr wäŋaŋuru marrtjina lili, liŋgu ŋanapurru yawungu ŋäma nhumalaŋgu waŋarrnha Godnha ŋunhi ŋayi yawungu nhumalanha guŋga'yuna ŋunhala Yetjip, ga ŋunhala bala gali'ŋura makarrŋura wäŋaŋura.
11 Bala yawungu ŋanapurruŋgala ŋurru'‐ŋurruŋuyunydja ŋanapurrunha djuy'yunana lili dhipala nhokalana.
12 Bala ŋanapurru yawungu dhuwala djaw'yundja ŋathanydja walŋa yana wal'ŋu dhika ḻatju', ga dhuwalana gay' nhäŋana ya', malaŋgarr'mirrina yätjnha.
13 Ŋanapurru dhaṯthunminanydja yuṯayu muka girri'yunydja, ga dhuwalana nhäŋana ya' barrŋbarrŋnha yätjnha, bili ŋanapurru yukurrana weyinnha marrtjina, weyinnha wäŋa ŋupara lili.” Ga bitjarrana walala yukurrana ḻakaraŋalanydja, yurru djawukinana dhäwuny'tja walala yukurrana ḻakaraŋala.
14 Bala walalanydja nhäŋalana ŋunhimala girri'lilina ŋäthiliŋulilina ga ŋathalilina murrŋaram'mirrililina, yurru yakana walala ŋula bukumirriyaŋala dhä‐wirrka'yurrunanydja ŋanya Godnhanydja.
15 Dhunupana yana ŋayi Djatjuwanydja walalaŋgu märr‐yuwalkthina warray, bala ŋayi dhawu'‐nherraṉminana, dhäruknha nherrara walalaŋgu Garraywalaŋumirrina yäkumirri. Yo, ŋunhiyi märrma' maṉḏanha yuwalknha yana miṯtji ḻundukunhaminanydja, gupaḏalkunhaminana yana walala nherraṉminanydja. Ga bitjarrayi liŋgu walalanydja ŋuriŋi ŋurru'‐ŋurruŋuyunydja yolŋu'‐yulŋuyu dhäruktja‐nherrara yäkumirrina Garraywalaŋumirrina yana, bukmakthu yana ŋuriŋi malayu Yitjuralpuyŋuyunydja, “Dhuwalayinydja dhawu' yukurra yurru dhärra gupaḏalnha‐wala yana,” bitjarra.
16 Ga ḻurrkun'nha walu djuḻkthurruna, bala walalanydja marrtjina maḻŋ'maraŋalana, ŋunhi walalanydja ŋunhiyinydjayi Gipiyanbuyŋunydja yolŋu'‐yulŋu yaka warray beŋuru barrkuŋuru, ŋurikiy warray bäyma galkiŋuwuy warray yana wäŋawuy.
17 Ga wiripu‐guḻkuny'tja ḏukṯukthina, walala bini ŋunhi dhunupana marrtjinya ga bunha dhawar'maranhana ŋunhi Gipiyanbuyŋunhanydja yolŋu'‐yulŋunha.
18-19 Yurru walalanydja ŋuriŋi ŋurru'‐ŋurruŋuyunydja gulmaraŋala warray walalanha, waŋana yukurrana bitjarra warray gam', “Yakana yurru ŋilimurru walalanha ŋula bumanydja, liŋgu ŋilimurrunydja dhuwala dhawu'‐nherraṉmina muka be walalaŋgala yäkumirri Garraywalaŋumirriŋga Godkalaŋumirriŋga.
20 Ŋuli yurru ŋilimurru buma walalanha rakunygumanydja, ŋayinydja yurru Godthunydja ŋilimurrunha dhä‐ḏir'yunna.
21 Gonhana walala yurru yukurra nhinanydja walŋamirrinydja, ga djäma walala yukurra yurru ŋilimurruŋgu.”
22 Bala dhunupana ŋayi Djatjuwayunydja dhä‐wirrka'yurrunana walalanha bitjarrana, “Nhäku warray nhuma ŋunhi ŋanapurrunha bothinanydja?
23 Godthunydja nhumalanha yurru dhuwala dhä‐ḏir'yunna, liŋgu nhuma mayali'‐wilkthurruna ŋanapurrunha. Bitjanna liŋgu nhuma yurru gupaḏalnha‐wala djämamirrinydja walala, gulkthun nhuma yurru yukurra gurthana djatthun, ga gäma nhuma yukurra yurru gapu Godkalaŋuwuna Buṉbuwu.”
24 Ga walalanydja buku‐wakmaraŋala bala Djatjuwawunydja bitjarra, “Ŋäkula ŋanapurru ŋunhi nhumalanha yulŋunydja, ŋunhi nhumalaŋgalanydja Godthu ḻakaraŋala, bitjan ŋayi yurru wekama dhuwalayinydja wäŋa nhumalaŋgalana goŋlili. Ŋanapurrunydja ŋunhi beyaṉiyinana wirrkina wal'ŋu, liŋgu nhuma bini ŋanapurrunha bunha warrpam'thunana. Ga dhiyaŋuyina ŋunhi ŋanapurru bothinanydja nhumalanha.
25 Ga dhuwalana gay' ŋanapurru yulŋunydja, nhumalaŋgalana goŋŋuranydja.”
26 Bala ŋayi yana Djatjuwayunydja walŋakuŋalana walalanha, yakana walala Yitjuralpuyŋuyu bumaranydja walalanha, liŋgu ŋayina Djatjuwayuna walalanha gulmaraŋala waŋana.
27 Bala walala ŋunhi Gipiyanbuyŋuyunydja djämana yukurra ŋuli ŋunhiliyi Godkalanydja Buṉbuŋura, bitjana gurthana walala ŋuli djatthuna ga gapuna gänha.