4
Yelatjiyayu guŋga'yurruna ŋurruwuyknha dhäykanha
4:1–7 (Elisha helped a poor widow)
1 Waŋgany dhäyka buku‐wurthapuy marrtjina bala Yelatjiyawala, bala ŋayi waŋana nhanukala, “Wäy, buŋgawa ŋarraku, dhuway'mirriŋunydja liŋguna ŋarraku rakunynha. Marŋgiŋga nhe nhanŋu, ŋunhi ŋayinydja manymak ḏarramu, yurru gombuŋala ŋayi rrupiya wiripuŋunha ḏarramunha. Ga gäthuranydja ŋunhiyi ḏarramunydja bunana, ga waŋananydja ŋayi ŋäŋ'thurruna rrupiyawunydja ḏukṯukthina buku‐ruŋiyinmaranharawuna. Yurru ŋarranydja dhuwala bäyŋuna, rrupiyamiriwnha, ga waŋananydja ŋayi ŋunha, ŋayi bini yothunha maṉḏanha ŋarraku waku'mirriŋunha maṉḏanha djaw'yuna, djämamirrinhana maṉḏanha nhanŋuway. Nhaltjanna ŋarra yurru yulŋunydja?”
2 Ga ŋayi Yelatjayunydja waŋana dhä‐wirrka'yurruna ŋanya bitjarra, “Nhä ŋula nhe yukurra ḏälkumanydja?” bitjarra. Ga ŋayinydja ŋunhi dhäykanydja waŋana bitjarrana, “Dhäwulnha, ŋula nhämiriwnha. Yana ŋarra nhina ŋunha ŋayathamanydja weyika'na ḻurrkun'nha buthuḻu'mirri.”
3 Ga ŋayi Yelatjiyanydja waŋana nhanukala bitjarrana, “Gatjuy, nhe yurru marrtjiya bala, ŋäŋ'thurra nhuŋuway ḻundu'mirriŋunha walalanha botjuŋ, dhaŋaŋ ŋula dhulmu‐wayŋunydja botjuŋ.
4 Gäŋanydja nhe yurru bala nhokiyingala wäŋalili, ga dhaḻ'yurra dhurrwaranydja, bala yana guryu'‐guryunmaraŋana marrtjiya ŋunhiyi weyika ŋunhimala botjuŋlili malaŋulili.” Ga bitjarra ŋayi Yelatjiyayu ḻakaraŋalanydja nhanŋu ŋuriki dhäykawu.
5 Bala walala yuwalkthi galkarana marrtjina yana ŋurikiŋi gurruṯu'mirriwuŋunydja walalaŋguŋu guḻku'kuŋalana, bala dhäykanydja ŋunhi ga waku'mirriŋu maṉḏa nhanŋu ŋunhi ḏarramunydja maṉḏa gärrinana buṉbulilinydja, bala dhaḻ'yurrunana ŋunhi dhurrwaranydja. Märraŋala ŋayi ŋunhi yutjuwaḻa'mirrinydja buthuḻu weyika'mirrinydja, bala rarr'yu‐rarryurrunana marrtjina. Maṉḏanydja ŋuriŋi waku'mirriŋuyunydja maṉḏathu nhanukala dhurr'maraŋalana djingaryurruna wiripuna malanha ŋunhi botjuŋ malanha, bitjarrana liŋguna gäŋalana nhanbala dharrana, rarr'yurrunana yukurrana.
6 Yo, bukmaknha ŋunhi botjuŋ malanha dhaŋaŋmirrina ŋuliŋuru liŋgu waŋganyŋuru yutjuwaḻa'ŋuru buthuḻu'ŋuru.
Ga biyapul ŋunhi ŋayi dhäyka waŋana, “Biyapul gäŋa lili wiripuna go,” bitjarra. Ga ŋayi ŋunhi waku'mirriŋunydja nhanŋu waŋana bitjarra, “Dhuwalana liŋgu. Bukmaknha dhaŋaŋmirrina.” Bala ŋunhi weyikany'tja gulyurruna bäyŋuthinana liŋguna, bäyŋuna biyapulnydja.
7 Ŋayi dhäykanydja ŋunhi marrtjina balayi Yelatjiyawala, ga ḻakaraŋala nhanbala Yelatjiyawa ŋurikiyi. Ga ŋayi Yelatjiyanydja waŋana nhanukala ŋurikala dhäykawalanydja bitjarrana, “Gatjuy, mali'yurrana ŋunhiyinydjayi weyikany'tja malanha, ga roŋiyinmaraŋana rrupiyanydja wekaŋa ŋuriki ḏarramuwuna. Ga nhuŋunydja yurru ŋorrayi rrupiya yukurra, ga nhokalaŋuwu waku'mirriŋuwu, märr yurru nhuma yukirriya nhiniya weyinŋumirrina yana.”
Yelatjiya ga ḻukunydja dhäyka wäŋawuy Djunumbuy
4:8–37 (Elisha and the rich woman from Shunem)
8 Ŋunhala wäŋaŋura yäkuŋura Djunum miyalk yukurrana nhinana, yurru ŋayi ŋunhi mirithirri ḻukunydja yolŋunydja. Wiripunydja ŋayi Yelatjiya marrtji ŋulawitjandhi, bala ŋayi ŋuriŋinydjayi dhäykayu garr'yun ŋanya ŋathawuna ḻukanharawu nhanukiyingala wäŋalilina. Yo, bitjanna liŋgu ŋayi ŋuli Yelatjiyanydja yukurranha marrtjinya ŋurikalayi miyalkkala wäŋalilinydja ŋathawunydja.
9 Ga waŋganymirriyunydja waluyu ŋayi ŋunhiyi miyalk waŋana nhanukalaŋuwala dhuway'mirriŋuwala bitjarrana, “Ŋunhanydja gay ḏarramu Godku yolŋu.
10 Ŋali maṉḏa wäŋa nhanŋu dhuḻ'yun ŋi', nyumukuṉiny' dhaḻakarr, ŋunha garrwarlili, märr ŋayi boŋguŋu biyaku liŋgu nhini'‐nhini dhiyala yukirri ŋitjalaŋgala yuki'‐yukirri, ŋunhi ŋayi boŋguŋu withiyurru lili ŋitjalanha ya'.” Bala maṉḏa bitjarrayinayi djämanydja.
11-13 Wiripunydja ŋayi Yelatjiya ŋorra nhina ŋunhiliyi, ga ŋayinydja waŋa bitjan nhanukalaŋuwala djämamirriwalanydja, “Ŋunhanydja miyalk gay' wirrki yukurra gel'yun djäka. Gatjuy nhe marrtjiya, ga dhä‐wirrka'yurra ŋanya ŋi', nhaltjan ŋarra yurru guŋga'yun ŋanya, nhäku ŋayi ŋula ḏukṯuk.”
Bala yuwalkthi ŋunhi djämamirrinydja marrtji, ga dhä‐wirrka'yunna ŋanya. Ga ŋayi ŋunhi dhäykanydja waŋa buku‐ruŋiyinmarama bitjan, “Gana' dhuwala ŋarraku, ŋarra yukurra ŋayathamanydja bukmak nhä malanha.”
14 Ga ŋayi Yelatjiyayunydja waŋa nhanukalaŋuwala djämamirriwalanydja bitjan, “Nhaltjan ŋarra yurru dhika guŋga'yundja ŋanya?” bitjarra ŋayinydja.
Ga ŋayi ŋunhi djämamirriyunydja ḻakarama nhanŋu bitjan, “Yothumiriw ŋunha ŋayi, ga nhanŋu dhuway'mirriŋunydja djawuḻpa' ḏarramu.”
15 Ga ŋayi Yelatjiyayunydja waŋa, “Go, garr'yurra ŋunhi lili miyalknha ya'.” Bala ŋayi yuwalkthi ŋunhi dhäykanydja marrtjina lili, ga dhärra dhurrwaralilina.
16 Ŋayi Yelatjiyayunydja waŋa ḻakaramana nhanŋu ŋuriki dhäykawu bitjanna, “Dhiyaŋunydja‐wala boŋguŋu dhuŋgarrayu nhenydja boŋguŋu gurrukaŋu ratha'nha, ga dhangi'yurru nhe yukirri boŋguŋu yothunhana.”
Ga ŋayi ŋunhi dhäykanydja waŋa bitjan, “Yaka ḻakaraŋa ŋarraku bothiya. Nhenydja dhuwala be Godkuŋga yolŋu.”
17 Yurru yuwalk warray ŋunhi yulŋunydja maḻŋ'thurrunanydja, ga yothuny'tja ŋunhi dhawal‐wuyaŋina ḏarramuna.
18 Dhuŋgarranydja marrtjina djuḻk‐djuḻkmaraŋalana, ḏarramunydja ŋunhi ŋutharana märr‐wakindhinana. Waŋganymirriyunydja waluyu ŋayi ŋunhi rathany'tja malthun bäpa'mirriŋuwana bala dhulmu‐waṉarra'lili ŋathamirrililina.
19 Bala ŋayi ŋunhi rathany'tja waŋa bitjanna, “Mäḻu'! Dhika muḻkurr ŋarra rirrikthun marrtji.”
20 Ga ŋayi ŋuriŋi djämamirriyunydja märrama ŋanya ḻaw'marama, ga balayi gäma ŋäṉḏi'mirriŋuwala. Ŋayi ŋunhi nhina yothuny'tja yukurra yuṯuŋgurrŋura ŋäṉḏi'mirriŋuwala gorruma yana liŋgu‐u‐u, ga ḻiyalilina walu wapthun, bala ŋayi rakunydhirrina.
21 Ŋayi ŋäṉḏi'mirriŋuyunydja gämana yothunhanydja ŋunhi, gämana lili‐i‐i garrwarlilina, Yelatjiyawalana wäŋalili, ga ŋunhimalana bala'palalilina yorrkuma ŋanya, bala marrtji roŋiyirriyi‐wala, dhaḻ'yun dhurrwaranydja.
22 Ga ŋayi ŋuriŋi dhäykayunydja waŋa dhuway'mirriŋunhana bitjan, “Ŋarranydja yurru dhuwala marrtji bala Yelatjiyawalana; yaka ŋarra weyindja yurru, bala liliyi ŋarra yurru roŋiyirri.”
23 Bala ŋayi dhuway'mirriŋuyunydja dhä‐wirrka'yunna bitjanna, “Nhäku warray? Dhuwalanydja dhuwala yaka dharrpal walu bitjanarawuyyi, ŋula guyaŋinyaramirrinydja walu yaka?”
Ga ŋayinydja ŋunhi miyalktja waŋana buku‐ruŋiyinmaraŋala bitjarra, “Gonhayi bay', ŋarranydja yurru dhuwala marrtjina,” bitjarra.
24-25 Yuwalkthi ŋayi ganydjarryuna dhika marrtjinanydja, yana liŋgu‐u‐u ga ŋunhala bukuŋura Gämul wäŋaŋura yäkuŋura. Bala ŋayi Yelatjiyayunydja dharr‐way nhämana, ŋayi nhina lili marrtji, bala ŋayi waŋana nhanukalaŋuwala djämamirriwalana, “Dhuwalanydja dhäyka ŋulaŋuru Djunumŋuru warray.
26 Gatju mak nhe waṉḏiya, ga dhä‐wirrka'yurra ŋanya, nhä ŋayi ŋamakurru' ŋunhi?” bitjarra. Yuwalkthi ŋunhi djämamirrinydja marrtji gumurr'yunna nhanŋu, ga dhä‐wirrka'yurruna ŋanya bitjarra dhäykanha, “Nhä nhe? . . . ŋamakurru' yulŋunydja?”
Ga miyalkthunydja ŋunhi ḻakaraŋala bitjarra, “Ŋamakurru' ŋarra. Warrpam' manymak,” bitjarra.
27 Yana marrtjiŋga ŋayi lili, yana liŋgu ga galkina wal'ŋu ŋunhalana, bala ŋayi galkina yana, ḏupthunmirrinydja ḻukulilina Yelatjiyawala.
28 Bala ŋayi ŋunhiyi dhäyka bitjarrana waŋananydja Yelatjiyawala, “Yaka warray ŋarra nhuna ŋäŋ'thurruna yothu'wunydja. Dhuwalana gay' ŋarra galŋa‐yätjthinana, liŋgu ŋunhiyinydjayi yothuny'tja ga liŋguna rakunynha.”
29 Dhunupa ŋayi Yelatjiyayunydja djuy'yunna nhanŋuway djämamirrinhana bitjanna, “Gatjuy, waḏutja marrtjiyana‐wala ŋunhimala wäŋalilinydja. Ga gäŋanydja dhuwala gay' dharpa ŋarraku, ga garrwarkuŋa mulkiya yukirriya dhuwala galki ŋurikala ḏarramuwala ratha'wala.”
30 Ga ŋayi ŋunhi dhäyka waŋa Yelatjiyawalanydja bitjanna, “Ma' nhenydja marrtjiyayi go. Nhuŋunydja God dhuwala Walŋa‐ḏikṯik wal'ŋu; yakana ŋarranydja yurru nhuna ganan,” bitjarra. Bala maṉḏa yuwalkthina Yelatjiyanydja ga ŋunhi dhäykanydja marrtjina nhinana bala rrambaŋina.
31 Ga ŋunhi ŋayi djämamirrinydja ṉaŋ'thun nhina bala ŋurruŋuna; yurru ŋayi yukurrana garrwarkuŋala ŋunhi Yelatjiyawu dharpanydja ŋurikala ḏarramuwalana ratha'walana. Yurru bäyŋu warray ŋula nhänydja maḻŋ'thun, yaka warray ŋayi ḏäwalathirrinydja.
32 Bala ŋunhinydja ŋayipina Yelatjiyana buna yana ŋunhili; gulŋiyirrinydja ŋayi, dharr‐way nhämana, ŋayi yukurra ŋorra gurrmulnydja, liŋguna rakunynha.
33 Dhaḻ'yundja ŋayi dhurrwaranydja, bala ŋayi ŋäŋ'thunna yukurra, bukukurru waŋana Garraywalana.
34-35 Bala ŋayi gumurryu‐monygumana ŋunhiyi gurrmulnhanydja ratha'nha, ŋal'yunna nhanukala. Bala ŋayinydja ŋunhi marrtjina gurrmulnydja rumbalnydja dhika mulka'yirrina, bala marrtji dhunupa ŋunhi ŋatjarriŋ'thunna ŋunhiyi gurrmulnydja, bala ḻapthunna maŋutjinydja.
36 Ga yurruna ŋayi Yelatjiya wäthun ŋäṉḏi'mirriŋuwunydja, ga waŋa bitjanna nhanukala, “Dhuwalana nhuŋu yothuny'tja. Liŋguna ŋayi walŋana!”
37 Ga ŋayinydja ŋunhi dhäykanydja bena dhika ŋoy‐ŋamathirri, ga buku‐wekamana ŋanya Yelatjiyanha wirrkina dhika. Bala ŋayi märramanydja ŋunhi nhanŋuway yothunha gurrmulnhanydja, bala gonha'yunna, marrtjina dhawaṯthunna.