5
Naymandja baḏarraŋ'thinana wal'ŋu warrpam'nha
5:1–27 (Naaman was healed)
1 Ŋunhala makarrŋura wäŋaŋura yäkuŋura Djiriya, yolŋu ḏarramu yukurrana nhinana yäku Nayman, yurru ŋayi ŋunhi ŋurruŋu miriŋuwu yulŋunydja, mala‐warryunarayŋu. Ḻatju' dhika ŋayi ŋunhi djäkamirrinydja, yurru rirrikthurrunanydja ŋayi burrpuyyu rerriyunydja; barrpa'yuna dhikana gungaŋala ŋanya rumbalnydja dhulku'yuna.
2 Ŋulinyaramirriyuyi Djiriyapuyŋu yolŋu'‐yulŋu miriŋu marrtjina bala Yitjurallili nyäṉ'thurruna, ga warrpam walala wäŋa ḏaw'yurruna, ga lilinydja walala djaw'‐djawyurruna yolŋu'‐yulŋunhana. Ga ŋayinydja ŋuriŋinydjayi Naymandhunydja märraŋala waŋganynhana dhäykanha, wirrkuḻnha dhika dhäykanha Yitjuralpuyŋunhana, märr yurru ŋayi djämamirri nhanukalaŋuwu miyalkku.
3 Ŋuriŋi wirrkuḻyu nhäŋalana Naymannha djetjimirriyinyarana dhika, bala ŋayi wirrkina nhanŋu dhika wuyurrunanydja. Bala ŋayi waŋanana nhanukalaŋuwala dhäykawala buŋgawa'mirriŋuwalanydja, ŋunhiyi wirrkuḻnydja dhäyka bitjarra, “Ŋunha Djamariyanydja wäŋaŋura yukurra nhina Godku yolŋu, ŋayi ŋuli baḏarraŋ'kuŋuna ŋanya dhuwala djetjinydja.”
4 Bala ŋayi ŋuriŋi dhäykayunydja ḻakaraŋala nhanŋu Naymanguna, ga ŋayi Naymandhunydja ŋäkula ŋunhiyi, bala marrtjina ga ḻakaraŋala giŋbana, nhaltjarra yukurrana ŋunhi wirrkuḻyu ḻakaraŋala.
5 Ga yuwalkthi ŋayinydja giŋdja yuraŋalana yana, ga dhunupa ŋanya djuy'yurrunana, “Gatjuy marrtjiya Yitjurallilina. Marrtjiyanydja nhe ŋurikalayi buŋgawawala giŋgala, ga gäŋa dhuwala makarr‐dhäruk nhanŋu djorra',” bitjarra.
Bala ŋayi Naymandhunydja djoṉguŋala marrtjina mundhurrnha nhanŋu wekanharawuna, ga guḻku'na rrupiyanydja dhika ga ḻatju'mirrina dhikana girri' malannha; ŋayi märraŋala ŋunhiyi djorrany'tja dhärukmirrinydja, bala yana marrtjinana‐wala.
6-7 Marrtjinanydja ŋayi bala‐a‐a, ga ŋayathaŋala ŋunhi Yitjuralwuynydja wäŋa, marrtjinanydja ŋayi, ga bunana giŋba, bala gathara ŋunhiyi djorra'na. Yurru ŋayi ŋuriŋi giŋdhunydja mel‐ḻapmaraŋalanydja djorrany'tja, nhäŋalanydja ŋayi, ga ŋoynydja marrtjina yätjthina warray dhika, liŋgu ŋunhiyi dhäruktja yukurrana waŋana bitjarra, “Dhuwalanydja Naymandja, ŋarraku djämamirri, ga baḏarraŋ'kuŋa nhe ŋanya yurru yulŋunydja.” Yurru ŋayinydja ŋunhi Yitjuralpuyŋunydja giŋ waŋana bitjarra warray, “Nhaltjanna dhika ŋarra yurru ŋanya baḏarraŋ'kumanydja? Yol dhuwala ŋarranydja yolŋu? . . . Waŋarr God? Yana ŋayi yukurra ŋunha giŋ Djiriyawuynydja ŋarraku marina djäma.”
8 Bala ŋayi ŋunhalanydja Yelatjiyayunydja ŋäkulana ŋurikiy, bala yana ŋayi dhäwu'na djuy'yurruna lili ŋuriki giŋgunydja, bitjarra ŋayi waŋananydja, “Yaka ŋoy‐warriya. Djuy'yurra lili ŋunhi be ḏarramunhanydja lilina ŋarrakalana. Ŋayi yurru maḻŋ'marama dhikayi Godku yolŋunha nhina yukurra Yitjural.”
9 Bala yana ŋayi Naymandja marrtjinana withiyara Yelatjiyanhana; marrtjinanydja ŋayi, ga galkurruna warraŋul bala'ŋura.
10 Ga ŋayi Yelatjiyanydja yaka marrtjina ŋayipinydja walmana lili, yana ŋayi djuy'yurrunanydja nhanŋuway ŋayi djämamirrinha dhäwu'mirrinhana, bitjarrana ŋayi waŋananydja ŋurikala dhäruktja Naymangu gam'. “Marrtjiyanydja nhe yurru ŋunha mayaŋ'lili Djodanlili yarrupthurranydja, ga ŋunhalayi nhe yukurra yurru ḻupthundja buku 7‐mirri, bala yurru nhuŋu rumbalnydja ŋamathirrina baḏarraŋ'thirrina, ŋunhinydja rerrinydja yurru buwayakthirrina.”
11 Ga ŋayi Naymandja wirrki warray dhika maḏakarritjthina, ŋayi waŋananydja bitjarra, “Nhäku warray ŋayi yakanydja marrtjina lili ga nhäŋala ŋarranha. Ŋayipiŋga bini ŋunhi marrtjinya lili, ga goŋ‐ŋal'yuna ŋarrakala, ga bukumirriyanha Garraywala nhanukalaŋuwala waŋarrwala, bala ŋarra bini baḏarraŋ'thinyana ŋamathinyana.
12 Ŋunha ŋanapurruŋgalanydja wäŋaŋura ḏarrtjalk warray gapu, ḻanyiŋmirri warray. Nhäku warray ŋarra yurru yaka ruwurryunmirri ŋunhalanydja? . . . liŋgu Djodanbuynydja ŋunhi be nhäna, yätjnha gapu.”
13 Yurru ŋunhi djämamirrinydja ḏarramu waŋana nhanŋu Naymangu bitjarra warray, “Wäy yolŋu, ŋunhi bini ŋayi ḻakaranha ŋula nhä ḏäl, nhe yurru djämana‐wala yana. Nhämirri warray nhe ŋuli marrtjina‐wala yana, nhanŋu dhärukkuna yana malthurru, märr nhe baḏarraŋ'thirrina yurru ŋamathirrina.”
14 Bala ŋayi Naymandja marrtjinana, yarrupthurruna ŋunhi Djodanlilina, bala ŋayi yukurrana ḻupthurrunana ŋunhala buku 7‐mirri. Ga ŋunhi ŋayi dhawaṯthurrunanydja beŋuru ŋarkula'ŋuru, rumbalnydja dhika warrpam'nha buyuwuyu'na.
15 Bala ŋayi roŋiyinanydja bala Yelatjiyawalanydja, bala ŋayi waŋanana bitjarrana, “Liŋguna ŋarra marŋgithinana ŋunhi nhuŋunydja waŋarr yuwalknha wal'ŋu. Ŋarranydja ḏukṯukthina nhuŋu wekanharawu mundhurrwu malaŋuwu, liŋgu nhe ŋarranha ḏukmaraŋala.”
16 Yurru ŋayinydja Yelatjiyanydja waŋana yaka'yurruna bitjarra, “Ŋarranydja yurru yaka yana märrama nhokuŋu mundhurr malanha.”
17-19 Ŋayinydja yana Naymandja mukthurruna yukurrana ḏukṯukthina wekanharawu ŋuriki malanyŋuwu, ga ŋayi Yelatjiyanydja mukthurruna yana yukurrana yaka'yurruna dhä‐ḏälnha. Bala ŋayi Naymandja marrtjinana.
20 Dhiyaŋu liŋgu ŋayi ŋunhi bala marrtjinanydja, yakaŋga yana barrkuthinanydja, bala ŋayi ŋunhala Yelatjiyawalanydja djämamirriyu birrka'yurrunana ŋayipina bitjarrana, “Yelatjiyayu ŋunhi bini märranhaŋga ŋunha girriny'tja malanha? Ŋarra bay', waṉḏirrina yurru ŋupanna, ga märramana ŋarrakuwaynha ŋarra yurru.”
21 Yurru ŋayi ṉaŋ'thurrunana yana, ŋuparana yana liŋgu ga baṯ gay mulkana Naymannha. Naymandhunydja nhäŋala ŋanya, bala dhä‐wirrka'yurruna bitjarra, “Nhä yulŋunydja?” bitjarra.
22 Ga Yelatjiyawunydja ŋunhi djämamirri waŋana bitjarra, “Yelatjiyanydja ŋunha biyapul djambi ŋanyapinyay ŋayi ḻiya bay'. Ŋayi nhuŋu dhäruktja djuy'yunmina, nhe yurru balayi roŋiyinmarama nhanŋu ŋunhi rrupiyanydja ga girriny'tja.”
23-24 Ga ŋayi Naymandja dhika bena goŋmirriyina, bala dhunupa ŋayi rarr'yurrunana marrtjina, “Ŋay', ŋay', ŋay',” bitjarrana, rrupiya ga girri' malanha. Dhitj‐gay roŋiyina Yelatjiyawunydja djämamirri goŋ‐girri'mirrina ga rrupiyamirrina.
25 Ga ŋunhi ŋayi bunananydja ŋunhala wäŋaŋuranydja, ŋayi Yelatjiyayunydja nhäŋalana ŋanya, bala dhä‐wirrka'yurrunana, “Wanhaŋuru dhuwala nhe yulŋunydja?” bitjarra. “Ŋula wanhaŋuru?
26 Nhäŋala ŋarra nhuna yulŋunydja, nhe marrtjina ga märraŋala ŋunhiyi girri' malanha.
27 Dhiyaŋunydja‐wala Naymangu ŋunhi rerri malanha boŋguŋu buni nhuŋuna; nhepi ga nhokala yumurrku'yu yurru yukurra bitjanna liŋguna märrama gupaḏalŋu‐walana.” Yurru ŋayi dhunupa marrtjina dhika ŋunhiyinydja ḏarramu dhirrkthirrkthinana gay' rumbalnydja, barrwaṉ'tja warrpam'nha ŋunhi.