4
Miriŋuyu walalay Dhawu'‐nherraṉminyarawuynydja Bathi djaw'yurrunana
4:1–18 (The enemies took the Covenant Box)
1 Bala ŋulinyaramirriyu Bilitjiyawuyŋunydja miriŋu ḻuŋ'maranhaminana bunharaminyarawuna Yitjuralpuyŋuwuna, ga walalanydja ŋunhalanydja bala Yitjuralpuyŋunydja bitjarrayi yana ḻuŋ'maranhamina nyäṉ'thunarawuna ga bunharaminyarawuna bala‐lili'yunminyarawu ŋuruku bala Bilitjiyawuyŋuwu.
2 Walala Bilitjiyawuyŋunydja bilina bunanana walalaŋgu Yitjuralpuyŋuwunydja, bunanhaminana walala, bala yana bunharaminana yukurrana walala; wirrkina walalanydja yukurrana bumara lilinydja Yitjuralpuyŋunhanydja, yana liŋgu ga guḻku'na dhika burakina rakunygunydja Yitjuralpuyŋunydja, miṯtjinydja 4000‐nha.
3 Ga märr‐ḻurrkun'nha walŋathinanydja, ga balanydja roŋi'‐ruŋiyina wäŋalilinydja. Walala marrtjina waŋanharaminanydja bitjanminana, “Wanhakana dhika Garraynydja? Nhäku ŋayi yakanydja ŋilimurrunha guŋga'yurruna? Nhäku warray walala ŋuruŋunydja Bilitjiyawuyŋuyunydja ŋilimurrunha djuḻkmaraŋala? Gul' ŋilimurru marrtji bala, ga Dhawu'‐nherraṉminyarawuynha Bathi märrama, ga gäma lilina ŋulaŋuru Godkala Buṉbuŋuru Djälawŋuru. Ŋilimurru yurru gäma lilina, märr ŋayi yurru Godtja dhiyala galki ŋilimurruŋgala, märr yurru ŋayi walŋakuma ŋilimurrunha ŋulaŋuru miriŋuwala goŋŋuru.”
4 Yo, ŋunhiyi Dhawu'‐nherraṉminyarawuynydja Bathi ganaŋ'maranharawuy Godku, nhanŋuway wal'ŋu Godkuna ŋunhi ŋayi ŋuli yukurranha God nhinanha ŋunhiliyi dhiyala munatha'ŋuraŋga yana. Bala yana walala dhäwu'‐gänharamirrinhana djuy'yurruna Djälawlilina, ga maṉḏa Yelaywala gäthu'mirriŋuyu maṉḏathu Yupniyu ga Biniyayu märraŋalana ŋunhiyi Dhawu'‐nherraṉminyarawuy Bathi, bala yana gäŋala ŋunhiwalana wäŋalili, ŋunhi wanhami walala yukurrana wäŋaraŋala Yitjuralpuyŋu miriŋu.
5 Walalanydja Yitjuralpuyŋuyunydja ŋuriŋinydja dharr‐way nhäŋalana, maṉḏa yukurrana marrtjina lili ŋunhiyi Dhawu'‐nherraṉminyarawuynydja Bathi gäŋalana bala nhinana, ga walalanydja ŋunhi wirrkina goŋmirriyina dhika wiṯthurrunana goŋmirriyina, yurru walala yiŋgathinana gay' yatjunminana dhika.
6 Ga walalanydja ŋunhalanydja Bilitjiyawuyŋuyunydja ŋäkulana ŋunhi walalanha rirrakaynha yatjunminyarana yiŋgathinyarana, bala waŋana ḻakaranhamina bitjarrana, “Ŋäka walala. Nhäku ŋunha walala yukurra yiŋgathirrinydja?” bitjarrana. Ga yurruna walala ŋäkulanydja ŋunhi Dhawu'‐nherraṉminyarawuy Bathi ŋunhilina bunana walalaŋgu Yitjuralpuyŋuwalana wäŋaŋura.
7 Ga walalanydja wirrkina dhika beyaṉiyina, bala walala waŋanharamina ḻakaranharaminanydja bitjarrana, “Walalaŋgu waŋarrnydja liŋguna ŋunhana walalaŋgalana. Ga dhuwalanydja yurru ŋilimurru yakana djuḻkmarama walalanha dhiyaŋunydja‐wala, liŋgu walalaŋgunydja waŋarr ganydjarr‐ḏumurruna wal'ŋu.
8 Yolthuna ŋilimurrunhanydja yurru walŋakuma ŋurukala walalaŋgalaŋuwalanydja waŋarrwala? Ŋayipiŋga ŋunhi bumara Yetjippuyŋunhanydja ŋunhala ŋanhdharkŋuranydja.
9 Ŋilimurrunydja yurru yana dhärra wuṉḏaŋarryirri, ga yakana barrarirrinydja walalaŋgu. Ŋilimurru yurru wirrki yana bumanydja walalanha, märr yurru ŋuruŋu Yitjuralpuyŋuyunydja yakana ŋilimurrunha ŋayathama rakunygu. Yaka ŋilimurru ḏukṯuk, walala yurru ḏapmarama ŋilimurrunha, bala djaw'yun djämawuna. Bumanydja ŋilimurru yurru wirrki yana, wirrki yurru bumanydja ga dhawar'marama yana yurru walalanha.” Bitjarrana walala yukurrana ŋunhi Bilitjiyawuyŋunydja ganydjarr‐wekanhamina walalanhay walala.
10 Bala yana walala marrtjinana‐wala, ga bunanana nyäṉ'thurrunana ŋuriki Yitjuralpuyŋuwunydja, bala yana bunharaminana wiṯthunminana dhikana wal'ŋu wirrkina, ga bumaranydja walala rakunyguŋalanydja guḻku'nhana mirithirrina dhika Yitjuralpuyŋunhanydja, 3000‐nha miṯtjinydja rakunygunydja burakina.
11 Ga ŋuriŋina Bilitjiyawuyŋuyuna märraŋala ŋunhi Dhawu'‐nherraṉminyarawuynhanydja Bathinha, ga bitjarrayi liŋgu walala bumarayi ŋunhi Yelaywunydja gäthu'mirriŋunha maṉḏanha Yupninha ga Biniyanha.
12-13 Yurru waŋganydja ḏarramu winya'yurruna, ga balayi waṉḏina Djälawlili. Ŋayi Yelaynydja nhina‐dharrana galki ḻoḻuŋura dhurrwaraŋura, nhäŋala nhinana; warwuyurruna ŋayi yukurrana ŋunhi yulŋunydja ŋurikiyi Dhawu'‐nherraṉminyarawuywu Bathiwu ŋunhi walala djaw'yurruna ŋulaŋuru Garraywala wäŋaŋuru Buṉbuŋuru. Yo, waṉḏinana ŋayi yukurrana ŋunhi dhäwu'‐gänharamirrinydja, dhäwu'na gäŋala yolŋu'‐yulŋuwana, ga bukmaknha dhika yolŋu'‐yulŋunydja beyaṉiyinyaminana ga yatjunminana nyä'yunminana wirrkina dhika.
14-15 Yo, Yelaynydja ŋulinyaramirriyu wirrkina worruŋuyina 96‐nha dhuŋgarranydja nhanŋu, ga bambaynha ŋayi ŋunhi yulŋunydja. Ŋayi ŋäkula rirrakay nyä'yunminyara, bala ŋayi waŋana bitjarrana, “Ŋäka dhika rirrakay ya'! Nhäku walala yukurra dhika ŋäthinydja?”
16 Bala ŋunhiyi dhäwu'mirrina bunana nhanŋu, ga ḻakaraŋala nhanŋu bitjarrana, “Ŋarra dhuwala waṉḏina ŋulaŋuru bili ŋunha walala yukurra bunharamirri.”
Ga Yelaynydja waŋana dhä‐wirrka'yurruna ŋanya bitjarra, “Nhaltjarra yulŋunydja? Go ḻakaraŋana ŋarraku.”
17 Ga ŋuriŋi dhäwu'mirriyunydja ḻakaraŋala bitjarra, “Ŋuruŋu Bilitjiyawuyŋuyunydja djuḻkmaraŋalana ŋanapurrunha. Guḻku'na Yitjuralpuyŋunydja raku'‐rakunydhina, ga nhipala gäthu'mirriŋu maṉḏa märrma' yana rakunynha maṉḏa liŋguna. Ga bitjarrayi liŋgu walala ŋunhi djaw'yurruna Garraywunydja Dhawu'‐nherraṉminyarawuy Bathi.”
18 Ga ŋunhi ŋayi ŋäkulanydja ŋunhiyi malanha, ŋunhi walala djaw'yurruna Dhawu'‐nherraṉminyarawuy Bathi, Yelaynydja dhunupa dhaŋgalkthurrunana ŋuliŋuru nhina'‐nhinanharamirriŋurunydja ḏiltjiyuna ŋurrkanhamina; ga gupana‐ḏaw'yurrunanydja, bala yana rakunydhinana. Ŋe, Yelaynydja yukurrana djäka yolŋu'‐yulŋuwu miṯtji ḏälkuŋala 40 dhuŋgarra ŋupara, ga ŋunhinydja ŋayi rakunynha.