5
Godtja dhuwala biyapul gal'ŋu ganydjarr‐ḏumurru ŋurukala Bilitjiyawuywalanydja walalaŋgala waŋarrwala
5:1–12 (God is stronger than the Philistines’ God)
1 Yo, ŋunhi walala Bilitjiyawuyŋuyu djaw'yurruna Bathinydja ŋunhi Dhawu'‐nherraṉminyarawuynhanydja, ŋunhi ŋayi yukurranha ŋuli mel‐ḻakaranha ŋuriŋiyi ŋunhi Godtja dhiyalaŋumina bäyma, ŋunhiyina dhuwala walala Bathinydja djaw'yurruna; djaw'yurrunanydja walala, bala gäŋala bala Yatjthutlilina wäŋalili.
2 Yo, ŋunhiliyi buṉbuŋura yukurrana djingaryurruna walalaŋgunydja waŋarr, goŋbuy warray ŋamaŋamayunara, walalaŋgiyinguŋu warray, ga ŋunhamalayina walala nherraranydja ŋanya Godkunydja ŋunhi Bathi Dhawu'‐nherraṉminyarawuynydja, gali'lili nherrara waŋgany‐manapara ŋurikalayina walalaŋgalaŋuwalana waŋarrwala Daykungalana yäkuwala.
3 Ga wiripuŋuyuna waluyu walala nhäŋala ŋunhinhanydja waŋarrnha walalambalaynydja galkinyarana, ŋunhalana yukurrana ŋorrana munatha'ŋurana, gumurrŋura yana bitjarra bäyma ya', galki ŋunhi Dhawu'‐nherraṉminyarawuyŋura Bathiŋura. Walala ŋanya ḻaw'maraŋala ŋunhi walalaŋguwaynydja waŋarrnha, ga balayi nherrara ŋunhimalayi liŋgu dharapullili.
4-5 Ga biyapul wiripuŋuyu waluyu, ga bitjarrayi yana liŋgu walala maḻŋ'maraŋala galkinyara yana, ḏaŋgalkthunara ŋunhiyi liŋgu, ga muḻkurrnydja ḏaw'yunarana ŋorrana yukurrana ga waṉa maṉḏanha, ḏaŋga'‐ḏaŋgalkthurrunana bala‐a‐a walala yulŋunydja ŋunhiyi walala, ga ŋunha wapthurruna galki dhurrwaralilina, bala ŋunhilina marrtjina ḏäpthurrunanydja, ga rumbalnha ŋayi waŋganynha yukurrana ŋunhilinydja ŋorrana galki ŋunhi Dhawu'‐nherraṉminyarawuyŋuranydja Bathiŋura.
6 Ga Garrayyunydja murr'maraŋalana walalanha, dhä‐ḏir'yurrunana ŋunhala Yatjthuttja wäŋaŋura; bukmaknha yolŋu'‐yulŋunydja yukurrana rirrikthunminana. Yo, wäŋanydja ŋunhiyi nyiknyik‐mäypamirriyinana, dhaŋaŋdhinana marrtjina dhika, ga ŋuriŋiyi nyiknyikthu gäŋalanydja ŋunhi rerri walalaŋgu.
7 Bukmaknha yolŋu'‐yulŋunydja marrtjina rirrikthunminana, ga wirrkina walala barrarinanydja. Bala walala waŋananydja yukurrana bitjarrana, “Dhiyaŋu Waŋarryu Yitjuralpuyŋuwalanydja ŋilimurrunha yukurra dhä‐ḏir'yunna, ga ŋunha ya' ŋilimurruŋgu waŋarrnha. Yaka ŋilimurru ḏukṯuk dhiyakunydja, ŋilimurru ŋayathama yukurra yurru weyin dhuwala Dhawu'‐nherraṉminyarawuy Bathi.”
8 Bala yana walala dhäwu'mirrinhana djuy'yurruna bala buŋgawawala Bilitjiyawuyŋuwala, walala dhäruktja djuy'yurruna bitjarrayina, “Yaka ŋanapurru ḏukṯuk dhiyaku Dhawu'‐nherraṉminyarawuywu Bathiwu Yitjuralpuyŋuwalaŋuwunydja; yaka ŋanapurru ḏukṯuk ŋayi yukurra yurru dhärra dhiyala ŋanapurruŋgala wäŋaŋura.”
Ga ŋayi ŋunhi giŋdja waŋana, “Djuy'yurrana bala ŋunha Gäthlilina wäŋalili,” bitjarra. Bala yuwalkthi walala gäŋala bala Gäthlilina.
9 Ga dhunupana ŋunhalanydja wäŋaŋura Garrayyu dhä‐ḏir'yurrunayi ŋurikinhanydja walalanha, ga bitjarra yana liŋgu yolŋunydja walala bukmakthina rirrikthunmina ŋuriŋi yana liŋgu waŋganydhu rerriyu; bukmaknha walala yukurrana wirrkina dhika rirrikthunmina, worru'‐wurruŋu wakinmirri ga yawirriny' yolŋu'‐yulŋu.
10 Bala yana walala ŋunhi Dhawu'‐nherraṉminyarawuynydja Bathi djuy'yurrunana‐wala wiripuŋulilina wäŋalili Yikrunlilina, ga walalanydja ŋunhilinydja wäŋa ŋurukuynydja yolŋu'‐yulŋu waŋana bitjarra, “Nhäku nhuma dhuwalanydja gäŋala lilinydja? Nhuma ḏukṯuk ŋanapurru yurru murrmurryun bukmaknha? Yaka dhuwala ŋanapurru ḏukṯuk dhiyakiyi Yitjuralpuyŋuwu waŋarrwu, dhiyala yukurra yurru djingaryun.”
11 Bala walala ḻakaraŋala giŋgu walalaŋgiyingalaŋuwu buŋgawawu bitjarra, “Djuy'yurrana ŋanapurruŋgala dhuwalanydja bathi ŋi', bala roŋinyamaraŋana balayi Yitjuralliliyi, märr ŋilimurru yakaŋga bukmaktja murrmurryun marrtji.” Yo, bukmaknha dhika beyaṉiyinanydja, bili Garrayyunydja yukurrana wirrkina dhä‐ḏir'yurruna walalanha.
12 Yo, guḻku'na marrtjina murrmurryurrunanydja ga wiripu‐guḻkuny'tja yana rirrikthunmina marrtjina, bala walala yukurrana bukmaknha märrliliyaŋalanydja walalaŋgalayŋuwala waŋarrwalanydja walalaŋgu guŋga'yunarawu ga walŋakunharawunydja.