16
ዬሱሲ ሃይቆፔ ዴንዲስ
(ማቶ 28፡1-8፤ ሉቃ 24፡1-12፤ ዮሃ 20፡1-10)
ሳምባታይ ኣꬊዳፔ ጉዬ ማግዴላ ማይራማ፥ ያይቆባ ኣያ ማይራማኔ ሳሎማ ቢዲ፥ ዬሱሳ ኣሃ ቲያናው ሺቶ ሻሚዶሶና። ዎጋ ዎዴ ዎንታ ዳሮ ጉራ ፃልቄይ ጫርሺን፥ ዱፉዋ ቢዶሶና። ኤንቲ ባንታ ጊዶን ኢሶይ ኢሱዋራ፥ «ዱፉዋ ዶናፔ ኑስ ሹቻ ኦኔ ጎንዶርሲዲ ዲጋናይ?» ያጊዲ ኦዴቲዶሶና።
ኤንቲ ፄሊያ ዎዴ ሄ ዳሮ ጊታ ሹቻይ ጎንዶሬቲዲ ኪቺዳይሳ ቤዒዶሶና። ዬሱሲ ሞጌቲዳ ዱፉዋ ጊዶ ጌሊያ ዎዴ ኢሲ ፓንꬃ ኣዴይ ቦꬃ ማዖ ማዒዲ፥ ኡሻቻ ባጋራ ኡቲዳይሳ ቤዒዲ ዳጋሚዶሶና።
ሺን ኢ ኤንታኮ፥ «ዳጋሞፊቴ፤ ማስቃሊያ ቦላ ካቄቲዳ፥ ናዚሬቴ ዬሱሳ ሂንቴ ኮዬይሳ ታኒ ኤራይስ። ኢ ሃይሳን ዴና፥ ሃይቆፔ ዴንዲስ። ኤንቲ ኢያ ሞጊዳ ቤሳ ሃይሳ ቤዒቴ። ሃዒ ቢዲ ዬሱሳ ታማሬታሲኔ ጴፂሮሳስ፥ ‹ዬሱሲ ሂንቴፌ ሲንꬃቲዲ ጋሊላ ቤስ። ኢ ሂንቴው ኦዲዳይሳዳ ሂንቴ ኢያ ያን ቤዓና› ያጊዲ ኦዲቴ» ያጊስ። +
ማጫሳቲ ያሻን ኮኮሪሼ ዱፉዋፔ ኬዪዲ ባቃቲዶሶና። ቃሲ ኤንቲ ያዪዳ ጊሾ ሄሳ ኦዴስካ ኣይኮካ ኦዲቦኮና። *
ዬሱሲ ማግዴላ ማይራሚስ ቤንቲስ
(ማቶ 28፡9-10፤ ዮሃ 20፡11-18)
ዬሱሲ ሃይቆፔ ዴንዲዳፔ ጉዬ ዎጋ ጋላስ ዎንታ፥ ላፑን ቱና ኣያናታ ኬሲዳ ማግዴላ ማይራሚስ ኮይሮቲዲ ቤንቲስ። 10 ኢያ ባዳ ካሴ ኢያራ ዴዔይሳታስ፥ ኤንቲ ኣዛኒሼኔ ዬኪሼ ዴዒሺን ኦዳሱ። 11 ሺን ዬሱሲ ፓፃ ዴዔይሳኔ ኢው ቤንቲዳይሳ ኤንቲ ሲዒዳ ዎዴ ኢያ ጌይሳ ኣማኒቦኮና።
ዬሱሲ ናምዑ ባ ታማሬታስ ቤንቲስ
(ሉቃ 24፡13-35)
12 ሄሳፌ ጉዬ፥ ኤንታፌ ናምዓቲ ካታማፔ ኬዪዲ ቢሺን፥ ኦጌ ቦላ ዬሱሲ ካሴይሳፌ ዱማቲዲ ኤንታው ቤንቲስ። 13 ኤንቲ ጉዬ ሲሚዲ፥ ሃራታስ ኦዲዶሶና፥ ሺን ሃራቲካ ኤንታ ኦዳ ቱማ ጊቦኮና።
ዬሱሲ ታማኔ ኢሲ ባ ታማሬታስ ቤንቲስ
(ማቶ 28፡16-20፤ ሉቃ 24፡36-49፤ ዮሃ 20፡19-23፤ ሃ.ኦ 1፡6-8)
14 ጉዬፔ ታማኔ ኢሲ ኢያ ታማሬቲ ካꬂ ሚሺን፥ ዬሱሲ ኤንታው ቤንቲስ። ኤንታው ኣማኖይ ባይና ጊሾኔ ሃይቆፔ ኢ ዴንዲዳይሳ ቤዒዳ ኣሳይ ኦዲን ኤንቲ ኣማኖና ኢፂዳ ጊሾ ኢ ኤንታ ቦሪስ።
15 ኢ ኤንታኮ፥ «ቢታ ኡባ ቢዲ ኣሳ ኡባስ ዎንጌላ ኦዲቴ። + 16 ኣማኔይኔ ፃማቄቴይ ኣታና፥ ሺን ኣማኖናይ ፒርዴታና። 17 ኣማኔይሳታስ ሃ ማላታቲ ኢሜታና። ኤንቲ ታ ሱንꬃን ቱና ኣያናታ ኬሳና፥ ኦራꬃ ዶናን ኦዴታና። 18 ኤንቲ ሾሹ ኦይኪኮካ ዎይኮ ዎꬊያባ ኡዪኮካ ኤንታ ቆሄና። ቃሲ ኤንቲ ባንታ ኩሺያ ሃርጋንቾታ ቦላ ዎꬂዲ ኤንታ ፓꬃና» ያጊስ።
ዬሱሲ ፑዴ ሳሎ ኬዪስ
(ሉቃ 24፡50-53፤ ሃ.ኦ 1፡9-11)
19 ጎዳይ ዬሱሲ ታማሬታራ ኦዴቲዳፔ ጉዬ ፑዴ ሳሎ ኬዪስ፤ ፆሳፌ ኡሻቻ ባጋራ ኡቲስ። + 20 ኢያ ታማሬቲ ቢዳሶ ኡባን ቃላ ኦዲዶሶና። ጎዳይካ ኤንታራ ኢሲፌ ኦꬄስ። ኤንቲ ኦዲያ ቃላይ ቱማ ጊዲዳይሳ ፆሳይ ኤንታው ኢሚያ ማላታታን ኤሪሲስ።
+ 16:7 ማቶ 26፡32፤ ማር 14፡28 * 16:8 ኢሲ ኢሲ ቤኒ ማፃፋቲ ማርቆሳ ዎንጌላ ፓይዶ 8 ቦላ ኤሶሶና። ቃሲ ኢሲ ኢሲ ማፃፋቲ ፓይዶ 9-20 ጋካናው ዴዒያ ቆፋ ጉጆኮና። ጊዶሺን፥ ፓይዶ 8 ካሊዲ ዴዒያ ጉጆሶና። ሄሲካ [ማጫሳቲ ቢዲ፥ ኪታንቾይ ኦዲዳባ ኡባ ጴፂሮሳሲኔ ኢያራ ዴዔይሳታስ ቃንꬃን ኦዲዶሶና። ሄሳፌ ጉዬ፥ ዬሱሲ ባ ታማሬታ ጌሺኔ ሜሪና ኣቶቴꬃ ዎንጌላ ኪታ ዶሎሃፔ ዉሎሃ ጋካናው ኪቲስ።] + 16:15 ሃ.ኦ 1፡8 + 16:19 ሃ.ኦ 1፡9