11
Ama Lamtua Allah dalen nahi nol atuil Israel las
1 Tiata, auk le keket elia: bet mi nangan noan, “Undeng atuil Israel las dai hii-ming se Ama Lamtua Allah lo, tiata Un hutun soleng oen son.” Ela le? Loo! Ta auk kon daid deng one! Auk niam deng ngaal Benyamin. Benyamin ama ka, Yakob. Benyamin upu ka ngala Isak. Isak ama ka ngala Abraham, un nam mo, totoang atuil Israel las upu kia-kaon.
2 Ama Lamtua Allah hutun soleng net Un atulin nas lo. Oen nam, man Un tanas meman son deng lolo hmunan nua. Mi nangan net asa man dulan ne Ama Lamtua Buk Niu ka deng upung Elia ka nabale le? Un bisat se Ama Lamtua deng atuil Israel las, kon un nodan le Ama Lamtua hukung one,
3 noan,
“Lamtua! Atuil nias keo tele mee-baah man,
Lamtua in bel maa ngas.
Oen kon sukun didaan mija in tunu-dadung
se maan atuli las in todan-lahing Lamtua ka.
Deng Ama Lamtua mee-baha las totoang,
suma auk siing man nuling nabale.
Mo oen kon nuting lalan pait,
le noan keo tele au!”
4 Mo Ama Lamtua siut elia: “Ku in teka ka kula! Ta Auk atulin man in todan-lahing Au ngas, muik lihu iut nabale. Oen tahang mumuun, le hui-langus se Baꞌal lo!”
5-6 Halas ni ela kon. Ta totoang atuil Yahudi las bali kudi Ama Lamtua Allah lo. Muik atuli bubuit deng kami lia, man Ama Lamtua hulis meman son, le beles boa-blingin, na undeng Un le tulu Un dalen banan na bel kami, molam undeng kaim in daek dais banan na lo! Ta eta Ama Lamtua musti huil kami, undeng kaim in daek dais banan na lam, nahin na noan, ‘Un in tulu Un dalen banan na’ bel kami ka, muik nahin pait lo son.
7 Tiata in puis sa elia: muik atuil Yahudi mamo nuti-nuting le Ama Lamtua Allah tulu Un dalen banan na bel one, le halin oen kon haup in babanan nol Una. Mo haup tatahan lo, undeng oen dalen nas didi nol dai hii-ming se Un lo. Mo atuil Yahudi deeh haup in babanan nol Ama Lamtua, undeng Un huil oen meman son.
8 Ne Ama Lamtua Buk Niu ka muik dulan noan,
“Ama Lamtua kuim oen matan nas
le ngat net lo,
hngilan nas le ming nal lo,
nol kutan nas el hini ka, le oen nangan taan lo.
Tiata, oen nangan taan in toma ka lo,
maa lius leol neot nia.”
9 Laih Daud kon dul deng bangsa Yahudi las ne Buk Niu ka noan,
“Nang le oen tao fesat se oen mija las esan.
Ta oen fesat tas esan man kiu nahu bali one,
lole oen nangan noan, totoang banan son.
Nol oen hmukin nas esan man tao oen le tunun.
10 Nang le oen matan nas tedos,
le oen ngat net saa deken!
Nang le oen lepa-haal ngele napiut,
le halin oen blepon seen nas hkait taplaeng!”
Ama Lamtua le bel boa-blingin atuil Yahudi lo kas kon
11 Tiata, auk le ketan elia: taon elol le atuil Yahudi las tunun nia? Oen nahis son ne? Loo! Mo undeng oen dai hii-ming se Ama Lamtua Allah lo, nol dai parsai se Kristus lo, na sai lalan bel atuil Yahudi lo kas, le haup boa-blingin deng oen in kula-sala ngas. Nol Ama Lamtua sai lalan ela, undeng Un in koma ka le atuil Yahudi las idus, le pait maas muid se Una.
12 Langa son noan, atuil Yahudi las kaliut asa man in toma ka. Undeng na le, atuil didang deng papmes apan-kloma ki, nataka taan Ama Lamtua dalen banan na. Tiata atuil Yahudi las rugi tene isi. Nol na man tao atuil Yahudi lo kas le haup ontong tene. Mo nesang-nesang, le eta totoang atuil Yahudi las kon babanan pait nol Ama Lamtua lam, na banan dui pait!
13 Auk le tek mi atuil Yahudi lo kas elia: Ama Lamtua nutus auk son le maa tek mi atuil Yahudi lo kias deng Un Dehet Dais Banan na. Undeng na le, auk dil tingan halin lako-daek os in banan isi nia.
14 Ta eta auk lako-daek os ni nol babanan nam, tamlom mo auk tao atuil Yahudi lias idus, didiin teng deng one la daek muid Ama Lamtua in koma ka, le haup boa-blingin deng oen in kula-sala ngas sa.
15 Dedeng Ama Lamtua hutun soleng Un atulin Yahudi las sa, na sai lalan le atuil Yahudi lo kas haup dola, halin tamas daid Ama Lamtua atulin. Mo mam eta atuil Yahudi las babanan pait nol Ama Lamtua lam, na banan dui. Ta na banansila el oen nulis pait son deng oen in mate ka!
16 Kat kleta deng atuli in le daek ruti. Eta un kat uut bubuit deng ruti na le belen se Ama Lamtua lam, mam ruti na totoang kon daid Un nena man niu. Nol eta atuli bel kai ina mes klaput tamlom isin le daid in bele deng un klapa la, bel Ama Lamtua lam, mam kai ina na tetema kon daid Un nena man niu.
17 Auk le sukat bangsa Yahudi li nol kai saitun ina mesa, man nuli se klapa dalen. Ama Lamtua Allah dait soleng kai na bango deeh son. Mo mi man Yahudi lo kias, banansila el kai saitun alas. Hidim Ama Lamtua dait nal bango dehe, le tapan laok se kai ina in se klapa la dalen na ka. Nini ela lam, bango deng kai ina in se likun na ka, sium in nuli deng kai in se klapa dalen na ka. Na banansila el mi man Yahudi lo kias kon sium nal Ama Lamtua dalen banan na, man Un le belen laok se Un atulin Yahudi las.
18 Mo doha-doha loo! Koaok le nangan noan mi in daid kai bango deng likun nua ngas, banan dui deng bango man Ama Lamtua in dait soleng son nas deken! Ta eta mi le nikit mi apan nas sam, nadidingun deken, ta mi suma bango tukun! Mi man tao kuat kai ina na lo. Molam klaput ta man tao kai ina na le daid kuat!
19 Bet mi le aa noan, “Ama Lamtua dait soleng bango deng kai ina man in nuli ne Un klapa dalen na, halin Un tapan kaim lakong se lang lolen, le seda bango blaan nas.”
20 Na toma. Mo nadidingun deken, ta Ama Lamtua dait soleng bangong nas son, undeng oen parsai se Kristus lo. Nol mi seda one, undeng mi parsai se Kristus. Tiata koaok deken! Banan dui ka, mi doha-doh tuun, nol tao dahu-dahut deken!
21 Ta atuil Yahudi las banansila el bango esa ka, man nupu muna. Mo Ama Lamtua nang le oen tahang nesang se na lo. Tiata, eta mi parsai napiut se Un lo kam, mi nangan noan Un nang mi le tahang napiut se na deken. Ta ela lo!
22 Tiata, mi musti nangan babanan le. Ta Ama Lamtua nam dalen banan. Mo Un bel hukung ngam kon ngele. Mam Un bel hukung atuil in nahi son, man babanan nol Un lo ngas. Mo taung atuil Yahudi lo kas, Ama Lamtua tulu Un dalen banan na bel mia, sadi mi butu-kil napiut nol Una, nol nang le Un daek asa man banan na bel mia. Mo eta mi nang le Un tao bel mi ela lo kam, Un kon le dait soleng mi deng Un kai ina ka.
23 Ela kon nol atuil Yahudi las. Eta oen sabail apan le parsai se Kristus sam, mam Ama Lamtua tapan oen pait lakos se kai ina esa ka. Undeng Un muik kuasa le daek nal ela!
24 Ta mi atuil Yahudi lo kas, banansila el bango deng kai saitun alas, man hmunan nu nuli dadahut se klapa likun na. Mo Ama Lamtua huil nal mi son, le tapan mi lakom se kai saitun ina banan, man Un mulan ne Un klapa la ka. Nang le kai alas sas siis kisa, nol kai in ne klapa la ngas kisa. Ta eta atuil Yahudi lo ngas haup in daid ela kam, salolen nol atuil Yahudi las sa. Oen muun dui pait, eta Ama Lamtua tapan oen pait lakos se oen kai ina esa ka.
Mam atuil Yahudi las babanan pait nol Ama Lamtua
25 Kaka-pail in se Roma me! Mi musti nangan taan dais nia, man hmunan nu daid dais in buni. Ta eta mi nangan tanan son nam, mi koaok noan mi atuil in tana deken. Ta elia: halas ni atuil Yahudi deeh dalen didi, le dai parsai se Kristus lo. Mo mam oen tao ela napiut lo. Ta eta totoang atuil Yahudi lo man Ama Lamtua hulis son nas parsai se Kristus sam, mam atuil Yahudi las kon parsai se Una.
26 Tiata, eta oras na maa lius son nam, mam Ama Lamtua bel boa-blingin totoang atuil Yahudi las, deng oen in kula-sala ngas. Na banansila el in dul son ne Buk Niu ka noan,
“Mam muik Atuling mes maa,
man bel boa-blingin kit deng in daat tas.
Un maa deng leten Sion, ne kota Yerusalem.
Mam Un man tao Yakob in hua-koet tas le oen pesang deng oen in kula-sala ngas.
Ta oen in nuli ka dai toe muid Auk lo,
nol oen bali kudi Auk lalan in nuil toma ka son.
27 Auk le kose soleng oen in kula-sala ngas.
Ta Auk butu-kil in hida nol oen ela son.”
28 Taom eta atuil Yahudi las ming Kristus Dehet Dais Banan na lam, oen tao apan nas el musu ka le labang nol Una. Nini ela lam, oen bel mi atuil Yahudi lo kas dola! Ela kon no, Ama Lamtua namnau oen nabale, undeng Un namnau oen upu kia-kaon nas, nol huil nal oen son le daid Un atulin.
29 Ta eta Ama Lamtua bel sa-saa mes son nam, Un kat pait lo ka. Nol eta Un tek atuli li son noan, “Maa le muid Au! Maa le tamam daid Auk atulin tia!” Lam, Un nulut soleng oen pait lo ka.
30 Hmunan nu, mi man atuil Yahudi lo kas dai hii-ming se Ama Lamtua lo. Mo halas nia, mi man sium Ama Lamtua in namnau ka, undeng atuil Yahudi las dai hii-ming se Un lo.
31 Tiata one, man halas ni dai tao muid Ama Lamtua in koma ka lo. Undeng na le, Ama Lamtua tulu Un dalen in namnau ka bel mi nabale. Nol mam Un kon le namnau oen pait.
32 Halas ni Ama Lamtua ngat atuil Yahudi las nol atuil Yahudi lo kas, hnika mes sii. Lole oen totoang tao muid Un in koma ka lo, banansila el oen ne bui dalen, man taan lalan in puti lo. Un nang le daid ela, halin Un tulu bel totoang atuli li Un dalen in namnau ka.
Ama Lamtua nam, banan isi!
33 Ama Lamtua Allah taan isi!
Nol Un nini Un in tana ka le daek sa-saa banan.
Muik atuli mes lo kon, man taan Un nol baktetebes.
Muik atuli mes lo kon, man taan baktetebes deng Un in nutus dasi ka.
Muik atuli mes lo kon man nangan taan
Ama Lamtua in dake ka.
34 Muik atuli mes lo kon, man taan baktetebes kit Lamtuan na in nangan na.
Muik atuli mes lo kon, man bel in tui-tikang bel Una.
35 Muik atuli mes lo kon man bel nal Ama Lamtua sa-saa mes nol mosa-mosa,
hidim dising Ama Lamtua le Un bel seda pait lo!
36 Ta totoang nas maas deng Ama Lamtua Allah!
Totoang dadi, undeng Una!
Totoang man kit in tao ngas,
kit daek bel Una.
Kit nikit in naka-naka bel Una,
didiin hidi nutus taan lo!
Baktebes ela!