15
Nga fiu enselo fe'enia nga fiu kwa'ikwa'inga 'i'isi
1 Mai nau ku agasia la'u nga maa'e tooto ba'ita 'ubulana lalo, ma nau ku 'alefo 'ania 'e iiki. Nau ku agasia nga fiu enselo fe'enia nga fiu kwa'ikwa'inga 'i'isi. Nga fiu kwa'ikwa'inga no'ona na fa'asuilana nga ogarianga na God fana ta'a na gila abulo 'e ria.
2 Mai nau ku agasia te'e 'ola ta'ua nga asi ne'e aga 'e 'ilaka'u nga ilanunu na'a gila dolaa fe'enia nga eele. Ma nau ku agasia la'u mola nga ta'a na gila talariufia nga 'ola momoori kwasila, ma nununa, ma nga namba na latana. Gila ula 'i nigifana asi no'ona, ma gila ka dau na 'ola na gila fa'alataa 'ania nga hap na God 'e kwatea faga.
3 Ma gila ka nguria nga me'e nguu ala Moses, nga wane ni taunga'inga na God, ma nga me'e nguu na dale'e Sifisifi, ma gila ka 'ilo'oo,
“God 'i'oo tegela'a 'e iiki,
nga taunga'inga amu te'efou 'e ba'ita
ma ka le'a 'e iiki.
'I'oo na nga alafa na fanua lo'oo te'efou,
ma nga falafala amu 'e odo ma ka kwala'imori.
4 Alafa te'io no'o na 'i'oo abu.
Nga ta'a te'efou tagila iiri ba'ita amu,
ma tagila lafua latamu 'i langi.
Suria te'io no'o na 'i'oo odo kwala'imori.
Ma ta'a te'efou na fanua ba'ita fofona fanua lo'oo 'i wado
tagila leka mai fana fa'aba'italamu,
tofuna 'i'oo faate'enia no'o nga falafala lo'oo amu 'e odo.”
5 Ma burina, nau ku agasia nga Babala Abu na God 'i langi 'e 'ulasi.
6 Ma nga fiu enselo lo'oo gila ka ru'u mai fa'asia nga Babala Abu na God fe'enia nga fiu kwa'ikwa'inga lo'oo. Gila ru'ufia nga ruu kwakwao'a ne'e fooru ma ka iloilo'a, ma gila ka ru'ufia la'u nga fo'osae na gol 'i fu'ufu'uga.
7 Ma te'e 'ola na fai 'ola momoori laka'u ka kwatea fana nga fiu enselo lo'oo nga fiu kakao na gol ne'e fongu 'ania nga ogarianga na God na ngaia 'e momoori firi.
8 Ma nga daa fa'asia nga kwangakwanganga na God ma fa'asia tegelangaa aana ka fonguria 'ubulana Babala Abu na God, ma te'efuta wane ka 'ame to'omia no'o fana ru'unga 'ubulana Babala Abu no'ona, leleka maka nigi na alata na fiu kwa'ikwa'inga na fiu enselo no'ona gila ngaria mai 'e sui.