18
God 'e malangadaa fanua ba'ita 'i Babilon
1 'I burina, nau ku agasia nga enselo ngaa'i lau ngaia 'e sifo mai fa'asia 'i langi. Ma ngaia 'e to'o na nga tegelangaa ba'ita, ma nga lalalana 'e lala 'afuia nga fanua lo'oo 'i wado te'efou.
2 Ma ngaia ka o'omae maka 'ilo'oo,
“Ngaia 'e fusi no'o!
Nga fanua ba'ita laka'u 'i Babilon 'e fusi no'o!
Ngaia ka arua no'o nga fanua fana nga anoe 'ola lo'oo.
Ma nga anoe 'ola ria ma nga langasi 'e ria, gila nana'i no'o 'i 'ubulai.
3 Nga ta'a na ni fanua ba'ita te'efou na fanua lo'oo 'i wado, gila 'ilaka'u gila go'uringega no'o tofuna gila leka suria nga falafala 'e ria lo'oo aana fana agemaninga fe'enia te'efuta ai.
Nga ta'a ba'ita na fanua lo'oo 'i wado gila agemani la'u mola fe'enia.
Ma nga ta'a na gila fori 'ola ma gila fa'afori 'ania 'ola
tagila 'ola'a 'e iiki suria falafala lo'oo aana na sirilana toto'oni 'ola te'efou.”
4 Mai nau ku longoa la'u te'e kwale'e 'ola fa'asia 'i langi ne'e fata 'ilo'oo,
“Ta'a ala God,
moru leka mai fa'asia fanua 'i Babilon fa'asia moru ta lado fe'enia rianga ana, ma fa'asia moru ta ngaria nga kwa'ikwa'inga ana.
5 Suria nga rianga na ta'a 'i Babilon 'e fane 'e tooto'o no'o fe'enia 'i langi,
ma God ngaia 'ame mabolosia nga rianga aga.
6 'Ino'ona ma alata mooru moru lamadu'aa fana,
moru agea rua alata na 'ola na ngaia 'e agea famooru.
Nga ma'e teteu na 'ola 'e ria laka'u ngaia 'e kwatea famooru, moru launge'enia nga rua alata na tegelalai.
Sui ma moru ka kwatea fana.
7 Mooru kwatea nga nonifiinga fana 'i Babilon, 'ani to'omia la'u mola nga 'inato'onga ana ma nga nana'i le'anga lo'oo 'i Babilon 'e kwatea fana 'i talana.
Suria nga ta'a 'i Babilon gila fata 'ilo'oo faga 'i talaga,
‘Goru ba'ita fafia ta'a lo'oo te'efou 'ani 'ilaka'u nga noni alafa aga!
Ma goru 'ame 'ilaka'u nga me'e nao galafa'a,
ma goru 'ame su'asuria te'efuta kwaimanadainga.’
8 Ngaia na'a God te'e kwa'iga 'ania nga fifiinga,
ma nga kwaimanadainga,
ma nga molo'ungaa.
Ma nga eele te'e nulafiga,
tofuna na God ne'e tegela'a 'e iiki,
ngaia te'e sufaaga.”
9 Ma nga ta'a ba'ita fa'asia fofona fanua lo'oo 'i wado na gila agemani fe'enia 'i Babilon, ma gila ka lado fe'enia nga 'ola'angaa aana, tagila aani fe'enia nga fanua no'ona alata gila agasia nga daalana eele lo'oo ne'e do'ofia.
10 Ma gila tagila ula lalau suria gila ma'u fa'asia gila ta nonifii 'ilaka'u la'u mola 'i ngaia. Ma tagila fata 'ilo'oo,
“Ngaia te'e ria ba'ita famu 'i Babilon,
nga fanua ba'ita ma fanua 'inato'o!
Nga kwa'ikwa'inga amu,
'e nigi no'o mai fafi'o.”
11 Aia, ma nga ta'a na gila foria 'ola ma 'agila fa'afori fofona fanua lo'oo 'i wado, tagila aani ma tagila kwaimanadai fana 'i Babilon, suria te'efuta wane 'e sia foria la'u nga 'ola lo'oo aga.
12 Suria te'efuta wane 'e sia foria la'u nga gol lo'oo aaga, ma nga silva lo'oo aaga, ma nga fou iloilo'a lo'oo aaga, ma nga 'ola forilai 'e ba'ita, ma nga ruu kwangakwanga'a lo'oo na forilaga 'e ba'ita, ma nga aefori, ma nga 'ai lo'oo forilai 'e ba'ita, ma ni 'ola gila launge'enia 'ania 'ai forilai 'e ba'ita, ma nga barasi, ma nga aeon lo'oo ma nga mabol lo'oo forilai 'e ba'ita,
13 ma nga fangalaa le'a lo'oo, ma nga 'ola si'ini le'a lo'oo na forilai 'e ba'ita. Ma te'efuta wane 'ame foria no'o nga waeni lo'oo aaga, ma nga waiwai lo'oo aaga, ma nga 'ola lo'oo aaga fana launge'enilana nga beret, ma nga buruka lo'oo aaga, ma nga sifisifi lo'oo aaga, ma nga hos lo'oo aaga, ma nga 'ola na nga hos lo'oo gila talaa, ma nga ta'a ni taunga'inga tago lo'oo.
14 Ma nga ta'a na gila fori 'ola ma gila fa'afori lo'oo, gila ka fata 'ilo'oo fana 'i Babilon,
“Nga 'ola le'a te'efou na 'i'oo siria na 'i'oo to'o ai,
gila 'amoe no'o fa'asi'o.
Ma nga 'ola'angaa lo'oo amu te'efou ma nga 'ola iloilo'a lo'oo amu ngaia te'e fusi la'u mola,
ma ka 'ato no'o fana 'i'oo 'ani agasia la'u.”
15 Ma nga ta'a na gila fori 'ola ma gila fa'afori lo'oo, na gila to'o na 'ola'angaa fa'asia 'i Babilon, gila tagila ula lalau suria gila ma'u fa'asia gila ta ngaria la'u mola nga nonifiinga ana. Ma gila tagila aani ma tagila kwaimanadai.
16 Ma tagila aani ma gila fata 'ilo'oo,
“Ngaia 'e ria 'e ba'ita,
suria nga ta'a na fanua ba'ita laka'u gila ru'ufia nga ruu le'a lo'oo na forilai 'e ba'ita, ma gila to'o na 'ola iloilo'a lo'oo na forilani 'e ba'ita.
17 Aia, na alata sisika lo'oo 'ola'angaa aana 'e sui no'o fa'asia.”
Nga ta'a ba'ita lo'oo te'efou na faka, ma nga ta'a na gila leka 'ubulana faka, ma nga ta'a na gila taunga'i 'ubulana nga faka lo'oo, ma nga ta'a lo'oo te'efou na gila taunga'i 'ubulana asi, gila ula lalau no'o.
18 Ma gila ka o'omae alata gila agasia nga daalana nga eele 'e nulafia 'i Babilon, ma gila ka 'ilo'oo, eta mai na eteetanga, te'efuta fanua ba'ita ngaa'i la'u 'e 'ame 'ilaka'u nga fanua ba'ita lo'oo
19 Ma gila ka bunia nga gouga 'ania makola, ma gila ka aani ma gila ka kwaimanadai ma gila ka fata 'ilo'oo,
“Ngaia 'e ria 'e iiki fana nga fanua ba'ita lo'oo.
Nga ta'a lo'oo te'efou na gila to'o na faka lo'oo,
gila 'ola'a 'ania nga 'ola'angaa 'i Babilon.
Na alata sisika mola 'ola lo'oo aana te'efou te'e sui no'o fa'asia.”
20 Mai moru nga ta'a 'i langi lo'oo, tamoru aile'a, suria 'i Babilon 'e fusi no'o. Ma nga ta'a na God, ma nga ta'a ni kwairiinga, ma nga profet lo'oo, tamoru aile'a suria God 'e sufaa no'o tofuna 'ola 'e ria na ngaia 'e agea famooru.
21 Ma te'e enselo tegela'a ka ngaria nga fou ba'ita ma ka 'ui 'ania 'ubulana asi, ma ka fata 'ilo'oo,
“Tagila 'ui 'ani'o, nga fanua ba'ita lo'oo 'i Babilon 'ubulana asi, fana te'efuta wane 'e sia agasi'o la'u.
22 Ma ka 'ato no'o 'agila longoa la'u nga ringena nga hap lo'oo, ma ringena ngunga lo'oo, ma nga 'au, ma nga bungu lo'oo fa'asi'o.
Ma ka 'ato no'o fana te'efuta wane ni taunga'inga 'ani nana'i la'u fe'eni'o.
Ma gila sia longoa la'u ringena te'efuta launge'enilana nga fafangalaa fa'asi'o.
23 Ma te'efuta uunu 'e sia nula la'u amu.
Ma ka 'ato 'agila longoa la'u ringena te'efuta fafangalaa na fuageninga fa'asi'o.
'I na'o no'o mai, nga ta'a na gila fori 'ola ma 'agila fa'afori, gila ta'a ba'ita na fanua lo'oo 'i wado.
Suria nga kotonga lo'oo amu,
'i'oo kutaa nga ta'a lo'oo te'efou fofona fanua lo'oo 'i wado.
24 God 'e kwatea no'o kwa'ikwa'inga fana nga ta'a 'i Babilon,
suria na gila laka'u gila kwa'ia nga profet,
ma nga ta'a na God,
ma tani ta'a 'e aula ngaa'i la'u na gila kwa'iga fofona fanua lo'oo 'i wado.”