3
योहान बपतीस्मा केरनारान हिकवोण
(मत्ती 1:1-12; मरकुस 1:1-8; योहान 1:19-28)
1 तिबिरीयुस रोमान राजाह राज केरने पोंदरा वोरह्या एताला, तेवी पुन्तियुस पिलातुस यहुदियान आदिकारी ईतो। एने ती टेम माय हेरोदेस राजा गेलील देसाम राज केरतालो। एने तान बाहख फिलीपुस, इतुरेया त्रखोनितीस देसाम राज केरतालो, एने अबील देसाम लिसानीयास राज केरतालो,
2 एने जेवी हन्ना एने केफा मुखी चाकऱ्या एता, ती टेम माय बोगवानान वचन उजाड़ी माय केफा चाकर्यान बेटाख योहान फाय पोचनो।
3 बपतीस्मा केरनार योहान यरदन नेदीन आरे मीरेन एद्दी माय जाईन पापान माफीन केरता पारचार किरो, “पासतावो किरो एने बपतीस्मा लिवो, ओवतो बोगवान तुमरा पापाह माफ केरी।”
4 जिहकेरीन यशाया जाणकारान पुस्तेक माय लिखेल हे:
“उजाड़ी माय एक जाण आयेड़ने बाजरिनोह काय बोगवानान वाट तियार किरो;
‘एने तान सेड़ेक हुतरी किरो!
5 खाडा बुजाय जाती,
एने बोयड़ा एक हारका एय जाती।
वाकालाह हुतरो केरी,
एने जो उचो नेचो हे तो चोवगान वाट बोणी।
6 एने देरतीन आखा माणहे बोगवानान सुटकाराह देखती!’ ”
7 तेवी जुलूम माणहे ता फाय बपतीस्मा लेणेन केरता आवा, तेवी योहान ताह केयो, “एय गेड़हान पिला! तुमूह कुण हिकाड़ देनोह काय बोगवानान उगे रेन आवणारा रागाह रेन सेटा नाहो?
8 तुमरा पापाम रेन मोनाह बुदलो काय हाजो फोल लावो, एने आप आपणा मोना माय ज्य मा सुचो काय आमु अब्राहाम ने गेराणान हेते, काहाकाय बोगवान न्या देगड़ाम रेन तान गेराणो उबो केर सिकेह।
9 एवी कुराड़ ते जाड़ान थुड़ा पोर मिलेल हे, तानकेरता जो जाड़ फोल नाह लावेत, तो काटाय एने आक्ठा माय टाकाय जाय।”
10 तेवी माणहे ताह फुशा, “ताहार आमु काय किरज्यो?”
11 योहान ताह केयो, “जा फाय दुय डेगला एती, ते जा फाय नाह सोता ताह एक आप दिवो, एने जा फाय खाणो एय, तो बी इहीचकेरीन केरी।”
12 थोड़ाक फालो उकालनारे एता, ता बी योहान फाय बपतीस्मा लेणेन केरता आवा, एने ता योहानाह फुशा, “आमु काय किरज्यो?”
13 योहान ताह केयो, “जोलो फालो ठेरायेल हे तोलोच मांगज्यो ताह रेन वोदार मा मांगहो।”
14 एने थोड़ाक सिपायड़ा बी योहानाह फुशा, “आमु काय किरज्यो?” योहान ताह केयो, “कुणीह तेकलीत मा दिहो, एने जुठो गुनो मा लागाड़हो, एने तुमरी मोंजरी मायच निरहा रिवो।”
15 माणहे मसी आवी केरीन वाट जोवताला, “ता योहानाह ज्योच मसी एय, इहकेरीन विचार केरने बाज गीया।”
16 केरीन योहान ताह केयो, “मी तुमूह पाण्या केरीन बपतीस्मा केरथु, पुण जो मार पासाण आवण्यो हे, तो माहु रेन जादा ताकेतवालो हे, मारी ते तान खाहड़ान दोयड़ी सोड़नेन वोर लायकी नाय मीले, तो तुमूह चोखालो जीव एने आक्ठा केरीन बपतीस्मा आपी।
17 तान हुपड़ो तान आथा माय हे, एने तान खोलाह हास केरीन साप केरी, एने गोवाह तान मोटक्या माय टुलो केरी, पुण बुहटाह ता आक्ठा माय हेलगाड़ देय, जो जेलेम ओलाय नाय।”
18 इहीचकेरीन केरीन योहान जुलूम हिकवोण आपीन माणहाह हाजाली खुबेर होमलावते रिनो।
19 हेरोदेस राजा तान आतल्या बायाख ने लाडी हेरोदियाह राखीन जुलूम खाराब काम किरेल ईतो, एने दिहरा खाराब काम बी तो केरतालो, ता पोर गुनो लागाड्यो।
20 तेवी हेरोदेस योहानाह जेली माय कोंडाड़ दिनो, इहकेरीन हेरोदेस उंजु जुलूम खाराब काम किऱ्यो।
यीशु बपतीस्मा लिदो
(मत्ती 3:13-17; मरकुस 1:9-11)
21 जेवी आखा माणहे बपतीस्मा लेदा, तेवी यीशु बी बपतीस्मा लेन विन्ता केरने बाज गीयो, तुलबूखे हेरोग उगड़ी गीयो।
22 एने चोखालो जीव पेरवान गेत यीशु पोर उतेरनो, एने हेरगा माय रेन ज्यो आवाज होमलानो, “तु मारो मोंगाल्लो बिटोख हे, मी तार पोर जुलूम खुस हे।”
यीशुन बाप दादा
(मत्ती 1:1-17)
23 जेवी यीशु सोता हिकाड़ने बाज गीयो, तेवी तो तीस वोरह्यान ईतो, माणहे ताह युसूफान बिटोख सोमेजताला, एने युसूफ एलीन बिटोख ईतो।
24 एली मत्तात ने बिटोख ईतो, मत्तान लेवीन बिटोख ईतो, लेवी मलकीन बिटोख ईतो, मलकी यन्नान बिटोख ईतो, यन्ना युसूफ ने बिटोख ईतो,
25 युसूफ मत्तीत्यान बिटोख ईतो, मत्तीत्या आमोस ने बिटोख ईतो, आमोस नहुम ने बिटोख ईतो, नहुम असल्यान बिटोख ईतो, असल्या नोगह ने बिटोख ईतो।
26 नोगह मात ने बिटोख ईतो, मात मत्तीत्यान बिटोख ईतो, मत्तीत्या शिमीन बिटोख ईतो, शिमी योसेख ने बिटोख ईतो, योसेख योदान बिटोख ईतो,
27 योदाह योहानान बिटोख ईतो, योहान रेसान बिटोख ईतो, रेसा जरूबाबेल ने बिटोख ईतो, जरूबाबेल शालतीएल ने बिटोख ईतो, शालतीएल नेरीन बिटोख ईतो।
28 नेरी मलकीन बिटोख ईतो, मलकी अद्दीन बिटोख ईतो, अद्दी कोसाम ने बिटोख ईतो, कोसाम ईलमोदाम ने बिटोख ईतो, ईलमोदाम एर ने बिटोख ईतो,
29 एर येशुन बिटोख ईतो, येशु एलियाजरान बिटोख ईतो, एलियाजर योरीम ने बिटोख ईतो, योरीम मत्तात ने बिटोख एने मत्तान लेवीन बिटोख ईतो,
30 मत्तात लेवीन बिटोख ईतो, लेवी शिमीयोन ने बिटोख ईतो, शिमीयोन यहुदान बिटोख ईतो, यहुदा युसूफ ने बिटोख ईतो, युसूफ योनान बिटोख ईतो, योना ईलयाकीम ने बिटोख ईतो,
31 ईलयाकीम मलेआन ने बिटोख ईतो, मलेआन मीन्नान बिटोख ईतो, मीन्ना मत्तान ने बिटोख ईतो, मत्तान नातान ने बिटोख ईतो, नातान दाऊदान बिटोख ईतो,
32 दाऊद यीशेन बिटोख ईतो, यीसे ओबेद ने बिटोख ईतो, ओबेद बोआज ने बिटोख ईतो, बोआज ने बिटोख ईतो, बोआज सलमोन ने बिटोख ईतो, सलमोन नहशोन ने बिटोख ईतो,
33 नहशोन अम्मीनादाब ने बिटोख ईतो, अम्मीनादाब अरनीन बिटोख ईतो अरनी हिसरोन ने बिटोख ईतो, हिसरोन फिरीस ने बिटोख ईतो, फिरीस यहुदान बिटोख ईतो,
34 यहुदा याकुबान बिटोख ईतो, याकुब इसहाक ने बिटोख ईतो, इसहाक अब्राहाम ने बिटोख ईतो, अब्राहाम तेरह ने बिटोख ईतो, तेरह नाहोर ने बिटोख ईतो,
35 नाहोर सरुग ने बिटोख ईतो, सरुग रऊ ने बिटोख ईतो, रऊ फिलीग ने बिटोख ईतो, फिलीग एबीर ने बिटोख ईतो, एबीर शिलह ने बिटोख ईतो,
36 शिलह केनान ने बिटोख ईतो, केनान अरफक्सद ने बिटोख ईतो, अरफक्सद शेम ने बिटोख ईतो, शेम नुह ने बिटोख ईतो, नुह लेमेक ने बिटोख ईतो,
37 लेमेक मथुशीलह ने बिटोख ईतो, मथुशीलह हनोक ने बिटोख ईतो, हनोक यिरीद ने बिटोख ईतो, यिरीद महेलेल ने बिटोख ईतो, महेलेल केनान ने बिटोख ईतो, महेलेल एनोश ने बिटोख ईतो,
38 एनोश शेत ने बिटोख ईतो, शेत आदम ने बिटोख ईतो, एने आदमाह बोगवान बाणायेल ईतो।