4
यीशुन पारेख
(मत्ती 4:1-11; मरकुस 1:12-13)
1 यीशु चोखाला जीवा माय बोरायीन यरदन नेदी माय रेन पुशो आवो, तेवी चोखालो जीव ताह उजाड़ी माय ली गीयो।
2 एने सैतान चालीह दिह वोर यीशुन पारेख किरते रिनो। यीशु ता दिह्याम बिगेर खाईल रिनो, एने जेवी ता दिह पुरा एय गीया, तेवी ताह बुख लागी।
3 तेवी सैतान यीशुन आहने आवो एने केयो, “केदी तु बोगवानान बिटोख एय, ते ज्या देगड़ाह किय दे काय रूटो बोण जाय।”
4 पुण यीशु ताह जापाप आप्यो, “वचन माय इहकेरीन लेख मीलेल हे, ‘माणुह रोटा केरीन ओलोस नाह, पुण एकेक वचन जो बोगवानान मुयाम रेन निकलेह, जीवतालो रेय।’ ”
5 ओवतो सैतान यीशुह उचाच बोयड़ा पोर ली गीयो, एकुच ताल दुनियान आखो राज देखाड्यो।
6 एने सैतान यीशुह केयो, “ज्यो सोब आदिकार एने बोड़ाय तुवाह आप देह, काहाकाय ज्यो सोब माहु होप मीलेल हे, एने माहु पोटे ताह मी आप देथु।
7 केदी तु मारी बोक्ती किरहे ताहार मी ज्यो सोब तुवाह आप देह।”
8 तेवी यीशु ताह जापाप आप्यो, “वचन माय इहकेरीन लेख मीलेल हे, ‘तु तारा बोगवानान बोक्ती केर, एने तान ओलोच उपास केर।’ ”
9 तान पासाण सैतान यीशुह यरूशलेम हेयरा माय ली गीयो, एने ता सैतान यीशुह मोंदिरान चुटा पोर उबराखीन केयो, “केदी तु बोगवानान बिटोख एय ते न्या रेन बुंदे कुदजा।
10 काहाकाय वचन माय इहकेरीन लेख मीलेल हे, ‘बोगवान तान हेरोगदुताह तुवाह वोचाड़नेन केरता उकुम आपी।
11 एने हेरोगदुत तुवाह आथा माय उपेरूस विस लेती, केदी ओहलो नाय एय काय तारा पाया माय दिगोड़ नाय लागी।’ ”
12 पुण यीशु ताह केयो, “वचन माय इहकेरीन बी लेख मीलेल हे, ‘तु मालीक तारा बोगवानान पारेख मा किरहे।’ ”
13 जेवी सैतान सोब पारेख केरनेन बाद थोड़ीक टेम ने केरता यीशु हिऱ्यो रेन जात रिनो।
यीशुन गेलील माय सेवा कार्यान सुरवात
(मत्ती 4:12-17; मरकुस 1:14-15)
14 यीशु चोखाला जीवान ताकेत माय बोरायीन पुशो गेलील माय आवो, तेवी तान बाराम आरे मीरेन आखी एद्दी माय वात पोसरी गियी।
15 यीशु तान बोक्ती केरन्या गेरा माय हिकाड़ने बाज गीयो, ते आखा माणहे तान बोड़ाय केरने बाज गीया।
नासरत ने माणहे यीशुह नाकारतेह
(मत्ती 13:53-58; मरकुस 6:1-6)
16 ओवतो यीशु नासरत गावा माय आवो, जा तो मुठो ईयेल ईतो, यीशु तान आदेतीन गेत विहेवणेन दिह बोक्ती केरन्या गेरा माय गीयो, एने ता चोखाली पुस्तेक वाचणेन केरता उब रिनो।
17 यीशुह यशाया जाणकारान पुस्तेक आप्या, यीशु पुस्तेक उगाड़ीन जो लेख मीलेल एतो, तो निकालीन वाशो:
18 “मालीकान जीव माहु पोर हे,
काहाकाय तो गेरब्याह हाजाली खुबेर होमलाड़नेन केरता माहु निवाड़ेल हे।
एने माहु ज्यानकेरता मुकलेल हे, काय जेली माय कोंडायेल ताह सुटकारान गोसणा आपणे,
एने आंदलाह डोला आपणेन केरता हाजाली खोबरीन पारचार केरू,
एने जा चेदायेल हेते ताह सोड़वु
19 एने बोगवानान गीण ने नेजेरीन वोरह्यान गोसणा।”
20 वाचीन ओवतो यीशु पुस्तेक बोंद केरीन बोक्ती केरन्या गेरान चाकऱ्याह आपीन बोह गीयो, बोक्ती केरन्या गेराम आयेल सोब माणहान निगा यीशु पोर एती।
21 तेवी यीशु ताह केयो, “आजुच ज्य वचन तुमरे ओंगाण पुरो ईयेल हे।”
22 एने सोब माणहे तान बोड़ाय केऱ्या, एने तान मुयाम रेन निकलेल वातु होमलीन मोनाम मेल्या एने केया, “काय ज्यो, युसूफान बिटोख नाह सुतो?”
23 यीशु ताह केयो, “माहु मालुम हे ज्यी किस्सो तुमू किहो, एय वोंसी पेल तुच हुदेर, एने कफरनहूम माय किरेल कामाह आमु होमलेल हेते तिहेच तारा गावा माय बी केर।”
24 पुण मी तुमूह खेरीच केथु, काल्ला बी बोगवानान जाणकाराह तान गावाम मान पान नाह जुड़ने।
25 मी तुमूह खेरीच केथु, “एलियान टेम माय साड़े तीन वोरह्या वोर पाणी नाह पोड़नो, एने आखा देसाम काल पुड़नो, ती टेम माय इस्राएल देसा माय जुलूम रांडायेल बायकु एत्यु।
26 तीबी बोगवान एलियाह इस्राएलान काल्ली बी रांडायेल बायकु फाय नाह मुकल्यो, पुण सेदा देसान सारपत गावान एक रांडायेल बायकु फाय ताह मुकलेल।”
27 तिहेच केरीन जाणकार एलीशान टेम माय इस्राएल देसा माय जुलूम कोढी एता तीबी सीरीया देसान नामान नावान कोढीह सोड़ीन कुणीह नाह हुदाऱ्यो।
28 ज्यी वातु होमेलताच बोक्ती केरन्या गेरा माय बोह रियेल आखा माणहे रागाम बोराय गीया।
29 तेवी ता उठीन यीशुह गावान बाहेर काड़ देना, एने जा बोयड़ा पोर तान गाव बोह रियेल एतो, तान खाटान उगे ली जाताला, काय ता पोर रेन ताह बुंदे टाक देहु,
30 पुण यीशु तान विची माय रेन निकलीन जात रिनो।
यीशु बुतड़ो लागेल माणहाह हुदारने
(मरकुस 1:21-28)
31 यीशु ता रेन निकलीन गेलील देसान कफरनहूम गावा माय आवो, एने विहेवणेन दिह माणहाह हिकाड़ने बाजरियेल ईतो।
32 माणहे यीशुन हिकवोणीह होमलीन बोंगलाय गीया, काहाकाय यीशु आदिकार माय वातु होमलाड़तालो।
33 बोक्ती केरन्या गेरा माय एक बुतड़ो लागेल माणुह एतो, तो जोरेस आयड़ीन इहकेरीन केणे बाज गीयो,
34 “एय यीशु नासरी! तुवाह आमु हेऱ्यो काय काम? काय तु आमुह खेतेम केरने आयेल हे? मी तुवाह ओलेखथु तु कुण हे: तु बोगवानान चोखालो एदमी हे!”
35 पुण यीशु ताह दोपकाड़ीन केयो, “ठावको रे, ज्या माणहा माय रेन निकेल जा!” तेवी बुतड़ो ता माणहाह ओंगाण आसटीन बिगेर नुकसान पोचाड़ीन ता माय रेन निकेल गीयो।
36 तेवी आखा माणहे बोंगलाय गीया, एने एका दिहराह केणे बाज गीया, “ज्यी कोहली वात हे! ज्यो आदिकार एने ताकेत माय बुतड़ाह उकुम आपेह एने ता निकली जातेह।”
37 ज्यान पासाण यीशुन बाराम वात आखी जागे पोसीर गियी।
यीशु जुलूम होवटा माणहाह हुदारने
(मत्ती 8:14-17; मरकुस 1:29-34)
38 ओवतो यीशु बोक्ती केरन्या गेरा माय रेन निकलीन शमोनान गेर गीयो, ता शमोनान हाहवोक हेरी माय दुखारी खाटला पोर लुट रियेल एती, तेवी ता तीह हुदारनेन केरता यीशुह केया।
39 यीशु खाटला हिऱ्यो उबरीन हेरीह उतेर जाणेन केरता उकुम आप्यो, तेवी तीन हेरी उतरी गीयो, एने ती तान सेवा चाकरी केरने बाज गियी।
40 जेवी दिह बुड़नेन टेम माय माणहे बाती बातीन दुखाऱ्याह यीशु फाय लावा, एने यीशु आखा दुखाऱ्या पोर आथ मेलीन ताह हुदाऱ्यो।
41 एने जुलूम माणहा माय रेन बुतड़ा जोरेस आयड़ीन, “तु बोगवानान बिटोख हे, केयीन निकली गियी!”
पुण यीशु ताह दोपकाड्यो, एने बोलने नाह दिनो, काहाकाय ता जाणताला काय, “तोच सोड़ोवणार मसी हे।”
विन्ता केरन्या गेरा माय यीशुन पारचार केरनो
(मरकुस 1:35-39)
42 उठ्यान विगोस यीशु ता रेन निकलीन उजाड़ी माय गीयो, पुण माणहे ताह होदतेन ता फाय आवा, एने ता यीशुह न्या रेन मा जाय केरीन रोकणे बाज गीया।
43 पुण यीशु केयो, “माहु दिहरा गावा माय बोगवानान राजान हाजाली खुबेर होमलावणे जोरेवरी हे, काहाकाय मी ज्याज ने केरता आयेल हे।”
44 तिहेच यीशु यहुदा देसाम आखा बोक्ती केरन्या गेरा माय एने आखा यहुदियान ईलाका माय पारचार किरते गीयो।