1 Ingiese bijien bazilie dadene goyane Yajiende feilieye giezhi jiejin gie, 2 Qimotaini tai hhende peizhi echighawo. Hheshi mai gaijiu wo. Bijienre hhantu Mexihani gouxioxii chonjizhi Hudade wilie giesan kun wo. Hhei echighakushi tai khiduzheghazhi xianxin gieku jiere zhichi gieghane giezho. 3 Ingiese enezighan heiku shiqin dundase tai nieda ulie gojiolughane giezho. Matande heiku shiqin jinjisei ta goyalane mejiene. 4 Bijien tanre hhantu bikude matande heiku shiqin irekui tande melieshi kieliezhi daowo. Ede qintui gholusei ta mejiene. 5 Ingiese bi pse bazilie dadene Qimotaini peizhi tai xianxin gieku matugiezho giezhi daqinlaghale echiwo. Hhe miichen tai miizhi bijien khishulasan wilielani belien gholughakuse ayizho.

6 Ingie Qimotai jian tai hhense iredene tai xianxin gieku, oreku gouxioxini bijiende kieliewo. Da kieliezhi ta chan bijienyi bayasuzhi jilazho. Bijien tai chujieghene gieku mutun taye bijienyi chujieghene giezho. 7 Ingiese gaijiula, bijiende kunnan, heiku olon biliuzhe ta xianxin giesan yenyin jiere bijien bayasuzho. 8 Ta Ezhanyi miende beizhi undanlase bijien ede amiturawo. 9 Bijien mai Hudai melie tai yenyin jiere hende bayasuzho. Eneni Hudade matugie mafan kieliene? 10 Bijien tai ochirazhi uye kurusan tai xianxin giekuni kurughane giezhi xieni udu Hudai hende xiahua giezho.

11 Mai Ada Huda, mai Ezhan Ersa moni keighadene bijienyi zhijie tai hhende echigha gie. 12 Pse bijien tande olon oreku mutun Ezhan tande oreku zhughei ologhan ogizhi durughadene tai nieniedene oregha gie, jien kunladeye oregha gie. 13 Ingiese zhughei tai khiduzheghazhi mai Ezhan Ersa soyuji shentularene hhantu irekude mai Ada Hudai melie zhiguitu yama kielieku witu gholugha gie.