4
Hudai Bayasughazhi Gie
1 Ingiese gaijiula, zuihoude kielieye, Ezhan Ersai miende bijien tai xiahua giezhi tande sughazhi kielieye. Ta bijiense surusan mutun Hudai bayasughazhi gie. Ta ijin giezhoma, pse ologhoni izhigie gie.
2 Bijien Ezhan Ersai qienlighala tande yan minlin ogisei ta mejiene.
3 Hudai isishi ene wo, tai zhiguini gholughane giezho. Lon kijieku, pse qimutu zuilase gholode beighazhi
4 jien kunde goya beyene hanshiliezhi ganjin, zhiguide giekuni mejieghane.
5 Hudai tani dasan niman kun mutun lon gieku nefuxinni daghazhi hu ulie gieghane.
6 Ene shiqin jiere xianxin giesan gaijiulade piendazhi pienyi bu zhanji. Bijien melieshi tande kieliezhi hende jingao giesan mutun Ezhan qimutu zui fanjisan kunlai faine.
7 Huda matanyi urukushi ganjin wini bu giezhi, zhiguide gie giezho.
8 Ingiese ene sughasei ulie chenliechen kunshi kunni ulie chenlieku pusho, tande goya Shenlinne ogisan Hudai uye chenliezho.
9 Gaijiulade oreku shiqinni kieliese tande xin huaiku biyo uwo. Nieniedene orekuni ta goyane Hudase suruzho.
10 Ta Maqidunni gaijiulade man shuhua ingiezhi giezho. Gaijiula, bijien tande xiahua gieye, ta pse ologhonni gie.
11 Bijien tande fenfulasan mutun ta xiacha giezhi udune nanrande daogha. Goya shiqinlane gonji. Khaghalane wilielai gie.
12 Qingiese ghadanedu kun ta giesanlai uzhese zunzhun giene, taye kiemade ulie kouine.
Ezhan Xiajian Gieku
13 Gaijiula, bijienyi duranshi hhe fugusan kunlai shiqinni ta mejiese gou wo. Ingiese hhe xiwon wichen kun mutun zhughetai ulie otune.
14 Matan Ersa duya ijiedene aminne olusanyi xianxin giese Ersai xianxin giedene duya ijiesan kunlai Huda Ersaghala hhantu udurukuiye xianxin giene.
15 Bijien Ezhanyi kielienyi tande kielieye. Ezhan pse irekude matan amitu kun hhe fugusan kunlase melieshida dane.
16 Nie minlin xiaise fugie qienxien waradazhi Hudai labai shenqi dunda Ezhan asiman jierese qinsi irene. Ingiekude Mexihani xianxin giedene fugusan kun xien aminne olune.
17 Ingiedene bijien amitu kunyi hhelare hhantu olien jiere deila echi asiman jiere Ezhanyi ochirane. Ingiedene chanqi Ezhanre hhantu soune.
18 Ingiese ta enezighan kielienghala nieniedene surughazhi kielie.