13
1 «Nga ne, woo kul, ay moɲey dii a,
ay haŋawey maarʼa, ay faham.
2 Hayaa kaŋ se war ga haya bay, agay da gʼa bay,
war mana bisa agay nda haya kul.
3 Amma agay, ay ga šelaŋ Hini-kul-koyoo se,
ay ga baa yʼay boŋ faasa Irkoy jine.
4 Zama war, war manʼti kala taariharkawyaŋ,
war kul manʼti kala taari safarikawyaŋ.
5 He! Nda a gar war nka dangay!
Woo ra war ga tee lakkalkoyni.
6 Ay gʼa wiri war ga, wa haŋajer
ay ga faasa ay boŋ se,
wa lakkal daŋ ay miɲoo šenney se.
7 War mma hongu kaŋ war mma Irkoy faaba
waati kaŋ war ga taari?
8 Nga bande war goo
ka šelaŋ kʼa noo cimi wala?
9 Nda a na war fisi-fisi, a ga kan war se wala?
Wala war mmʼa darga
takaa kaŋ nda boro ga adamize darga?
10 Šikka sii a ra, a ga war zukandi,
nda war ga borey daŋ cere jine tuguyan ra.
11 Irkoy beeriyanoo si war hunburandi wala?
Nga hunburaa si kaŋ war boŋ wala?
12 War šenney manʼti kala boosu,
war zaabey manʼti kala labudiini cete.
13 Wa dangay, wʼay naŋ!
Ay ga šelaŋ, haya kul kaŋ no.
14 Agay ne, ay ga soolu haya kul se,
ay gʼay hundoo daŋ farrati ra.
15 Ba nda a gʼay wii, ay ga wakkal a ga.
Ay gʼay misoo har a se.
16 Takaa woo gʼay hallasi,
zama boro kaŋ si hunbur Irkoy si kay a jine.
17 Wa haŋajer, wa haŋajer ay šenney se,
Wa war haŋawey feeri ka maa ay šenney.
18 Wa naŋ yʼay cimoo har,
ay ga bay kaŋ agay bara nda cimi.
19 May no ma hin kʼay wurru?
Za sohõ da, ay ga dangay, ay hundoo ga hun.
20 Ay noo haya hinka hinne,
de ay si tugu ma ne:
21 ni kaboo moorandi ay ga,
masʼay jijirandi nda ni hunburaa,
22 woo banda ga, ma ciya, ay ga tuuru,
wala ay ga šelaŋ, nʼgʼay zaabi.
23 Marje ti ay laybey nda ay zunubey hinnaa?
Tureyanoo nda zunuboo kaŋ goo ay ga har ya ne.
24 Macin se nʼga ni ndumoo bere ya ne, nʼgʼay dii sanda ni iberoo?
25 Nʼga baa ma fita kaŋ hewoo nʼa zaa jijirandi wala?
Nʼga baa ma subu koga gaarandi wala?
26 Zama nga haya hottayaŋ hantum ay ga,
nʼgʼay banandi ay soogataray zunubey.
27 Nʼgʼay cewey gaala nda bundu,
nʼgʼay ɲuutirey kul hawgay,
nʼgʼay cee diraa kabu.
28 Ka gar ay gaahamoo funbu sanda bundu,
sanda bankaaray kaŋ dusey nʼa ŋaa.»