14
1 «Woy boro ka adamize hay,
nga aloomuroo ga kacca, a ga too nda alhuzun.
2 A ga boosu sanda kutukurya, a ga kogu.
A ga zuru sanda tuuri bii, a si kay.
3 Nga ga ni moɲey goo.
Nʼga ciiti daŋ agay nda ni game.
4 May no ma hin ka haya henanante kaa ižiibaa ra?
A sii no.
5 Adamize aloomuroo goo nda kaydoo,
ni no ma nga handey hinnaa bay,
nʼna kaydoo daŋ a se kaŋ ga a si hin ka bisa.
6 Ni moɲey kaa a ga, ma fay nda a,
hala a ma nga hunaroo benandi alaafiya ra,
sanda goykaw kaŋ ga nga zaaroo banaa batu.
7 Naata goo tuuri se,
nda i nʼa dunbu, a ga zay,
dunbudogoo ga tun koyne.
8 Ba nda nga linjoo žen laboo cire,
ba nda nga kunturoo buu laboo ra,
9 hari kayna gʼa zayandi,
a ga kabeyaŋ tee sanda tuuri kaccu.
10 Nda boro buu, nga gaaboo ben,
adamize hundoo ga hun, man ra a goo?
11 Teekoo haroo ga kay,
isawey ga zunbu, i ga kogu.
12 Takaa woo da, adamize ga kani, a si tun koyne.
Kullihinne beenaa ga bara, a si tun,
a si tunandi ka hun jirboo ra.
13 He! Nda i nkʼay tugu alaahara,
kʼay tugu hala ni futuroo ga yay,
nda a gar ni nka waati daŋ kaŋ ra nʼga hongu agay!
14 Nda a gar nda boro buu a mma hin ka yee ka huna,
zaari kul goyey ra ay ga batu,
hala waati kaŋ boro huru ay dogoo ra.
15 Mʼay cee, agay, ay ga tuuru ma ne,
nʼga baa ma dii hayaa kaŋ ni kaboo nʼa tee.
16 Sohõ, nʼgʼay cee diraa kabu,
nʼsi yee koyne kʼay zunubey guna.
17 Ay tureyanoo ga hawandi saaku ra,
nʼgʼay laybey daabu.
18 Amma tondi hondu ga kaŋ ka kayri,
tondi ga hun dogoo ra.
19 Haroo ga tondey ŋaa,
ncirɲi beeri ga koy nda labutaasoo,
takaa din da, nʼga adamize naataa derandi.
20 Nʼgʼa kaŋandi hala abada, a ga koy,
nʼga nga ndumoo bere, nʼgʼa taŋ a ma koy.
21 Nga izʼarey ga beeray bay wala, a si bay.
I kaynandi, a si dii a.
22 Nga gaahamoo no ma maa nga doroo,
nga boŋ bonaa no ma binoo maray.»