15
Cee hinkantoo kaŋ Elifaz na šennoo zaa
1 Elifaz, Temaŋ boraa zaabi ka nee:
2 «Lakkalkoyni ga šelaŋ nda bayray kaŋ ti hew wala?
A ga nga boŋ too nda dandi hewoo?
3 A ga nga boŋ faasa nda šenni yaadayaŋ,
nda kalimayaŋ kaŋ sii nda addalil?
4 Ni, nʼga Irkoy hunburaa tee yaada,
nʼga miileyaney kaŋ boro gʼi tee Irkoy ga ganji.
5 Zama ni laybey no ma ni daŋ šenney wey ra,
nʼna hiilantey deene šennoo dumoo zaa.
6 Ni miɲoo no ma ni zukandi, manʼti agay no.
Ni meešennoo no ma ni dii.
7 Ni ti boro jinaa kaŋ hayandi wala?
Ni nka hondey jin ka hay wala?
8 Ni nka maa Irkoy sirroo wala?
Ni nka lakkal dii ni hinne se wala?
9 Macin no nʼgʼa bay kaŋ ir sʼa bay?
Macin fahamay bara ma ne kaŋ sii ir se?
10 Hinbiri kaarayyaŋ nda aru žeenayaŋ goo ir ra,
i bisa ni baabaa jiiri.
11 Irkoy bineyaynandiroo,
nda šenney kaŋ i gʼi har ma ne nda hennayroo
mana ni wasa wala?
12 Macin se ni binoo no ma ni juwal?
Macin se ni moɲey ga miti?
13 Irkoy here nʼga ni futuroo bere
ka šenney wey dumey har wala?
14 Macin ti adamize hala a ma henan?
Nda boro kaŋ woy nʼa hay, a ma tee šerrante?
15 Nda Irkoy si naanay nga boro henanantey,
nda beenaa si henan a jine,
16 soko boro harramante kaŋ ga šiiri-šiiri,
adamize kaŋ ga šerretaray jaŋay haŋ
sanda takaa kaŋ nda boro ga hari haŋ.
17 Haŋajer ya ne, ay ga ni fahamandi!
Ay ga hayaa filla ma ne kaŋ ay dii a,
18 woo kaŋ lakkalkoyney nʼa har,
woo kaŋ hun baabey do, woo kaŋ i manʼa tugu.
19 Ngi hinne se gandaa nondi,
yaw mana bisa i ra.
20 Boro laala goo zarabi ra nga hunaroo kul ra,
jiiri hinna kaccu ka kayandi boro binekogawey se.
21 Kaati kaŋ ga hunburandi ga hẽe haŋawey ra,
ba alaafiya waati kayrakaw ga kaŋ a ga.
22 A si hongu kaŋ nga ga willi ka hun kubaa ra,
takuba ga nga batu.
23 A ga yaara ka ŋaayan ceeci, man ra a ga duu a?
A ga bay kaŋ kubaa zaaroo man.
24 Binemarayyan nda kankamyan gʼa jijirandi.
I gʼa šiita sanda kokoy kaŋ soolu ka tangam.
25 Zama a nka nga kaboo šerre Irkoy ga,
a nka kay Hini-kul-koyoo se,
26 A boŋšenday ka kaa Irkoy ga,
a ga tugu nga koraa tafayroo ra.
27 Ndumoo ga too nda maani,
carawey ga too nda maani.
28 Amma a si goro kala koyra kayranteyaŋ ra,
huguyaŋ ra kaŋ ra boro sii,
kaŋyaŋ ga baa ka kaŋ.
29 A si yee ka tee alman, nga almanoo si gay,
nga mayraa si yee ka laboo too.
30 A si hin ka hun kubaa ra,
Nuunawey ga nga fitawey kogandi,
Irkoy meehewoo kaŋ funsandi gʼa gaaray.
31 A masi nga naanaa daŋ zanbayan ra,
zama takaa din, nga banaa ti zanbayan.
32 Woo ga tee za nga aloomuroo mana ben,
nga tuuri kaboo si yee ka firzi.
33 A ga tee sanda alanebɲaa kaŋ ize ganey ga kaŋ,
sanda zaytuɲaa kaŋ kutukuryey ga kaŋ ka hun a ga.
34 Borey kaŋ si hunbur Irkoy jamaa ga ben,
nuune ga borey kaŋ ga sufuray taa gorodogey ton.
35 I ga bone gunde zaa,
i ga šerretaray jaŋay hay,
ka zanbayan biiri ngi biney ra.»