16
Cee hinkantoo kaŋ Ayuba na Elifaz zaabi
1 Ayuba zaabi ka nee:
2 «Ay maa hayey wey dumi boobo ka bisa,
war kul manʼti kala bineyaynandikaw laalayaŋ.
3 Waati foo no war ga fay nda
ka šenni yaadayaŋ har ya ne?
Cin no ma ni farandi
kaŋ se nʼgʼay zaabi nda takaa woo?
4 Nda a gar war bara ay dogoo ra,
ay ga hin ka šelaŋ war se nda takaa woo da,
ay ga šenniyaŋ hanse war se,
ay gʼay boŋoo zinji-zinji ka war fude.
5 Ay gʼay šenney ka war biney daŋ,
ay si fay nda ay ga šelaŋ ka war doroo yaynandi.
6 Amma nda ay ga šelaŋ, ay doroo si ben,
nda ay dangay, a ga ben wala?
7 Sohõ Irkoy nʼay farandi.
‹Nʼna borey kul kaŋ gʼay kuubi ka bere halaci.
8 Nʼnʼay kuuru-kuurandi,
woo ga tee ay ga seede.
Ay ɲomyanoo gʼay wurru
ka tee ay ga seede.›
9 Irkoy futu hala a nʼay say,
a na hiɲe kaama ay ga.
Agay iberoo ga moo bakam ay ra.
10 I na ngi miɲey hay haaa ay ga,
i nʼay kar agay ndumoo ga kʼay wow,
i ga marga ay ga.
11 Irkoy nʼay daŋ boro laalayaŋ kabey ra,
a nʼay kaŋandi boro yaadayaŋ kabey ra.
12 Ay cindi alaafiya ra, a nʼay guzuguzu,
A nʼay dii nda ay jinde banda kʼay halaci.
A nʼay tee haya kaŋ nga biraw-izey ga ceeci kʼa kar.
13 A deeši ka kaa ay ga nda nongu kul here.
A nʼay dumay-ɲaa-guurey fun ka bisa,
a mana haya kul naŋ,
a na tayoo kaŋ goo ay tasaa ga mun laboo ra.
14 A nʼay kul fun-fun,
a zuru ka kaŋ ay ga sanda wongu-ize.
15 Ay na saaku kasa taa kʼa kʼay kuuroo daabu,
ay nʼay teɲaa miti laboo ra.
16 Hẽeni se agay ndumoo ciray,
ay moo guna ga hima nda buuyan biyoo.
17 Ka gar ay kabey mana ifutu tee,
ay Irkoy ŋaarayroo ga henan.
18 ‹Laboo, masʼay kuroo daabu!›
Ay kaatoo masi hewgubandi!
19 Za sohõ da, ay goo nda seede beenaa ra,
cimi no, ay goo nda seede kaŋ ga tuuru ay maaɲoo ga beene.
20 Ay cerey ga haaru ay ra,
Irkoy here ay mundawey ga doo
21 hala a ma ciiti nga nda adamize game,
sanda adamize kaŋ ga faasa nga cinaa se.
22 Zama agay aloomuroo goo ma ben,
ay ga fondo zaa kaŋ nda ay si willi kate koyne.»