19
Cee hinkantoo kaŋ Ayuba na Bildad zaabi
1 Ayuba zaabi ka nee:
2 «Hala waati foo no war ga koy a ga kʼay hundoo maray,
kʼay motti nda war šenney?
3 Nga ne, cee woy (10) war gʼay wow,
a si war haawandi kʼay torro wala?
4 Nda cimi no kaŋ ya nka dere,
ay dereroo ga kaŋ ay boŋ.
5 Nda cimi no kaŋ war nka tun ya ne,
nda ay siiyanoo se war ga kaŋ ay ga,
6 war ma bay kaŋ Irkoy no mʼay laazaaba,
kʼay didiji nga filijoo ra.
7 Nda ay kaati ka ciya kaŋ ay torro,
boro kul sʼay zaabi.
Nda ay ciya ka faaba ceeci, ay si duu cimi.
8 A na fondaa daabu ya ne, ay si hin koyne ka bisa,
a nʼay fondaa kubayandi.
9 A nʼay daržaa kaa ay ga,
a na fuulaa kaa ay boŋoo ra.
10 A gʼay kayri nongoo kul here, ay ga koy,
a nʼay tammahãa dogu sanda tuuri.
11 A futu ay ga,
a nʼay dii sanda nga nkuwawey affoo.
12 Nga wongu-ize jamawey ga kaa cere bande,
i na fondo tee ka kaa hala ay do,
i na ngi kaloo gorandi kʼay gorodogoo kuubi kʼa bere.
13 A na agay armey moorandi agay,
borey kaŋ gʼay bay mo gʼay guna sanda boro kaŋ i sʼa bay.
14 Ay boro maanay nʼay naŋ,
borey kaŋ gʼay bay dirɲa agay.
15 Ay hugoo yawey nda ay koŋŋey
gʼay dii sanda yaw,
ngi se ay manʼti kala boro kaŋ i sʼa bay.
16 Ay gʼay tamoo cee, a si tuuru ya ne,
ay ga hima kʼa suurandi nda ay miɲoo.
17 Ay wandoo si hin ay meehewoo,
ay ize gundey gʼay hesu.
18 Ba zankayaŋ gʼay kaynandi,
nda ay tun, i ga šelaŋ ay ga.
19 Borey kaŋ ga ay gʼay sirrey talfi nʼay harram.
Borey kaŋ ay ga bagʼey bere ay ga.
20 Ay birey denja ay kuuroo nda ay hamoo ga,
haya kul mana cindi ya ne kala ay kuuroo nda ay hiɲey.
21 Ay cerey, war, wa alhormo tee ya ne, wa alhormo tee ya ne,
zama Irkoy kaboo too ay do!
22 Macin se war ga hanga agay sanda takaa kaŋ Irkoy gʼa tee?
Ay hamoo mana war kungu wala?
23 He! Nda a gar ay šenney mma hantumandi,
nda a gar i nka žeerandi citaabu ra!
24 Nda a gar i nka žeerandi tondi ra
nda guuru nda badila ka cindi waati kul!
25 Agay, ay ga bay kaŋ ay faasakaa ga huna,
de mo kokoray ra a ga tun laboo ga ka nga boŋ cebe.
26 Ay kuuroo halaciroo banda ga,
ba ay hamoo ra ay ga kaa ka dii Irkoy.
27 Agay, ay ga kaa ka dii a,
ay moɲey ga kaa ka dii a, manʼti boro tana,
ay teeley ga zarga ay gundoo ra.
28 Waati kaŋ war nee: ‹Taka foo nda ir gʼa gaaray?
War ga hongu kaŋ haya futaa woo goo ay ra.›
29 Aywa, war hunday ma hunbur takuba,
zama takubaa ti zukandoo kaŋ ga agay alhakoo bana,
woo ra war ga bay kaŋ ciiti ga bara.»