26
Cee hinzantoo kaŋ Ayuba na Bildad zaabi
1 Ayuba zaabi ka nee:
2 «Nʼga wan ka yalaafante faaba,
nʼga wan ka kabe kaŋ sii nda gaabi faaba!
3 Nʼga wan ka boro hoyray kaŋ sii nda lakkal,
nʼga cebe kaŋ ni goo nda lakkal beeri!
4 May ga ni goo?
May ka šenney wey daŋ ni miɲoo ra?
5 Bukawey ga jijiri
teekoo cire nda borey kaŋ goo a ra.
6 Nga do alaahara sii nda sirri,
guusu futaa sii nda daabirji.
7 A ga hawsa here beenaa daaru koonu boŋ,
a ga laboo deeji koonu ga.
8 A ga harey daabu nga duulawey ra,
duulawey si say ngi tiŋaa cire.
9 A ga nga kokoy gorodogoo gunaroo daabu,
ka nga duulaa daaru a ga.
10 A na haya kaŋ ga kuubi ka bere žeeri haroo ga,
ka koy hala gaayoo nda kubaa kaydogoo ga.
11 Beenaa ganjey ga jijiri,
i ga hunbur nda a kašeta i ga.
12 Nga gaaboo nda a ga teekoo boosandi,
nga lakkaloo nda a ga teekoo adabba laalaa motti.
13 Nga miɲoo hewoo ga beenaa nerandi,
kaboo ga gondoo kaŋ zuru hay.
14 Aywa, woo ti nga goyey kul ikaccaa.
Macin ti ŋuunuŋuunuyanoo kaŋ ir ga maarʼa?
May no ma faham nga hinoo jiŋjiŋyanoo se?»