27
1 Ayuba yee koyne ka tonton nga šennoo ga ka nee:
2 «Ay ga žee nda Irkoy kaŋ ga huna maaɲoo
kaŋ nʼay cimoo taa ay kone,
nga kaŋ ti Hini-kul-koyoo kaŋ nʼay hundoo torro.
3 Kullihinne ay ga hunsar,
kullihinne Irkoy hunsaroo goo ay niiney ra,
4 šenni laala si hun ay miɲoo ra,
ay deenoo si zanba.
5 Abada ay si war noo cimi!
Hala ay buuyanoo ga ay sʼay laadirtaraa naŋ.
6 Ay ga gaabandi ay šerretaraa ga, ay si kaa a ra,
ay binoo sʼay zukandi ba cee foo.
7 Yala agay iberoo ma diyandi boro laala,
boro kaŋ kay ya ne ma diyandi boro kaŋ si šerre!
8 Macin ti naataa kaŋ goo boro se kaŋ si hunbur Irkoy
waati kaŋ Irkoy na hundoo karfoo dunbu,
waati kaŋ a na hundoo kaa?
9 Waati kaŋ bone kaa a ga,
Irkoy ga maa nga kaatey wala?
10 A ga Hini-kul-koyoo tee nga bajoo,
A ga Irkoy cee waati kul wala?
11 Ay ga war cawandi haya kaŋ ti Irkoy hinoo,
ay si Hini-kul-koyoo hayey tugu war se.
12 Nga ne, war hunday kul dii ey henna,
macin se war ga war boŋ derandi šenni yaadayaŋ ra?
13 Woo ti bagaa kaŋ Irkoy nʼa jisi boro laaley se,
woo ti tubuhayaa kaŋ boro binekogawey ga duu a Hini-kul-koyoo do.
14 Ba nda a goo nda ize booboyaŋ, takuba wane nda ey,
nga hayroo si kungu.
15 Borey kaŋ ga cindi dumaa ga, buuyan gʼi fiji,
bila nda wandey kaŋ i buu kʼi naŋ mʼi hẽe.
16 Nda a na nzorfu kaaray marga sanda labu,
ka bankaaray zuku cere ga sanda labudiini,
17 nga no kʼi zuku cere ga,
boro šerrantaa no mʼi daŋ,
boro henanantaa no ma duu nzorfoo.
18 Hugoo kaŋ a nʼa cin ga hima nda nooni hugu,
a ga hima nda tende kaŋ gardikaw gʼa cin nga boŋ se.
19 A ga kani nda almankoynitaray, haya kul si duu nga almanoo,
a ga nga moɲey hay, alman kul sii no!
20 Balaawu ga kaŋ a ga sanda ncirɲi,
hewkur gʼa zaa cijinoo ra.
21 Dandi hewoo gʼa zaa ka koy,
a gʼa dogu laala kʼa kaa nga gorodogoo ra.
22 I gʼa kar, i si hinna a se,
a si hun a ra, kala a ma zuru.
23 I ga kobi nga bonaa maaganda se,
nongu kul kaŋ ra a koy, borey ga wisi ka haaru a ra.»