8
Bildad na šennoo zaa
1 Bildad, Šuwa boraa na šennoo zaa ka nee:
2 «Hala waati foo no nʼga fay nda šenney wey dumey,
hala waati foo no ni miɲoo ga fay nda šenni yaada?
3 Irkoy ga ciiti barmay wala?
Hini-kul-koyoo ga šerretaray barmay wala?
4 Nda ni izey nka zunubu tee a ga,
a nʼi banandi ngi alhakoo.
5 Amma ni, nda nʼga Irkoy ceeci,
nda nʼga Hini-kul-koyoo ŋaaray,
6 nda taali kul sii ni ga, nʼga henan,
a si gay a mana ɲeli ni ga
ka ni noo gorodogoo kaŋ nda nʼga hima.
7 Ni cee jinaa takaa ga tee haya kaccu
ni kokoroo takaa se.
8 Ay gʼa wiri ni ga,
zamanoo kaŋ bisa borey hãa,
goyey kaŋ ni baabey nʼi tee guna.
9 Zama ir hayandi a mana gay,
ir si haya kul bay,
aduɲɲa ra, ir zaarey manʼti kala tuuri bii.
10 Ngi, i si ni cawandi wala? I gʼa har ma ne,
i ga šenniyaŋ kaa ngi lakkaley ra ka nee:
11 ‹Kakaaru ga zay bila batakara bangu wala?
Burgu ga zay bila hari wala?
12 Waati kaŋ a ga boosu, bila nda a ma dunbandi,
a ga cahã ka kogu ka bisa subey kul.›
13 Woo no ma tee borey kul ga kaŋ ga dirɲa Irkoy,
boro kaŋ si hunbur Irkoy naataa ga dere.
14 Hayaa kaŋ ga a ga felle ga say,
a ga hima nda tataaru hugu ga nga naanaa goo.
15 A ga dee nga hugoo ga, amma a si kay,
a ga ciddim a ga, amma a sii nda gaabi.
16 A ga hima nda tuuri kaŋ ga too nda hari waynaa cire,
a ga nga kabey feeri saddiɲaa ra,
17 nga linjey ga miti hala tondey ra,
a ga huru hala tondey kunehere.
18 Nda a dogandi ka hun nga dogoo ra,
nga dogoo gʼa yankar ka nee: ‹Ya na bay ka dii ni!›
19 Woo no ma tee borey kokoroo gomnoo,
dumari tanayaŋ ga tun dogey ra.
20 Abada, Irkoy si boro laadirante fur,
a si goy futu teekey faaba.
21 Ne nda kayna a ga ni miɲoo too nda haaray,
a ga ni meetuwey ɲaalandi.
22 Borey kaŋ ga konna ni ga too nda haawi,
boro laaley gorodogey ga dere.»