9
Ayuba na Bildad zaabi
1 Ayuba zaabi ka nee:
2 «Cimi no, ay ga bay kaŋ takaa woo da no,
taka foo nda boro ga hin ka tee šerrante Irkoy jine?
3 Boro kaŋ ga ciiti Irkoy bande,
ba nda a nʼa cee, cee zenber (1.000) foo,
a si tuuru a se ba cee foo.
4 Lakkalkoyni no, nga gaaboo ga sahã,
may no mʼa gande,
a ma fatta nda baani?
5 Nga kaŋ ga tondi hondey kaa dogey ra bila nda i ma bay,
nga futuroo ra a gʼi gum.
6 A ga laboo zinji-zinji nga asaasoo ga,
nga ganjey jijiri.
7 A ga šelaŋ waynaa se, waynaa si fatta,
a ga tammaasa daŋ handarawey ga.
8 Nga hinne no ma beenaa daaru,
a ga dira teekoo bondawey ga.
9 Nga no ka hawsa handarawey tee,
nda kaydiyaa waati handarawey,
nda konnoo waati handarawey,
nda gurma handarawey.
10 A ga haya beeriyaŋ tee kaŋ si fahamandi,
a ga kayfiyaŋ tee kaŋ si kabandi.
11 A ga bisa ay jere, ay si dii a,
a menne, ya na bay.
12 May no ma hin ka haya taa kaŋ a nʼa dii?
May no ma nee a se: ‹Macin no nʼgʼa tee?›
13 Irkoy si nga boŋ futuroo gagay,
teekoo adabba laalawey ga hima ka ngi boŋ yeeti ganda a jine.
14 De agay, taka foo nda ay ga hin ka tuuru a se?
Šenni foo no ay gʼa suuba ka tuuru a se?
15 Ba nda ay tee šerrante
ay si hin kʼa zaabi.
Ay ga hima kʼay ciitikaa suurandi.
16 Nda ay nʼa cee, a tuuru ya ne,
ay mana hongu wala a ga haŋajer ay šennoo se,
17 nga kaŋ ga burbusu kʼay motti bila addalil,
bila addalil a ga tonton ay dorey ga,
18 a si naŋ ya hunsar,
takaa kaŋ nda a gʼay too nda hottayyaŋ.
19 Nda gaabi no, nga ti hinoo.
Nda ciiti no, a ga nee: ‹May no ma kay ya ne?›
20 Ba nda ya mma šerre, ay miɲoo gʼay zukandi,
ba nda ay ga laadir, ay miɲoo ga nee kaŋ ay tooɲe.
21 Ay ga laadir wala? Ay si huga nda ay boŋ.
Ay konna ay hunayanoo.
22 Woo kul, ay si kula!
Woo se ay ga nee:
‹A ga laadirantaa nda boro laalaa kul halaci.›
23 Ba nda bone kaa ka kaŋ borey boŋ kʼi wii,
Irkoy ga haaru siiyanoo ra kaŋ ga kaa borey kaŋ mana haya kul tee ga.
24 Nda ganda naŋandi boro laaley kabey ra,
a ga gandaa ciitikey moɲey daabu.
Nda manʼti nga no, adiši may no?
25 Ay zaarey cahã nda zurukaw,
i ga zuru, ka gar i mana dii gomni.
26 Ngi diraa ga cahã sanda kakaaru hii,
sanda algabu kaŋ ga zunbu ham ga.
27 Nda ay nee: ‹Ay ga baa ya dirɲa ay doorawey,
kʼay binemarayyanoo naŋ ka gaabi daŋ ay boŋ ra›,
28 ay farayanoo nʼay hunburandi.
Ay ga bay kaŋ nʼsʼay dii boro kaŋ mana haya kul tee.
29 Agay ti boro laalaa!
Macin se ay gʼay boŋ farandi yaada?
30 Ba nda ay ɲumay neeži hari ra,
ba nda ay nʼay kabey ɲumay soso ra,
31 nʼgʼay warra žiibi guusoo ra,
ba ay bankaarawey ga konna agay.
32 Zama manʼti adamize no sanda agay
hala ya tuuru a se,
hala ir ma duu ka ciiti.
33 Waafakandikaw sii ir game
kaŋ ga hin ka kabe deke ir boro hinkaa ga.
34 A ma nga goboo moorandi agay,
a masʼay binoo dunbu nda nga hunburaa!
35 Woo ga, ay ga šelaŋ, ay si hunbur a.
Amma zama manʼti woo no,
ay ga cindi agay hinne nda ay boŋ.»