2
Kulya Yeremiya ajagifulika ecirhînyiro n’Omucîmba gw'Amalaganyo oku ntondo Nebo
1 Rhunasome omu mandiko kurhi omulêbi Yeremiya arhegekaga abajâga bujà mpu bagendane omuliro Mutagatîfu, nk’oku binayandisirwe akomêrezagya abôla banyakuhêkwa bujà,
2 omu kubahà amandiko matagatîfu, mpu irhondo barhayîbagiraga amarhegeko ga Nnâmahanga, mpu bamanye bankanahabuka omu nkengêro zâbo nka bankabona enshusho z’abazimu, nguma za masholo ezindi za marhale n’emyambalo yâbo y’akaduku.
3 Muli ebyôla binwa abakomêreza mpu bamanye irhondo bankanaciyêgûla n’akanwa ka Nyamuzinda omu mirhima yâbo.
4 Basome muli agôla mandiko kurhi, oku burhegesi bwa Nyamuzinda oyôla mulêbi ahêkaga ecirhînyiro haguma n’Omucîmba gw’amalaganyo kuli eryâla ntondo Mûsa ahêkagwa kwo, alângira akashambala ka Nyamuzinda.
5 Erhi bahika ahôla Yeremiya abandâna enyumpa y’olwâla, adêkerezamo ecirhînyiro n’Omucîmba gw’Amalaganyo n’oluhêrero lw’obukù, anafunika omunwa.
6 Baguma muli bo banacigaluka buzinda mpu bajè bayêrekana enjira n’ebimanyîso ci barhacibamanyaga.
7 Yeremiya erhi amanya okwôla abakalihira bwenêne. Anacibabwîra, erhi: «Ahôla hantu hâyôrha hafulike kuhika amango Nyakasane ashubishûbûza olubaga lwâge analubabalire.
8 “Ahôla Nyakasane anayêrekane yêne ebyôla birugu bitagatîfu, irenge lyâge lyanâbonekane omu citù nka kulya lyanaciyêrekanaga amango ga Mûsa, nka kulya lyanaciyêrekanaga erhi Salomoni asengera mpu abantu batagatîfu babonekane oku banali batagatîfu”.
9 “Kandi banaganire omwôla mandiko oku oyôla mwâmi w’obukengêre bunji, abonaga enterekêro y’okuyûsa n’okugisha akôla ka-Nyamuzinda”.
10 “N’oku nka kulya Mûsa erhi abà amâsengera Nyamuzinda, omuliro gwamanuka emalunga gwamirangusa erya nterekêro, kuguma n’erhi oyôla Salomoni ashenga, omuliro gwamanuka e malunga, gwayôca zirya nterekêro zoshi”.
11 “Mûsa anaciderha, erhi enterekêro oku byâha yasingônosire ebwa kubà erhalîbirwe”.
12 “Salomoni anacigeza nsiku munâni erhi akuza agôla mango”».
Embîko y’ebitabu bya Nehemiya
13 Kandi rhunabone omu mandiko kurhi Nehemiya ajiraga embîko y’ebitabu anacihiramwo ebitabu by’amandiko g’abâmi n’ag’abalêbi, n’ebya mwâmi Daudi, kuguma n’amaruba g’abâmi b’e Persi agali gayêrekîre entûlo z’aka-Nyamuzinda.
14 Nk’okwôla, Yûda naye ashûbûzize ebitabu byashandâlaga erhi ntambala rhwakazagilwa zirhuma, na bunôla rhwe rhubigwêrhe.
15 Akabà mubwîne muli n’obulagîrire bw’okubà nabyo, mwanajira abà mwarhuma bayish’imuyankirabyo.
Okukuza olukulu
16 Rhumuyandikire ebwa kubà rhwalingijira olukulu lw’okucêsibwa; rhwammuyandikîre okwôla, mwanajira bwinjà erhi mwankakuza ezôla nsiku.
17 Nyamuzinda yênene wayôkolaga olubaga lwâge, ye wanashubibahà akashambala, obwâmi, obudâhwa n’obutagatîfu,
18 nk’oku analaganyagya omu mandiko matagatîfu, rhulangâlire nti arhalegame okurhufà bwonjo ashubirhushûbûza kurhenga omu mashanja goshi ga hanôla igulu arhudêkereze omu hantu hatagatîfu. Bulya arhurhenzize omu mbaka ndârhi kulusha, anashubicêsa ahâla hantu hatagatîfu.
II. Enshokolezi y’omwandisi w’eci citabu
19 Emyanzi ya Yûda Makabeyo na bene wâbo, okucêsibwa kwa kalya ka-Nyamuzinda kinjinja, okugishwa kw’oluhêrero;
20 kuguma n’entambala zatulagwa ko mwâmi Antiyokusi Epifani, n’omugala Epatori;
21 kandi n’oku ebimanyîso by’empingu byarhabâlaga balya bali bagwêrhe oburhwâli bw’okulanga obwôrhere bw’obuyahudi, na ciru akabà bali banyi, bashubirirhôla ecihugo bakungusha n’abashombanyi mwandu.
22 Bashubiribona aka-Nyamuzinda k’irenge omw’igulu lyoshi, bayôkola ecihugo, banashub’iyîmanza amarhegeko agali kola hôfi garhenzibwe erhi Nyamuzinda amâbagwâsa omu bwinjà bwâge boshi.
23 Ebyôla binwa bishambirwe na Yasoni w’e Kirena muli bitabu birhanu, rhwarhangira okubinyihiza muli citabu ciguma.
24 Omu kulola entuliri erimwo n’obuzibu bw’okusoma kwazo kuli balya balonza okuyumva oku emyanzi yoshi yagendekaga, obwôla bunji bwarhumire rhucihangâna okuhà ngasi balya basîma okusoma olugurha lukwîrîre lulya lwasîmisa.
25 Rhwacihanganyire okujira citabu ciguma carhuma abasomi bahirhira n’okurhabâla ngasi boshi banalonzize okubibîkirira omu nkûmbu, na ntyôla gabè makwânane oku bandi basomi boshi buzira kabôlo.
26 Kuli rhwe rhwarhondîre ogwo mukolo gw’okunyihya emyanzi, gurhali mukolo mulembu ci guli gwa kutwîka ntûbano n’okuyîza.
27 Nka kula owarheganya olusiku lukulu nk’analonzize abandi boshi abalêrhere obushagaluke, ko n’okwo lyo nîrhu rhukwânana n’okukuzibwa na banji, rhwacihà n’obulonza bwinjà ogôla mukolo mudârhi.
28 Rhwaleka omwandisi yêne ashongêze ebyôla binwa nîrhu erhi rhwanajà rhwabinyihyakwo.
29 Kwo na kuguma na kula owayûbaka akombêra ngasi kantu ah’anayûbakwa hoshi, oku wagôya emirhi n’okuyishîga irangi alola na ngasi birya binakwânana okushîgwa lyo enyumpa ekwîrira, ncikêbirwe nti nîrhu ko binali ntyôla.
30 Okujà kwasâgarha, okushambâla kuli ngasi kantu, okurhondekanya oku bya ngasi lubero, ogo guli mukolo gw’olya mwandisi mulenga wayandikaga eyi myanzi yoshi.
31 Ci kuli olya wanayandikaga ebinyinyî byônene, onamuleke anyihye emyanzi, alekicishambâla emyanzi yoshi.
32 Rhurhondîre emyanzi yîrhu ahâla buzira kuciyûshûla bindi bici kuli ebi rhwaderhaga. Bwanabà buhwinja okulihya enshokolezi y’emyanzi na buzinda okuyofihya emyanzi yonene.