2
1 Nka bakola bacîderheza omu buhwinja bwâbo, banayishe erhi: «Akalamo kîrhu kali kofi kanayunjwîre mirenge, ntà bufumu amango olufù lwamahambira omuntu, ntà mulenga wakalikûza omuntu omu nfune za nnakuzimu.
2 “Kahanga rhwàburhîrwe, rhwazinda erhi rhuli nka abarhahali. Omûka rhuyîsa gunali mugî kwône, n’enkengêro zîrhu, enali nkunyakunye ecîbalalira erhi omurhima gurhinda”;
3 “eyo nkunyakunye ekazima, n’omubiri gwîrhu gunashube luvù, n’omûka gunahirigirhe nka hiboho hyangu”.
4 “Oku ensiku zagera erhi n’izîno lîrhu lyânayibagirwa, ntâye wacikengêre emirimo yîrhu, obuzîne bwîrhu kwo bwagera nka nshando za citù, bunyâmûke nka lwikungu lwo luhivwa n’emisholo y’izûba, lwo lunyamûka erhi luyumva ehidûrhu hy’izûba”.
5 “Nêci, ensiku zîrhu ziri kugera kwa cizunguzungu, olufù lurhashubira enyuma, ifundo lyàmafundikwa: ntâye ogaluka”.
6 “Erhi hiri eyo! Rhulye ebinjà-binjà, rhukolêse ebiremwa n’obushiru nka bâna ba misole”.
7 “Rhunywe amamvu rhulaluke rhunacîshîge amalâshi, rhurhalindaga obwâso bw’empondo bwahungumuka.”
8 “Rhujire ebimanè bya amauwa ga roza rhuhire oku irhwe, rhujire duba rhurhacihungumuka.”
9 “Harhajiraga owa muli rhwe warhala, ngasi hantu rhulekeho ecêrekane c’obusîme bwîrhu: gwo mwanya gwîrhu co na cigabi cîrhu”».
Erhi rhuhimbe amalala
10 «Omushinganyanya, orhagwêrhi hyâge rhumulibuze, ciru n’omukana, emvi z’omushosi okola mulamu rhurhazikengaga.
11 “Emisî yîrhu libè lyo likola irhegeko ly’obushinganyanya, bulyâla ôrhajira misî ye na busha”.
12 “Rhushimbûlule omushinganyanya bulyâla ye rhusîsire, ashimbulwire olugendo lwîrhu. bulya adwîrhe arhutumuza okuvuna amarhegeko, anadwîrhe arhushobeka obulenzi oku balezi bàrhuleraga”.
13 “Adwîrhe acîkunga mpu ye yîshi Nyamuzinda, anadwîrhe acîderha mugala wa Nyakasane”.
14 “Okubâho kwâge kuli kutumula kw’enkengêro zîrhu, rhukamulolakwo kwône, rhunayumve rhutumwîre”.
15 “Oku ayôrha arhali kwo abandi bayôrha, obwôrhere bwâge bubà bwâgo bwâgo”.
16 “Omu masù gâge rhuli bikabulirwa; kuyâka arhuyaka nka kula bayâka ishembo. Anajè ahamagaza mpu olufù lw’abashinganyanya lubà lw’iragi; n’okucîkunga mpu yêhe Nyamuzinda y’îshe”.
17 “Muleke rhulole erhi ebinwa byâge biri by’okuli, rhusingirize obuzinda bwâge oku bwâbà”.
18 “Akabà omushinganyanya ali mwene Nyamuzinda, Nyamuzinda amuyimangira, amurhenza omu nfune z’abashombanyi bâge”.
19 “Rhurhang’imugera, rhumujâcire, rhumulibuze rhuyîsh’imanya ntyo erhi anali mutûdu, rhwâmanya erhi ayish’ihira omurhima omu nda”.
20 “Rhumutwire olufù lubî, bulya acîkubagîre mpu bamurhabâla”».
Okuhaba kw’enkola-maligo
21 Kwo ziderha ntyôla enkola-maligo, ci kwône kuli kuhaba; obubî bwâbo bunakaz’ibahûsa.
22 Barhishi amahwe ga Nyamuzinda, barhalinga okuhemberwa obushinganyanya, barhanalonza ciru okuyêmêra oku hali oluhembo lw’amaroho gacîre.
23 Nêci, Nyamuzinda alemire omuntu okurhafà, amujira nshusho y’obwôrhere bwâge.
24 Bwâgalwa bwa shetani bwarhumire olufù lujà omu igulu, abamushiga nabo bône bacîbonerakwo.