3
Abashinganyanya n’enkola-maligo
1 Amaroho g’abashinganyanya gôhe, omu nfune za Nyamuzinda gabà, na ntà malibuko gabahikakwo.
2 Omu masù g’abahwinja, ko bali nka abafîre; okurhenga kwâbo hano igulu kwabà nka kuhanyagala,
3 n’okurhusiga kwâbo kwabà nka kuhera, ci kwône bôhe omu murhûla bacîbêrîre.
4 Akabâga omu masù g’abantu buhane bahâbirwe, bâli bayunjwîre bulangâlire bwa kurhafà;
5 oku malibuko masungunu, bâyîsh’ihâbwa binjà binji; kurhangula Nyamuzinda abarhangulaga, anabugâna bamukwânîne.
6 Abarhangula nka masholo omu cibeye, abayankirira nka nterekêro.
7 Olusiku ayish’ibarhandûla kulangashana balangashana, bakanye nka nkunyakunye ya bukere bw’oku nyumpa.
8 Bârhegeka amashanja banalye ebihugo, naye Nyakasane abarhegeka ensiku n’amango.
9 Abacîkuhagîreye bâyumva bwinjà, n’abàli bemêzi babêra aha burhambi bwâge omu buzigire, bulyâla abîshogwa bâge bo babona oburhonyi n’olukogo.
Enkola-maligo
10 Abalenzi, kulya kubà bàlekêrîre omushinganyanya banacîrhenza kuli Nyakasane, bahâbwa obuhane bw’ekengêro zâbo.
11 Nêci bali bahanya abantu bagayaguza oburhirnanya bakagayaguza n’ihano, busha balangâlire, busha badwîrhe barhamira, na ntà bunguke bw’emikolo yâbo;
12 bakâbo basirhe, abâna bâbo bigamba, iburha lyâbo liri lihehêrere.
Aha omuntu akaburha kubî akagumba
13 Iragi lyâge omukazi orhaburha ci arhalikwo ishembo, olya nn’encingo erhahêkwako ishârha; olusiku lw’okurhandûlwa kw’amaroho, lyo babona oku muzîre.
14 Naye ali w’iragi omulume bashahwîre ci kwône wa kuboko kurhakola maligo, arhanagerêreza nkengêro ngalugalu kuli Nyakasane: ashobôla engalo y’okunali oku budahemuka bwâge, mwanya mununu ashobôla omu ngombe ya Nyakasane.
15 Bulyâla obunguke bw’emikolo minjà buyunjwîre irenge, gurhahirigirha omuzî gw’oburhimanya.
16 Ci kwône abâna b’oku lugurhu barhakatwa, iburha ly’omu bugonyi kuherêrekera lyaherêrekere.
17 Ciru bakalama kurhi barhashîbirirwe, bazinda erhi bashosihala buzira irenge;
18 na bakafà duba barhabone calangâliza, barhabone carhûliriza olusiku lw’olubanja;
19 nêci, kuminya ziminya ensiku nzinda z’enyumpa mbî.