Maana dɨnə
Rut
dɨra
Maktubu dɨ ka dwar̰ɨ
Maana dɨnə Rut dɨra da, àlal i aliya gɨ nare nə gɨ ꞌwogɨgɨ «Woni àla sariya» lam gɨ dwãr̰ĩ mana gɨ sɨn̰a dɨ Israyel lə. Aliya gɨ ta di dalawə da, badɨgara dɨ geche ɨndər mana gɨ Israyel, me nare yab nə Israyel ɓɨr̰ɨn̰ wà ha dama ɨsə sɨdəgɨ mana gɨ sɨn̰a dɨ Mowab lə. Mwom da, abe mɨn gɨ Israyel u Rut di deme. Rut di i dwe dɨ Mowab, me tandi kal dusɨdɨ mɨn mana gɨ Mãr̰ĩ gɨnə nare nə Israyel day dɨwə.
Wála mɨn, Rut di tɨrədɨ mar bam, tandi dam gɨ nuwadɨ dɨ Nomi. Mana gɨ nuwadɨ swaa daa kala sɨn̰a dɨ Mowab bam dara cwara hára sɨn̰a dɨra dɨ Israyel lə bi da, Rut di hára gandɨdɨ mɨn. Me Mãr̰ĩ ɗangr̰ɨ mani nə lade dɨrədɨ lə pii. Tandi gɨr ha ꞌywaa abe gɨ ꞌwoo gɨ i tɨrədɨ gɨ mar bam di wiləw. I dara ꞌwoo gɨ abe gɨ ta di me, tandi gɨdɨ nɨm gɨ dole gɨ geche gɨ Dabid gaw, yarna Matiyə 1.5.
Maana dɨ ta di gɨlndɨ dara gun gɨ kalna dusɨw Mãr̰ĩ gɨnə nare nə Israyel day dɨwə da, inam i mɨje kaw, Mãr̰ĩ piy bɨw dɨwə.
Mani nə gechide nə àlal mana gɨ maktubu dɨ ka lə:
Rut gɨn̰ aa gɨ nuwadɨ dɨ Nomi bam (Rut 1)
Rut surəm daga gɨnə Boos lə (Rut 2)
Nomi ɨrɨm mani nə Rut ba àlna (Rut 3)
Boos u Rut deme (Rut 4)
1
Wamani gɨ ɨndara kɨrə nə abe gɨ gɨ ꞌwogɨw Elimelek lə
1 Wála gɨ woni àla sariya lam gɨ dwãr̰ĩ mana gɨ sɨn̰a dɨ Israyel dɨdə da, badɨgara dɨ geche gɨra ɨndər. Mana gɨ ta lə da, abe mɨn gɨ ciri duwa Betɨlehem sɨn̰a dɨ Juda lə, sogɨ day gɨ dyaməw me, dɨndaw sɨr me ba gɨ ha dama mana gɨ sɨn̰a dɨ Mowab lə.
2 Abe gɨ ta di, gɨ ꞌwogɨw Elimelek, me dyaməw, gɨ ꞌwogɨdɨ Nomi, me dɨndaw nə abje nə sɨr di, gɨ mɨn gɨ ꞌwogɨw Malon me, gɨ ɗang, gɨ ꞌwogɨw Kilyon me ca. Nare nə ta di gɨndəgɨ i mage nənə Epɨrata gɨ ciri duwa i Betɨlehem sɨn̰a dɨ Juda lə. Mana gɨ cendi gɨra sɨn̰a dɨ Mowab lə da, cendi dam lə.
3 Targɨn̰ ɗang da, Elimelek gɨnə Nomi tɨrədɨ di mar bam me, tandi wor dam wambɨ mɨnadɨ gɨ dɨndadɨ nə abje nə sɨr di.
4 Dɨndadɨ nə sɨr di lay namde nə sɨn̰a dɨ Mowab lə, dɨ mɨn gɨ ꞌwogɨdɨ Orpa me, dɨ ɗang gɨ ꞌwogɨdɨ Rut me ca. Cendi dam mana gɨ ta lə di nem ya aliya mwaj de.
5 Ɨr̰ɨ Malon me Kilyon me margɨ bam ca dayyə ca, me Nomi di wor dam mɨnadɨ dɨban dɨndadɨ nə sɨr di me, tɨrədɨ di me ca.
Rut bo Nomi ha nɨm Betɨlehem
6 Wála mɨn, Nomi doy dara Aba dama gɨ dɨrəw bɨr̰ɨn̰ ba àl ladni gɨ nare duwa nə sɨn̰a dɨra lə, ba ꞌyàgɨ́ mani nə wama me. Mana gɨ ta lə da, tandi sogɨ gɨ nugɨradɨ nə sɨr di mana gɨ Mowab ba gɨ cor ha sɨn̰a dɨra lə di bi.
7 Cendi sogɨ mana gɨ sɨn̰a dɨ cendi dam lə di hargɨ mɨn gɨ nugɨradɨ nə sɨr di ba gɨ cor ha sɨn̰a dɨ Juda lə di.
8 Mana gɨ cendi gɨr bɨrmə lə da, Nomi waygɨ nugɨradɨ ba da: «Cwarna hana ulay dannə ɗɨm, kal wi kaw cwarna hana kɨrə nə iw lə. Kal Aba dama gɨ dɨrəw bɨr̰ɨn̰ àlna gandang dusi dɨ lade ya ꞌyeni anə banə àlgɨ́ nɨm gɨ tɨrgang nə mar bam ta de me, ya anə banə àl nɨm gandɨn ɨndi de me ca.
9 Kal wi kaw, Aba dama gɨ dɨrəw bɨr̰ɨn̰ ꞌyànáw abe me, ꞌywana ꞌywala mana gɨ ciri duwa dwar̰ɨ lə kɨrə nə tɨrəwə me ca.» Ɨr̰ɨ tandi yɨbɨ nugɨradɨ di sɨdə, me nugɨradɨ di sojɨ gura mar̰ɨjagɨ daa nan̰,
10 me cendi waydɨ da: «Bədə, nə haynin gandi mɨn sɨn̰a dɨnə war̰ay dayyə di bá!»
11 Nomi cor waygɨ da: «Dɨndani ni woni, cwarna hana ulay dannə bi, anə ùr ba nə ha gandɨn ɗang àla na mo? Caga da, aliya ni gaba yàa dine nə abje nə ɗan̰ ha layang da, ilə ɗang mo?
12 Nə amsang dɨndan ni woni, cwarna hana ulay dannə. Nə hal nan̰e, ꞌwoo ni gɨ abe ilə bədə ɗɨm. Dee nə ɨrmɨnə dusɨnnə ba nə nem changa dɨ laba lə dog ꞌya gɨ abe me yàa dine nə abje me kaw,
13 anə ha nyama ɓyadagɨ dara cendi ba jwarbɨna bá mo? Anə ha yəə sɨdəng gɨn̰ə laya abje nə ɗang bam mo? Àlna yande bədə. Dɨndan, ɨndi da, wamani ni ɗoy gɨ dan bam, Aba dama gɨ dɨrəw bɨr̰ɨn̰ yáa ɨsəw àsan wamani dɨ geche di i dɨnnə ɨndi.»
14 Deme nugɨradɨ nə sɨr di nul gura gɨ mar̰ɨjagɨ daa nan̰ ɗang. Targɨn̰ ɗang da, Orpa di yɨ nuwadɨ di sɨdə ɨr̰ɨ cor ha nə war̰adɨ lə ɗɨm. Me Rut dɨra da, wor gandɨdɨ jang.
15 Nomi waydɨ Rut da: «Yər, halay di cor yá ꞌywaa war̰adɨ me ꞌywaa mãr̰ĩ gɨnə war̰adɨ day me ca. Mɨndi kaw, cor ha gandɨdɨ me.»
16 Ɨr̰ɨ Rut codɨ waydɨ da: «Kal ajɨmara gandɨn dara ba nə cwarna hana kalnay bam ɗi.
Mana gɨ də hana lə da,
ɨndi kaw, nə ha hára lə me,
mana gɨ də damna lə da,
ɨndi kaw, nə ha dama lə me ca.
War̰ay da,
ha ꞌya i war̰an ni me,
Mãr̰ĩ diya kaw,
ha ꞌya i Mãr̰ĩ ni me ca.
17 Mana gɨ dɨ marna lə da,
nə ha mara lə me,
i mana gɨ ta lə di me
gɨ ha mõn lə di me ca.
Nə kalnay bam da,
Aba dama gɨ dɨrəw bɨr̰ɨn̰ àsɨnán wamani gɨ geche dɨnnə,
kal ina i made mɨn tenene me
agdɨndɨ tandi.»
18 Mana gɨ Nomi yər dara Rut ùr ba dɨ ha i gandɨdɨ bá da, tandi hoy ajɨmara gɨ gwale di.
19 Cendi hargɨ ca dayyə dɨmgɨ Betɨlehem bá. Mana gɨ cendi gɨr kɨrə Betɨlehem da, nare nə ciri dɨdə pad yɨbdɨ dɨdəgɨ me, namde ùrbɨ sɨdəgɨ ba da: «Ɓag deme dɨ ta di i Nomi di mo?»
20 Me Nomi cogɨ waygɨ da: «ꞌWagɨnan sumi gɨ Nomi gɨ gɨndɨw i sii ꞌywala di bədə ɗɨm, me ꞌwagɨnan sumɨn Mara gɨ gɨndɨw i wamani ɗɨm. Dara Mãr̰ĩ gaba dwana di àsɨ́n wamani gɨ geche dɨnnə.
21 Mana gɨ nə so ka da, nə ha i gɨ mani ni nan̰ ɨsənnə, me Aba dama gɨ dɨrəw bɨr̰ɨn̰ àlan nə cwara ɨsən pəgɨn̰. ꞌWagɨnan Nomi bədə ɗɨm, dara Aba dama gɨ dɨrəw bɨr̰ɨn̰ di àsɨ́n wamani dɨnnə, i sɨdɨ, Mãr̰ĩ gaba dwana con idɨ n̰agɨni ɗɨm.»
22 I yande me Nomi swaa kala sɨn̰a dɨ Mowab bam ba dɨ cor ha sɨn̰a dɨra lə day gɨ nuwadɨ dɨ Rut dɨ gɨndɨdɨ i Mowab di me ca. Wála gɨ cendi gɨra Betɨlehem da, nare ilə gɨlə swagə nə gɨ ꞌwogɨgɨ «orjɨ» lə ɗɨm.