3
Koda꞉na꞉ wekiwandiki
1 Mo Apa꞉ma꞉ niki pa꞉ta꞉ pukima꞉ homa꞉la꞉eki tieke handa꞉pe. Ipika꞉ pukima꞉ homa꞉la꞉ ekita꞉ ota꞉ tieke aneke yalo hata꞉ta꞉ nikita꞉ Koda꞉na꞉ wekiwandiki lelememe. Kota꞉ koto ekina꞉ nikita꞉ ota꞉ ipika꞉ wekiwandikie. Doeki tekena꞉ta꞉ do kenke wanda꞉halima꞉ta꞉ Koda꞉ na handelemeeki yalo niki make na handelememe.
2 Ota꞉ yaka ta꞉ma꞉ni sunuo. Nikita꞉ ameta꞉ Koda꞉na꞉ wekiwandiki ya꞉la꞉pate pa mo wetepena꞉ halo polome ekita꞉ a̱i̱ na peneme yaala꞉me. Koto pa꞉la꞉pate mo Ketiso opolo ipilia꞉ dina꞉ta꞉ nikita꞉ ipikima꞉ kone handulumeke. Pa ekipeke ipikita꞉ ota꞉ ipika꞉ hala꞉eki nika꞉ lekema꞉ handolo polome ekina꞉ loa꞉me.
3 Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me.
4 Ma꞉nda꞉ epita꞉ hoke hau pia꞉ka꞉na꞉ta꞉ Koda꞉na꞉ pi ula꞉eki yamba꞉la꞉la꞉me. Pa ekipeke hoke hauta꞉ Koda꞉na꞉ pi ula꞉eki yamba꞉la꞉la꞉ ekie.
5 Ketiso opolo epeeke ekita꞉ nika꞉ hoke hau mea bawaluekema꞉ a꞉pa꞉la꞉me. Kutupa ipiki pa꞉ta꞉ta꞉ hokeeki ma꞉nda꞉ na ula꞉me laa hone wilimime.
6 Koto ekina꞉ ma꞉nda꞉ epi Ketiso yaapo hone homeke wia ta꞉ma꞉ni pu haya꞉ka꞉na꞉ta꞉ kota꞉ koto someta꞉ hoke hau pa na pu hala꞉me. Pate ma꞉nda꞉ epita꞉ hoke hau pa putia pea꞉ka꞉na꞉ta꞉ kota꞉ koto someta꞉ Ketiso ota꞉ na handa꞉la꞉ make hone na ula꞉me.
7 Yaka wekiwandikio. Ma꞉nda꞉ma꞉ iki na makeaena꞉ lapa꞉peke. Ma꞉nda꞉ epima꞉ ota꞉ hau pia꞉ka꞉na꞉ta꞉ kota꞉ koto someta꞉ mo Ketiso pa꞉la꞉ tupa꞉ tikitiki piki some hala꞉me.
8 Pate ma꞉nda꞉ epima꞉ hoke hau pa putia pea꞉ka꞉na꞉ta꞉ koto someta꞉ mo Hoke Temokona꞉eki hala꞉me. Pa ekipeke mo Hoke Temokoma꞉ta꞉ kini pitolo kone hoke hau pa꞉leke loa꞉me. Mo Koda꞉na꞉ Eiyeke opolo a꞉pa꞉la꞉ ekita꞉ ota꞉ doeki tekena꞉ pa꞉la꞉me. Mo Hoke Temokoma꞉ pa꞉la꞉eki hoeyaaluekema꞉ pa꞉la꞉me.
9 Ma꞉nda꞉ epita꞉ Koda꞉na꞉ eiyeke haya꞉ka꞉na꞉ta꞉ kota꞉ hoke hau pa na putia pu hala꞉me. Pa ekipeke Koda꞉na꞉ da꞉ta꞉la꞉eki kone ipiki pa꞉ta꞉ pila꞉me. Kutupa Koda꞉ta꞉ ipika꞉ Apa꞉ yaalo ipikana꞉ma꞉ hoke hau pa putia pua꞉peke na ya꞉la꞉me.
10 Mo Koda꞉na꞉ wekiwandiki pita꞉ mo Hoke Temokona꞉ wekiwandiki yaapo ata꞉ka꞉ tieke pa꞉la꞉ ekita꞉ dupae. Ma꞉nda꞉ epima꞉ mo ota꞉ hau na pu o ipika꞉ yankeke pukima꞉ na homo pia꞉ka꞉na꞉ta꞉ ipikita꞉ Koda꞉na꞉ weki na hala꞉me.
Pukima꞉ homa꞉ alualu pita꞉la꞉eki
11 Ikana꞉ma꞉ mo hande kini pitolo hata꞉ titina꞉ opimi pita꞉ doe. Nikana꞉ma꞉ta꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hapa꞉peke ya꞉la꞉me.
12 Nikita꞉ mo hande Keinima꞉ na hando hapa꞉peke ya꞉la꞉me. Ipikita꞉ mo Hoke Temokona꞉eki hata꞉ ipika꞉ hameke Eipolo kone lu homaeyekeme. Pa ekipeke lu homaeyekepe. Do ekina꞉yeke loa꞉me. Mo ipika꞉ pieke hau manuta꞉ tikitiki na pitolo haena꞉ ipika꞉ hamekena꞉ hau manuta꞉ tikitiki pikieki yaalo piekeme.
13 Koto ekina꞉ yaka kame tonuo. Do kenke wanda꞉halima꞉ iki honditi pia꞉ka꞉na꞉ta꞉ na penkilipa꞉tia pomia꞉pa꞉peke.
14 Mo homa꞉la꞉eki mina꞉pa꞉lao da꞉ta꞉la꞉eki pa꞉ta꞉ epoloma꞉ ekita꞉ nika꞉ hone uluma꞉me. Koto mo nikana꞉ma꞉ nika꞉ kametonu pa꞉ta꞉ pukima꞉ homo haloma꞉ ekita꞉ hone ulume laa loa꞉me. Ma꞉nda꞉ epima꞉ pukima꞉ na homea꞉ka꞉na꞉ta꞉ ipikita꞉ mo homa꞉la꞉ ekina꞉ honkopu oto pa꞉ta꞉ paa hala꞉me.
15 Ma꞉nda꞉ epima꞉ ipika꞉ hameke honditi pia꞉ka꞉na꞉ta꞉ kota꞉ koto someta꞉ hali lu homaasa꞉ somee. Kutupa ika꞉ hone wilimima꞉ mo hali lu homaasa꞉ someta꞉ da꞉ta꞉la꞉eki ipiki pa꞉ta꞉ na ula꞉me.
16 Nikana꞉ma꞉ mo pukima꞉ homa꞉la꞉ ekita꞉ dupa ya꞉ka꞉ta꞉me laa hone witoloma꞉ ekina꞉ teketa꞉ Ketisoma꞉ta꞉ nika꞉ anketeke mea ipika꞉ da꞉ta꞉la꞉ ekita꞉ halea꞉me. Koto ekina꞉ta꞉ nikana꞉ma꞉ make nika꞉ da꞉ta꞉la꞉ ekima꞉ta꞉ nika꞉ kametonu tamba꞉ muluekema꞉ pa hala꞉peke ya꞉la꞉me.
17 Mo hamoko halima꞉ ipika꞉ hameke ala꞉ta꞉ ma꞉nda꞉ dia꞉ ya꞉la꞉eki handolo hata꞉ kone hameke pa꞉ta꞉ ipika꞉ puki na halea꞉ka꞉na꞉ta꞉ pa ekieki pea ipikana꞉ma꞉ Koda꞉ pa꞉ta꞉ pukima꞉ homolome laa leliepe.
18 Yaka wekiwandikio. Nika꞉ pukima꞉ homoloma꞉ ekita꞉ kakema꞉ homeke o pima꞉ homeke lapeke na ya꞉la꞉me. Dia꞉me. Koto pukima꞉ homa꞉la꞉ ekima꞉ta꞉ pa mo ota꞉eki peneme yaena꞉ nika꞉ kikima꞉ pitolo hata꞉ homekee.
19 Kota꞉ kutu pita꞉la꞉ ekima꞉ta꞉ mo ota꞉eki pa꞉ta꞉ tunaaloma꞉me laa hone ulumeke. Kutupa dupita꞉la꞉ ekima꞉ta꞉ nikana꞉ma꞉ Koda꞉na꞉ leke popelekena꞉ puki hana꞉ nokopoloma꞉ ekie.
20 Pate nika꞉ hone tekema꞉ alo hata꞉ nikita꞉ hoke hau poloma꞉me lea꞉ka꞉na꞉ta꞉ kota꞉ nika꞉ hone uluma꞉ ekita꞉ dupa. Koda꞉ta꞉ nika꞉ hone paeyaona꞉ aneke hali yaalo ipikana꞉ma꞉ ala꞉ta꞉ ala꞉ta꞉ paeyao hone ula꞉me.
21 Koto ekina꞉ yaka pukipiki ta꞉ma꞉ni sunuo. Nika꞉ honema꞉ a꞉nda꞉ niki hoke hau na poloma꞉me lea꞉ka꞉na꞉ta꞉ kota꞉ nikita꞉ Koda꞉na꞉ leke popelekena꞉ puki hana꞉ nokopoloma꞉me.
22 Nikana꞉ma꞉ta꞉ ipika꞉ pi ula꞉ ekimanu opua pitolo make ipiki ta꞉na꞉ homa꞉ tiaasa꞉ haumanu pua halomeketa꞉ kota꞉ nikana꞉ma꞉ ipiki pa꞉ta꞉ honke la꞉la꞉ alemanu mu haloma꞉me.
23 Kutupa ipikana꞉ma꞉ mo niki pa꞉ta꞉ pipee ala꞉ ekita꞉ dupa. Nikana꞉ma꞉ ipika꞉ Eiyeke Yesu Ketiso pa꞉ta꞉ hone tulao hata꞉ make pa mo hande Yesuma꞉ leeke tupa꞉ kone niki ame̱le̱ pukima꞉ homa꞉ alualu pu hapa꞉peke.
24 Ma꞉nda꞉ epima꞉ Koda꞉na꞉ pi ula꞉ ekimanu opua pia꞉ka꞉na꞉ta꞉ ipikita꞉ Koda꞉ yaapo tunao hala꞉ make Koda꞉ta꞉ ipiki yaapo tunao hala꞉me. Kutupa mo Koda꞉ma꞉ niki pa꞉ta꞉ Sipitidi ka꞉leketa꞉ kota꞉ Koda꞉ta꞉ niki ame̱le̱ tunao hala꞉me hone uluma꞉me.