4
1 Eau ea ene wasawasa natuna, ena gogo tauabina wa, ia ma merumeruna ia gonogonoana doha heaheari tauna mo. Ia gogo maudoina tanuagana,
2 taiede ia tauitawata eo tauheata nimadi eai, i lau e huiana tamana i ribaei.
3 Ita hinage doha, ma merumeruda tanoubu kamanidi se auauda.
4 Na huiana mamohoi i lagema, Eaubada ia Natuna i hetamariama, sine arinai se labasi, laugagaeo boeana eai se labasi,
5 isi laugagaeo boeana eai se laulau bena i lebohaidi, ita bena i hegigiorieda, i awa‐natueda.
6 Na paana au hemala ia nanatunayao, arinai Eaubada ia Natuna Earuana i hetamariama nuada eai i eoga i ene, “Aba! Tamagu!”
7 Arinai abotai oa em awa‐heaheari i lautom, u hemala natuna; ena oa natuna oa hinage Eaubada ena gogo tauabina, Keriso debana eai.
8 Bagubaguna eai omi Eaubada nige abina au ata, isi nige eaubada mamohoi se tanuagaemiu ede, au heayaiedi;
9 na huia ta Eaubada abina au atao, ia i nuatuimiu hinage, edohana abo au sinibui ginauri beruberu, ginauri gaibu, aridi eai bena se auauuioimiu?
10 Omi asubenadi eo nawalaidi, huiadi eo borimaidi au heaheasisiedi!
11 Ea matausi ata agu paisoa arimiu eai nige aniona.
12 Egu tataoyao e, ea aibodaimiu bena au hemala doha eau, paana eau hinage doha omi. Omi nige au hebaaeagu;
13 au nuatui buluma iwalana esau debana eai evanelia ea lauguguiaimiu huia bagubagunana eai.
14 Egu lauita bulumagu eai wa nige au isuewai, eo nige au otaotaegu, na au oiyamigu doha eau Eaubada ena aneru esau, doha Keriso Iesu.
15 Emi nualolo au ribaei wa, haedi ie lau? Ea ribaemiu nei huia ne taba gonoamiu abo matamiu au lamohaidi abo au ledima arigu eai.
16 Na ea hemala ami waiunu wa, paana riba mamohoina ea heribamiu?
17 Isi se ribahetausaemiu, nige bena se helolomiu; bena se tore‐murimuriemiu abo omi au ribahetausaedi.
18 Aipate lolodi huia gamagari ta ene se lolo, nige huiadi eau boeamiu eai mo.
19 Egu merumeru gagirimiu e, arimiu eai ea amamna i lau e Keriso se hetubu boeamiu eai!
20 Adeli eau boeamiu eai ina, abo arinagu daguguna i ori, paana nuagu i ponoponoemiu.
21 Au heribagu, omi wa emi gadosisi bena laugagaeo boeana eai au laulau, laugagaeo au ataiei, e nige’e?
22 Paana se uriyao si ene Aberahama ia nanatunayao labui, esau sine auau natuna, esau sine iaiairihai natuna.
23 Na sine auauna natuna buluma dobilana eai se labasi, sine iaiiairihaina natuna ribahesunuma debana eai.
24 Tautau ina; sisine labui ta ede aigora labui. Esau Sinai oea tupina eai i laoma, nanatunayao ma‐auaudi i labalabasidi; ia ede Hagara.
25 Hagara doha Sinai oea tupina, Arabia eai; eo doha Ierusalema ina huia ta, ma‐auauna, ma‐nanatunayao.
26 Na Ierusalema wa ewana eai, ia ma‐iairihaina, eo ia sinada ede.
27 Paana se uriyao,
“U kode, oa sine agaagari, eo nige u haihaisu;
u torohai, u eoga, oa nige u labalaba wa;
paana ia se nuagabaei wa, nanatunayao se gamagari ede,
ia wa ma‐monena se miamia nige doha.” (Is. 54.1.)
28 Egu tataoyao e, ita doha Isaako, ita ribahesunuma nanatunayao ede.
29 Doha nei huia eai ne, ia wa buluma nuatuna eai se labasi, esau wa Earua nuatuna eai se labasi wa i hesohesom, wau ta hinage doha.
30 Na uriuri tabuna i ene edoha? “Sine auauna, ma natuna, au aiduiedi; paana sine auauna natuna taba nige enana i abi‐esegai maena sine iairihaina natuna.” (Gen. 21.10-12.)
31 Arinai egu tataoyao e, ita nige sine auauna nanatunayao, ita sine iairihaina nanatunayao ede.