5
Nige laugagaeo laulauna eai ta laulau, na Earua ena aiainauia.
1 Iairihai miamiana eai Keriso i iairihaidao, arinai au toro adiadidiri, tabu se hehiliuioida auau porohena wa arinai.
2 Eau Paulo ea heribamiu ea ene ena se heperitomemiu, taba nige begana Keriso ena aba‐helolomiu.
3 Ea ribauio ea ene tatao gamagaridi se peritome, besi laugagaeo maudoudoina se miawatai hinage.
4 Oa Keriso arinai u tomgabaeuioim, oa ena laugagaeo eai se heduduraim; ainauia arinai u beuhai.
5 Paana Earua debana eai laulau dudurai sunumana ai sunusunumaei.
6 Paana Keriso Iesu boeana eai se peritome, e nige se peritome, nige i saguida, na sunuma mo, gadosisi eai i paipaisoa.
7 Nabada omi au aitautau lolo, eai i guduguduimiu bena riba mamohoina au awaabiei?
8 Teina nuamiu i oihetaiiri, nige tauyogaimiu arinai i laoma.
9 Obue begana mo, tupina maudoina i seseohi.
10 Eaubada ea sunumai debamiu eai, omi taba nige nuamiu se lau udoi, eo ia aidobu tauhemodemiu wa, ana giru maisana abo i abi.
11 Na egu tataoyao e, eau taba sora peritome ea guguguiai, paana saha se heamamnagu ina? Abotai ta ene aba‐alabesibesi, iaede satauro wa, se laehesuarao wa?
12 Ea henua taba tauhemodemiu se tomgabaeuioidi mo!
13 Egu tataoyao e, iairihai arinai se eogaimiu; ia mo emi iairihai tabu au abi arinai buluma ena huia au mosei, na gadosisi eai au hai‐heayaiuioimiu.
14 Paana laugagaeo maudoina riba esega arinai se abiheohi, iaede ina, “Helem taumia u gadosisiei, doha oabom u gadosisiuioim.”
15 Na ena au aiailetauioimiu, eo au aiaiuioimiu, au komani ata hinage au haiunuuioimiu.
16 Na egu riba ede ina, Earua boeana eai au laulau abo taba nige buluma gadosisidi au laulauwataidi.
17 Paana buluma gadosisidi Earua gadosisina se iaialai eo Earua gadosisina buluma i iaialai; tupo labui ta se haihaihewaiunu, bena se guduguduimiu saha bena au abi, taba nige au abi.
18 Na ena Earua i woeawoeaimiu, laugagaeo nige i tanuagaimiu.
19 Buluma ena paipaisoa se masaraha, isi ede: laulau baaea udoi udoi, laulau bii, matamatae’o,
20 oitau tabaohuna, tabutabusima, hewaiunu, haisaesae, aiaromagigiri, ouyalayala, nuanuatuuio, biribiri, abiabipele,
21 lelehi, nomnom‐eauyaure, hemahemanabara, eo ginauri headi doha. Ea ribahesanapuemiu, doha nabada ea heribamiu wa, isi laulau ta tauabidi taba nige Eaubada ena basileia se abi enadi.
22 Na Earua uauana ede gadosisi, kode, nuabiga, nuapaipai, taubiga, abilolo, miatahitahi,
23 manamanabiga, nige saha ta abi daoi; teina ginauri ta nige laugagaeodi.
24 Isi Keriso Iesu enanayao buluma se hesatauroyao, ma‐gadosisina, ma‐lelehina.
25 Ena Earua debana eai ta miamia, Earua debana eai hinage bena ta laulau.
26 Tabu nuasaesae arida eai ie ota, tabu ita esau, esau ta hai‐hesohesom, tabu to hai‐aiaromagigiri.