Jénesis
1
Nai Maromak halo lalehan, rai ho buat hotu-hotu iha laran
1 Hori uluk liu Maromak halo lalehan ho rai.
2 Iha tempu nebaa mundu mamuk hela, seidauk forma, bee deit mak iha. Nakukun taka metin bee nee, no Maromak nia Espiritu baa-mai iha bee nia leten.
3 Maromak hatete, “Tenki iha naroman.” Naroman mos iha.
4 Maromak haree katak naroman nee diak. Depois Nia haketak tiha naroman nee husi nakukun.
5 Nia hanaran naroman nee “loron”, nakukun nee Nia bolu “kalan”. Rai kalan tiha, depois tama fali ba dadeer, nee mak loron primeiru.
6-7 Maromak hatete, “Tenki iha buat ida iha bee nia klaran hodi fahe bee nee ba parte leten ho parte kraik.” Akontese nunee duni. Maromak fahe bee nee ba parte leten ho parte kraik.
8 Buat nebee fahe bee nee Maromak bolu “lalehan”. Rai kalan tiha, depois tama fali ba dadeer, nee mak loron rua.
9 Maromak hatete, “Bee iha parte okos tenki nalihun hamutuk iha fatin ida, atu nunee bele iha rai maran.” Akontese nunee duni.
10 Parte maran nee, Nia bolu “rai”, bee nebee nalihun hamutuk nee, Nia hanaran “tasi”. Maromak haree katak buat sira nee diak.
11 Depois Maromak hatete, “Rai tenki foo moris ai horis oi-oin. Tenki iha ai horis nebee foo musan, ho ai nebee foo fuan ho musan iha laran, tuir ida-idak nia tipu.” Akontese nunee duni.
12 Rai foo moris ai horis nebee foo musan ho ai nebee foo fuan, tuir ida-idak nia tipu. Maromak haree katak buat sira nee diak.
13 Rai kalan tiha, depois tama fali ba dadeer, nee mak loron tolu.
14 Maromak hatete, “Tenki iha ahi oan iha lalehan para haketak loron ho kalan. Ahi oan sira nee sai sinal hodi hatudu ba tempu, loron ho mos tinan.
15 Ahi oan nee sei leno husi lalehan hodi foo naroman ba rai.” Akontese nunee duni.
16 Maromak halo ahi oan boot rua. Ida nebee leno makaas liu mak domina tempu loron, ida kiik mak domina tempu kalan. Nia mos halo fitun sira.
17 Nia tau buat sira nee iha lalehan hodi foo naroman ba rai,
18 hodi domina tempu loron ho tempu kalan, hodi haketak naroman husi nakukun. Maromak haree katak buat sira nee diak.
19 Rai kalan tiha, depois tama fali ba dadeer, nee mak loron haat.
20 Maromak hatete, “Iha bee laran tenki iha ikan bar-barak ho buat sel-seluk tan nebee moris iha bee laran. Tenki iha mos manu fuik oi-oin semo ba-mai iha lalehan.”
21 Nunee Maromak halo animal bo-boot nebee moris iha tasi laran, ho buat oi-oin tan nebee moris iha bee laran. Nia mos halo manu fuik oi-oin, ida-idak tuir nia tipu. Maromak haree katak buat sira nee diak.
22 Depois Maromak foo bensaun ba animal sira nee, Nia haruka sira dehan, “Imi iha oan barak ba. Imi nia jerasaun sai barak ba hodi halo nakonu tasi laran. Manu fuik mos tenki aumenta barak iha mundu.”
23 Rai kalan tiha, depois tama fali ba dadeer, nee mak loron lima.
24 Maromak hatete, “Tenki iha animal oi-oin moris iha rai maran: animal hakiak, animal fuik, ho animal nebee dolar iha rai, ida-idak tuir nia tipu.” Akontese nunee duni.
25 Maromak halo animal fuik, animal hakiak, ho animal nebee dolar iha rai, ida-idak tuir nia tipu. Maromak haree katak buat sira nee diak.
26 Depois Maromak hatete, “Mai Ita halo ema tuir Ita nia ilas, hanesan Ita nia Aan, para sira bele ukun ikan sira iha tasi, manu fuik sira, animal hakiak sira, animal fuik hotu-hotu iha rai, ho animal hotu nebee dolar iha rai.”
27 Nunee Maromak halo ema hanesan Nia Aan,
tuir Nia ilas.
Nia halo sira mane ho feto.
28 Maromak foo bensaun ba sira, Nia haruka dehan, “Imi iha oan barak ba. Imi nia jerasaun sai barak ba hodi halo nakonu mundu. Imi sei toma konta mundu nee hodi ukun ikan iha tasi laran, manu fuik, ho animal hotu-hotu nebee moris iha rai.”
29 Maromak dehan tan, “Rona di-diak! Hau foo ai horis oi-oin atu sai imi nia hahaan: ai horis saida deit iha mundu tomak mak foo musan, ho ai saida deit mak foo fuan ho musan iha laran.
30 Hau mos foo ai tahan matak ho duut hotu-hotu atu sai hahaan ba saida deit mak iha iis: ba animal sira nebee moris iha rai, manu fuik sira, ho animal hotu-hotu nebee dolar iha rai.” Akontese nunee duni.
31 Maromak hateke ba buat hotu nebee Nia halo ona nee, Nia haree ba diak teb-tebes. Rai kalan tiha, depois tama fali ba dadeer, nee mak loron neen.