2
1 Nunee Maromak halo hotu lalehan ho rai, ho buat hotu-hotu iha laran.
2 Too iha loron hitu, Maromak nia servisu nee remata tiha ona. Nunee iha loron hitu nee Nia deskansa.
3 Maromak foo bensaun ba loron hitu nee sai loron boot Maromak nian, tanba iha loron nee Nia deskansa, Nia servisu halo lalehan ho rai hotu tiha ona.
4a Nee mak istoria Maromak halo lalehan ho rai.
Nai Maromak halo mane ho feto primeiru
(Mateus 19:4-6; Marcos 10:4-9; 1 Korintu 6:16; 15:45,47; Éfezu 5:31-33)
4b Bainhira NAI Maromak foin halo lalehan ho rai,
5 seidauk iha duut ka ai horis ida, tanba NAI seidauk halo udan tuun ba rai, no seidauk iha ema atu halo toos.
6 Abu-abu sae husi rai hodi habokon rai tomak.
7 Iha tempu nebaa NAI Maromak foti rai hodi halo ema mane ida. Depois Nia huu iis moris nian ba ema nee nia inus laran, nunee ema nee moris.
8 Hotu tiha NAI Maromak halo toos ida iha rai Eden, iha parte lorosae nian. Ema nebee Nia halo nee Nia tau iha nebaa.
9 NAI Maromak halo ai huun mesak di-diak deit moris iha toos nee. Ai huun hirak nee haree ba furak teb-tebes, no diak ba ema hodi haan nia fuan. Iha toos nee nia klaran iha ai huun moris rohan-laek nian. Iha mos ai huun ida, nia fuan halo ema bele hatene saida mak diak, saida mak aat.
10 Iha mota ida suli husi Eden hodi foo bee ba iha toos nee. Mota nee fahe ba haat.
11 Mota primeiru naran Pizón, ida nee haleu rai Havila. Iha nebaa iha osan mean,
12 osan mean iha rai nee mesak kualidade diak. Iha mos ai been morin naran bedéliu ho fatuk murak oniks.
13 Mota segundu naran Gióm, mota nee haleu rai Kuxe.
14 Mota terseiru naran Tigre, ida nee iha rai Asíria nia sorin parte lorosae nian. Mota haat naran Eufrates.
15 NAI Maromak lori ema nee baa tau iha toos Eden para servisu hodi tau matan ba toos nee.
16 Nia foo orden ba ema nee dehan, “Ai huun hotu-hotu iha toos nee, o bele haan nia fuan.
17 So iha ai huun ida deit mak o la bele haan nia fuan, nee mak ai fuan nebee halo ema hatene saida mak diak, saida mak aat. Se o haan, entaun iha loron nee kedas o mate.”
18 Depois NAI Maromak dehan, “Ema nee moris mesak deit la diak. Hau sei halo nia maluk ida para tulun nia.”
19-20 Nunee NAI foti rai hodi halo animal hotu-hotu nebee moris iha rai ho manu fuik hotu-hotu. Animal nebee Nia halo nee, Nia lori ba ema nee para bele hatene ema nee atu foo naran saida. Ema nee foo naran ba animal hakiak ho fuik, no mos ba manu fuik hotu-hotu. Naran nebee mak nia temi ba animal ida-idak, ida nee mak sai animal nee nia naran. Maibee husi animal sira nee, la iha ida mak bele sai ema nee nia maluk hodi tulun nia.
21 Entaun NAI Maromak halo ema nee toba dukur liu tiha. Bainhira ema nee toba dukur ona, NAI hasai nia ruin knosen ida, depois foti nia isin uitoan hodi taka ba knosen fatin nee halo tomak fali.
22 Husi ruin knosen nebee Nia hasai husi mane nee, NAI halo feto ida. Hotu tiha Nia lori feto nee baa aprezenta ba mane.
23 Mane nee dehan,
“Nee mak foin par ho hau!
Nia ruin hasai husi hau nia ruin,
nia isin hasai husi hau nia isin.
Hau bolu nia ‘feto’
tanba nia sai husi mane.”
24 Tanba nee, mane sei husik nia inan-aman hodi moris neon ida laran ida ho nia feen, nunee sira nain rua sai ona ida.
25 Iha tempu nebaa, sira nain rua isin molik. Maski nunee sira la moe.