3
Ema primeiru monu ba sala
1 Husi animal fuik hotu nebee NAI Maromak halo, samea mak matenek fila lia. Iha loron ida, samea husu ba feto, “Maromak bandu dehan, ‘Ai huun hotu-hotu iha toos nee imi la bele haan nia fuan,’ loos ka lae?”
2 Feto hataan ba samea, “Laos nunee. Maromak dehan, ai hotu-hotu iha toos nee ami bele haan nia fuan.
3 So iha ai huun ida nebee moris iha toos nia klaran mak Maromak bandu ami la bele haan nia fuan. Atu kaer kona deit mos la bele, se lae ami mate.”
4 Maibee samea hataan fali dehan, “Imi la mate ida!
5 Maromak bandu nunee tanba Nia hatene katak bainhira imi haan ai nee nia fuan, imi nia matan sei nakloke, imi sei sai hanesan Maromak hodi hatene saida mak diak, saida mak aat.”
6 Feto haree ai huun nee nia fuan diak para haan, ai fuan nee mos furak iha nia matan, no bele halo nia sai matenek. Entaun nia kuu ai fuan, nia haan tiha. Nia laen mos iha nebaa. Nia foo balu ba nia laen, depois nia laen mos haan.
7 Derepenti sira nain rua nia matan nakloke, sira hatene aan katak sira isin molik hela. Entaun sira suku hamutuk ai figeira tahan hodi taka sira nia isin molik nee.
8 Iha lokraik, rai malirin ona, sira nain rua rona NAI Maromak lao iha toos laran. Nunee mane ho nia feen subar iha ai huun nia leet iha toos laran atu nunee NAI la bele haree hetan sira.
9 Maibee NAI Maromak bolu mane hodi dehan, “O iha nebee?”
10 Mane hataan, “Hau rona Ita Boot lao hela iha toos laran, hau tauk tanba hau isin molik hela. Nee mak hau subar.”
11 NAI hatete, “See mak foo hatene ba o dehan o molik? O haan tiha ona ai fuan nebee Hau bandu nee ka?”
12 Mane hataan, “Feto ida nebee Ita Boot foo para hamaluk hau nee, nia mak foo ai fuan nee mai hau, depois hau haan.”
13 Depois NAI Maromak hatete ba feto, “O halo saida mak nee?!”
Feto hataan, “Samea mak bosok hau. Nee mak hau haan.”
14 Nunee NAI Maromak hatete ba samea, “Tanba o halo nunee, Hau foo malisan ba o. Husi animal hakiak ho animal fuik hotu-hotu, malisan nee kona deit o. Komesa agora, o sei dolar deit iha rai ho o nia kabun. Iha o nia moris tomak o sei haan rai rahun.
15 Hau sei halo o ho feto nee sai inimigu ba malu, imi nain rua nia jerasaun sira mos sei odi malu. Feto nee nia jerasaun sei sama rahun o nia ulun, o sei tata nia jerasaun nee nia ain tuban.”
16 NAI Maromak hatete ba feto, “Hau sei aumenta makaas o nia terus bainhira o isin rua. Bainhira o tuur ahi mos o sei senti moras teb-tebes. Maski nunee, o nia laran sei hakarak nafatin o nia laen, no nia sei domina o.”
17 NAI Maromak hatete ba mane, “Tanba o halo tuir o nia feen nia liafuan hodi haan tiha ai fuan nebee mak Hau bandu o la bele haan, entaun Hau foo malisan ba rai. Nunee durante o nia moris tomak, o servisu mate aan mak foin hetan hahaan husi rai.
18 Rai sei foo duut aat ho ai tarak oi-oin. Maski nunee o sei haan ai horis nebee moris iha rai.
19 O servisu too kosar been suli mak foin iha ai haan. Too ikus o fila fali ba rai, tanba Hau halo o husi rai. O mai husi rai, o tenki fila fali ba rai.”
20 Mane nee naran Adão. Nia foo naran ba nia kaben Eva, tanba nia sei sai ema hotu-hotu nia inan.
21 Iha tempu nebaa, NAI Maromak halo hena husi animal nia kulit, foo ba sira nain rua hatais.
22 Depois NAI Maromak dehan, “Agora, ema nee sai ona hanesan Ita hodi hatene saida mak diak, saida mak aat. Keta halo be sira lolo liman hodi kuu tan ai fuan husi ai huun moris rohan-laek nian. Se sira haan, sira bele moris tinan ba tinan.”
23 Entaun NAI Maromak duni sai tiha sira husi toos Eden. Ema mai husi rai, agora NAI haruka sira fila rai hodi halo toos.
24 Duni sai tiha sira, Nia haruka kerubin sira halo seguransa iha toos Eden nia parte lorosae, Nia mos monta surik ida lakan hanesan ahi, surik nee dulas ba-mai. Kerubin ho surik nee kontrola dalan ba ai huun moris rohan-laek nian.