4
Kaín oho nia alin Abel
1 Adão moris hamutuk ho nia kaben Eva. Depois Eva isin rua, nia tuur ahi oan mane ida. Labarik nee naran Kaín, tanba Eva dehan, “Ho NAI nia tulun hau hetan oan mane ida.”
2 Depois Eva tuur ahi tan oan mane ida naran Abel. Bainhira sira nain rua boot ona, Abel sai bibi atan, Kaín sai toos nain.
3 Iha loron ida, Kaín lori ai haan balu husi nia toos hodi foo oferta ba NAI Maromak.
4 Abel mos fihir bibi oan nebee moris primeiru. Bibi nee nia oho tiha, depois nia lori naan nebee iha bokur nudar nia oferta. NAI nia laran haksolok ho Abel ho nia oferta nee,
5 maibee Nia laran la kontenti ho Kaín ho nia oferta, entaun Kaín hirus loos, nia oin buis.
6 NAI Maromak husu ba Kaín, “Nusaa mak o hirus? Nusaa mak o nia oin buis?
7 Se karik o halo buat nebee loos, Hau mos simu o ho diak. Maibee se o la halo buat nebee loos, entaun pekadu hanesan animal siak ida nebee hein hela iha odamatan hodi hafuhu o. Nia hakarak estraga o, maibee o tenki domina nia.”
8 Iha loron ida, Kaín hatete ba nia alin Abel, “Mai ita baa iha rai fuik.” Too iha nebaa, derepenti deit Kaín ataka nia alin hodi oho tiha nia.
9 Depois NAI Maromak husu ba Kaín, “O nia alin Abel iha nebee?”
Kaín hataan, “Hau la hatene! Hau mak tenki tau matan ba hau nia alin ka?”
10 NAI dehan, “O halo saida mak nee? Rona mai! O nia alin nia raan hakilar husi rai hodi husu justisa mai Hau.
11 Agora malisan kona ona o. Tanba rai loke ona ibun hodi simu o nia alin nia raan husi o nia liman.
12 Komesa agora, bainhira o halo toos, rai la foo tan rezultadu ba o. O nia moris la hakmatek, o sai ema lao rai iha mundu nee.”
13 Kaín hataan ba NAI dehan, “Kastigu nee todan demais, too hau la aguenta.
14 Ohin loron Ita Boot duni sai hau husi rai nee, entaun hau sei dook husi Ita Boot. Hau nia moris sei la hakmatek, hau sai ema lao rai iha mundu nee. See deit mak hasoru hau, sei oho hau.”
15 NAI Maromak hataan fali dehan, “Laos nunee! See mak oho o, nia sei hetan kastigu todan liu dala hitu.” NAI tau marka ida ba Kaín, para ema nebee hetan nia la bele oho nia.
16 Depois Kaín sai tiha husi NAI nia oin. Nia baa hela iha fatin ida naran Nod, iha toos Eden nia sorin lorosae.
Kaín nia jerasaun
17 Kaín moris hamutuk ho nia kaben. Depois nia kaben isin rua, tuur ahi oan mane ida naran Enoke. Kaín harii aldeia ida, nia tau naran ba aldeia nee Enoke, tuir nia oan nia naran.
18 Enoke nee hetan oan mane ida naran Irad. Irad nia oan, Meujael. Meujael nia oan, Metusael. Metusael nia oan, Lamek.
19 Lamek kaben ho feto nain rua. Ida naran Ada, ida tan naran Zila.
20 Ada tuur ahi oan mane ida naran Jabál, nia jerasaun sira hela iha tenda hodi hakiak animal.
21 Jabál nia alin mane naran Jubál. Jubál nia jerasaun sira sai tokador muzika, sira toka viola no huu flauta.
22 Lamek nia kaben Zila tuur ahi oan mane ida naran Tubal-Kaín, nia sai badaen besi hodi halo sasaan oi-oin husi riti ho besi. Tubal-Kaín iha feton ida naran Naama.
23 Loron ida, Lamek gaba nia aan iha nia kaben nain rua nee nia oin dehan,
“Ada ho Zila, see tilun mai!
Lamek nia feen sira, rona hau nia liafuan nee.
Hau oho ema ida tanba nia halo kanek hau;
hau baku mate joven ida tanba nia baku hau.
24 See mak oho Kaín karik, nia hetan kastigu todan liu dala hitu,
maibee see mak oho hau, nia hetan kastigu todan liu dala hitu-nulu resin hitu.”
Adão nia oan Set
25 Adão nia kaben Eva hetan tan oan mane ida. Eva foo naran ba labarik nee Set, tanba nia dehan, “Maromak foo tan oan ida mai hau hodi troka Abel, tanba Kaín oho tiha nia.”
26 Set iha oan mane ida, nia foo naran Enos. Iha tempu nee mak ema komesa temi NAI Maromak nia naran hodi adora Nia.