5
Adão nia jerasaun too Noé ho nia oan sira
1-2 Bainhira Maromak kria ema, Nia halo sira hanesan Nia Aan rasik. Nia kria sira mane ho feto. Depois Nia foo bensaun ba sira. Nia hanaran sira “Ema”. Ema ida primeiru naran Adão, nia jerasaun sira hanesan tuir mai nee.
3 Bainhira Adão tinan 130, nia hetan oan mane ida hanesan nia aan, tuir nia ilas. Nia tau naran ba labarik nee Set.
4 Adão sei moris tan tinan 800. Nia hetan tan oan mane ho oan feto.
5 Nia mate ho tinan 930.
6 Bainhira Set tinan 105, nia hetan oan mane ida naran Enos.
7 Set sei moris tan tinan 807. Nia hetan tan oan mane ho oan feto.
8 Nia mate ho tinan 912.
9 Bainhira Enos tinan 90, nia hetan oan mane ida naran Kenán.
10 Enos sei moris tan tinan 815. Nia hetan tan oan mane ho oan feto.
11 Nia mate ho tinan 905.
12 Bainhira Kenán tinan 70, nia hetan oan mane ida naran Mahalalel.
13 Kenán sei moris tan tinan 840. Nia hetan tan oan mane ho oan feto.
14 Nia mate ho tinan 910.
15 Bainhira Mahalalel tinan 65, nia hetan oan mane ida naran Jared.
16 Mahalalel sei moris tan tinan 830. Nia hetan tan oan mane ho oan feto.
17 Nia mate ho tinan 895.
18 Bainhira Jared tinan 162, nia hetan oan mane ida naran Enoke.
19 Jared sei moris tan tinan 800. Nia hetan tan oan mane ho oan feto.
20 Nia mate ho tinan 962.
21 Bainhira Enoke tinan 65, nia hetan oan mane ida naran Metuselá.
22 Depois Enoke moris neon ida laran ida ho Maromak too tinan 300 tan. Nia mos hetan tan oan mane ho oan feto.
23-24 Enoke moris neon ida laran ida nafatin ho Maromak. Kuandu nia tinan 365, derepenti nia la iha tiha, tanba Maromak lori tiha nia.
25 Bainhira Metuselá tinan 187, nia hetan oan mane ida naran Lamek.
26 Metuselá sei moris tan tinan 782. Nia hetan tan oan mane ho oan feto.
27 Nia mate ho tinan 969.
28 Bainhira Lamek tinan 182, nia hetan oan mane ida.
29 Nia foo naran ba labarik nee Noé, tanba nia dehan, “Iha rai nebee NAI Maromak foo malisan nee, ita servisu mate aan, maibee labarik nee sei halo kamaan ita nia servisu.”
30 Lamek sei moris tan tinan 595. Nia hetan tan oan mane ho oan feto.
31 Nia mate ho tinan 777.
32 Bainhira Noé nia tinan 500 ona, nia hetan oan mane nain tolu: Sem, Kam ho Jafet.