6
Ema nia hahalok aat
1-2 Ema aumenta barak ba beibeik too moris namkari iha mundu. Sira nia oan feto bonita loos. Oan mane Maromak nian, sira haree ema nia oan feto sira nee oin bonita, nunee sira hili feto nee tuir sira nia hakarak hodi sai sira nia feen.
3 Entaun NAI Maromak hatete, “Hau lakohi atu Hau nia iis hela nafatin iha ema too tinan ba tinan. Sira nee isin ho raan, sira sei moris too deit tinan atus ida rua-nulu.”
4 Bainhira oan mane Maromak nian hola ema nia oan feto, sira hetan oan mesak rasa boot deit. Ema rasa boot sira nee moris iha mundu iha tempu nebaa ho mos iha tempu tuir mai. Sira nee aswain, no naran boot.
5 NAI Maromak haree ema iha mundu nee nia hahalok aat teb-tebes, sira nia hanoin mos mesak aat hela deit.
6 Nunee NAI arepende tanba Nia halo ona ema iha mundu, Nia laran susar teb-tebes.
7 Entaun NAI hatete, “Ema nebee Hau halo tiha ona nee, Hau sei dasa moos tiha hotu husi mundu. Animal nebee lao, animal nebee dolar iha rai ho manu fuik sira mos, Hau sei dasa moos tiha hotu. Hau arepende tanba Hau halo ona sira.”
8 So Noé deit mak halo haksolok NAI Maromak nia laran.
Noé nia istoria
9-10 Noé nia istoria hanesan tuir mai nee. Nia iha oan mane nain tolu, naran Sem, Kam ho Jafet. Noé nee ema ida nebee moris loos. Husi ema sira iha tempu nebaa, so nia deit mak ema diak. Nia moris neon ida laran ida ho Maromak.
11 Maibee Maromak haree ema sira seluk mesak aat hotu, no mundu nakonu ho violensia.
12 Nia haree ba, mundu nee aat teb-tebes, tanba ema nia hahalok mesak aat hotu deit.
13 Nunee Maromak dehan ba Noé, “Hau desidi atu halo mohu tiha buat moris hotu-hotu, tanba iha nebee-nebee deit ema gosta halo violensia ba malu. Tebes! Hau atu harahun ona mundu ho buat hotu-hotu iha laran.
14 Agora o tenki halo roo boot ida husi ai diak nian ba o nia aan. Roo nia laran, fahe ba kuartu-kuartu. Nia liur-laran, taka ho alkatraun.
15 Halo nia naruk metru 130, nia luan metru 22, ho nia aas metru 13.
16 Roo nee tenki iha nia kakuluk. Iha kakuluk nia okos halo janela haleu roo tomak, janela nia aas metru sorin balu. Fahe roo nee halo andar tolu, o tenki halo odamatan ida iha roo nia sorin.
17 Hanoin di-diak! Hau sei halo bee boot sae iha rai tomak hodi halo mout tiha buat moris hotu-hotu iha rai. Buat hotu iha rai sei mate mohu.
18 Maibee Hau sei halo aliansa ho o. O sei tama ba iha roo laran, hamutuk ho o nia oan sira, o nia feen ho o nia feto foun sira.
19 Husi animal sira hotu, o tenki lori par ida-ida, inan ida ho aman ida hodi hatama ba iha roo laran, para sira mos bele moris.
20 Manu fuik, animal ho mos animal sira nebee dolar iha rai, sei mai ru-rua, tuir ida-idak nia tipu, para bele moris.
21 O mos tenki lori hahaan oi-oin hodi rai ba imi nia aan ho mos ba animal sira.”
22 Noé halo tuir, nia halo buat hotu nebee mak Maromak haruka.