7
Rai nabeen
1 Depois NAI Maromak hatete ba Noé, “Agora o tenki tama hotu ba iha roo laran hamutuk ho o nia familia tomak, tanba Hau haree ba iha nebee-nebee, so o mesak deit mak moris loos.
2-3 Husi animal hotu-hotu nebee ema bele haan, o tenki lori par hitu-hitu tama ba roo laran. Husi manu fuik hotu-hotu mos lori par hitu-hitu. Maibee animal sira seluk, lori deit par ida-ida. Par ida-idak iha inan ida, aman ida. Nunee animal sira nee hotu sai fini, para sira nia jerasaun bele moris nafatin iha mundu tomak.
4 Hanoin di-diak! Hela loron hitu tan Hau atu halo udan tuun durante loron haat-nulu, kalan haat-nulu. Buat moris hotu-hotu nebee Hau halo ona, Hau sei dasa moos tiha husi rai klaran.”
5 Noé mos halo tuir buat hotu nebee mak NAI Maromak haruka.
6 Momentu udan boot mai, Noé nia tinan 600.
7 Noé ho nia oan sira, nia feen ho nia feto foun sira tama ba roo laran, para bee boot mai, sira bele salva aan.
8-9 Animal sira mai ru-rua, inan ho aman hodi tama iha roo laran hamutuk ho Noé. Animal nebee mak ema bele haan, animal nebee bandu la bele haan, ho mos manu fuik ho animal nebee mak dolar iha rai, par ida-ida tama ba roo laran tuir Maromak nia orden ba Noé.
10 Liu tiha loron hitu, bee boot komesa taka mundu.
11 Bainhira Noé tinan 600, iha loron 17, fulan rua, bee matan hotu-hotu nakfera too bee boot nebee iha rai okos haksoit sai. Odamatan lalehan nakloke, halo udan tuun makaas.
12 Udan nee la para too loron haat-nulu, kalan haat-nulu.
13 Maibee iha loron nee kedas Noé, nia oan nain tolu Sem, Kam ho Jafet, nia feen ho nia feto foun sira tama hotu ba roo laran.
14 Sira tama hamutuk ho animal sira hotu: animal hakiak ho animal fuik, animal nebee dolar iha rai, manu fuik ho buat sira seluk nebee mak iha liras.
15-16 Par ida-ida husi buat hotu-hotu nebee iha iis moris nian, tama ba roo laran hamutuk ho Noé, tuir Maromak nia orden. Hotu tiha NAI Maromak taka roo nia odamatan.
17 Bee sae durante loron haat-nulu. Bee aumenta halo roo namlele aas tiha.
18 Bee aumenta makaas tan too domina mundu, roo namlele deit iha bee leten.
19 Bee kontinua sae makaas loos too foho aas sira mos mout hotu.
20 Bee nee sae nafatin, too liu tiha foho tutun sira nee metru hitu.
21-22 Nunee buat hotu-hotu nebee moris iha rai maran mate mohu. Manu fuik, animal hakiak, animal fuik ho animal nebee mak dolar iha rai, hotu-hotu mate. Ema mos mate mohu.
23 Buat moris hotu-hotu iha mundu nee Maromak dasa moos hotu: ema ho animal, ho animal nebee dolar iha rai, ho manu fuik sira, dasa moos tiha husi mundu. So Noé deit mak moris, ho mos ema ho animal sira nebee mak hamutuk ho nia iha roo laran.
24 Bee nee taka mundu tomak durante fulan lima.