8
Rai komesa maran
1 Maibee Maromak la haluha Noé ho animal fuik ho animal hakiak hotu-hotu nebee hamutuk ho Noé iha roo laran. Nunee Nia haruka anin huu, halo bee tuun dadauk.
2 Nia taka bee matan sira nebee mak nakfera, Nia mos taka fali odamatan lalehan nian, udan mos para tiha.
3 Entaun bee menus ba dadauk. Liu tiha fulan lima, bee laduun aas ona.
4 Natoon iha loron 17, fulan hitu, roo nee para iha foho aas Ararat.
5 Bee tuun beibeik, too iha loron primeiru, fulan sanulu, foho sira nia tutun komesa sai fali ona.
6 Liu tiha loron haat-nulu, Noé loke janela nebee uluk nia halo iha roo nee
7 hodi husik manu metan ida. Manu nee semo ba-mai too bee maran.
8 Noé hakarak hatene bee nee tuun ona ka seidauk, nunee nia husik tan manu pombu ida.
9 Maibee manu nee la hetan fatin hodi tuur tanba bee sei nakonu hela iha mundu tomak, entaun manu nee fila fali ba roo. Nunee Noé lolo nia liman hodi simu manu nee ba roo laran.
10 Noé hein loron hitu tan, depois nia husik fali manu pombu nee.
11 Iha lokraik, manu nee fila fali ba Noé lori ai oliveira nia dikin nurak iha nia ibun. Entaun Noé hatene katak bee tuun tiha ona.
12 Nia hein loron hitu tan, depois nia husik fali manu pombu nee. Maibee manu nee la fila ona.
13 Bainhira Noé tinan 601, iha loron primeiru, fulan primeiru, bee tuun tiha ona. Nia loke roo nia kakuluk hodi haree ba-mai, rai maran dadauk ona.
14 Too iha loron 27, fulan rua, rai maran loos ona.
15 Depois Maromak hatete ba Noé nunee:
16 “Tuun ona husi roo, hamutuk ho o nia feen, o nia oan sira ho o nia feto foun sira.
17 Animal hotu-hotu nebee hamutuk ho o iha roo laran nee, lori sai hotu, atu manu fuik ka, animal ka, animal nebee dolar iha rai. Nunee sira bele iha oan barak, sira nia jerasaun bele sai barak hodi halo nakonu mundu.”
18 Nunee Noé sai husi roo hamutuk ho nia oan sira, nia feen ho nia feto foun sira.
19 Animal, animal nebee dolar iha rai ho mos manu fuik hotu-hotu sai husi roo. Animal hotu-hotu nebee moris iha rai maran sai husi roo, ida-idak tuir nia grupu.
Noé halo sakrifisiu ba Nai Maromak
20 Depois Noé hada fatuk hodi halo altar ida ba NAI Maromak. Husi animal ho manu sira nebee mak bele uza hodi halo sakrifisiu ida nee, nia hasai ida-ida, depois nia oho hodi tunu mutuk tiha iha altar.
21 Bainhira NAI horon sakrifisiu nee nia morin, Nia hanoin dehan, “Hau sei la foo tan malisan ba mundu tuir ema nia hahalok, maski ema hanoin deit buat aat dezde sira kiik. Hau sei la halo mohu tan buat hotu nebee moris, hanesan Hau halo tiha ona.
22 Durante mundu nee sei iha, tempu kuda ho tempu kuu, tempu malirin ho tempu manas, tempu bailoro ho tempu udan, loron ho kalan sei la remata.”