9
Nai Maromak halo promesa ba Noé
1 Depois Maromak foo bensaun ba Noé ho nia oan sira dehan, “Imi iha oan barak ba. Imi nia jerasaun sai barak ba hodi halo nakonu mundu.
2 Animal sira nebee moris iha rai leten, animal sira nebee dolar iha rai, manu fuik sira ho ikan sira iha tasi laran, sei tauk teb-tebes imi. Hau entrega sira nee hotu ba imi nia liman laran.
3 Hahuu agora, imi bele haan animal sira nee hotu nia naan. Hau foo buat sira nee hotu ba imi nudar imi nia ai haan, hanesan mos uluk Hau foo ai horis oi-oin atu imi haan.
4 Maibee imi la bele haan naan nebee mak sei iha raan, tanba raan mak huun ba animal nia moris.
5 Kona ba imi nia moris, ema ka animal ruma nebee mak halo mate ema, tenki simu todan.
6 See deit mak halo ema nia raan fakar, ema mos tenki fakar nia raan, tanba Maromak halo ema tuir Nia ilas.
7 Imi iha oan barak ba. Imi nia jerasaun sai barak ba hodi halo nakonu mundu. Imi nia jerasaun tenki aumenta ba beibeik.”
8 Maromak hatutan ba Noé ho nia oan sira nunee:
9 “Agora Hau halo Hau nia aliansa ho imi ho imi nia jerasaun sira,
10 ho mos buat moris hotu-hotu nebee mak hamutuk ho imi iha nee, animal hakiak, animal fuik, ho manu fuik sira, buat hotu nebee sai hamutuk ho imi husi roo nee.
11 Hau promete nunee: Hau sei la halo tan rai nabeen hodi halo mate buat hotu nebee mak iha iis. Hau sei la halo bee boot sae hodi estraga mundu.”
12-13 Maromak hatete tan, “Hau tau Hau nia arkuiris iha kalohan nudar sinal hodi hatudu katak, Hau kaer metin Hau nia promesa nee ba imi ho mos buat moris nebee hamutuk ho imi, too jerasaun ba jerasaun. Arkuiris nee nudar sinal kona ba Hau nia promesa ba mundu.
14 Bainhira Hau halo kalohan mai iha fat-fatin, no arkuiris mosu iha kalohan nee,
15 Hau sei hanoin hetan Hau nia promesa ba imi ho mos ba buat moris hotu-hotu. Bee boot sei la sae tan hodi halo mohu buat moris hotu-hotu.
16 Bainhira arkuiris mosu iha kalohan, Hau sei haree, Hau sei hanoin Hau nia promesa ba buat hotu-hotu nebee moris iha mundu nee. Promesa nee sei la kotu.”
17 Maromak dehan tan ba Noé, “Ida nee mak sinal hodi hatudu promesa nebee Hau halo ho buat moris hotu-hotu iha mundu.”
Noé ho nia oan sira
18 Iha tempu nebaa Noé sai tiha ona husi roo hamutuk ho nia oan sira Sem, Kam (nia nee Kanaán nia aman), ho Jafet.
19 Ema hotu-hotu iha mundu agora mai husi Noé nia oan nain tolu nee.
20 Noé nee ema toos nain. Nia mak ema primeiru nebee halo toos uvas.
21 Iha loron ida, nia hemu tua uvas too lanu todan. Nia hasai tiha nia hena hodi toba molik deit iha nia tenda laran.
22 Kam haree nia aman toba molik, depois nia baa foo hatene nia maun nain rua iha liur.
23 Sem ho Jafet foti manta ida, kahe iha sira nia kabaas, sira hakiduk tama ba tenda laran hodi taka sira nia aman nia isin molik. Sira hateke ba sorin para la bele haree sira nia aman.
24 Bainhira Noé nia oin moos ona, nia hatene saida mak nia oan ikun halo ba nia.
25 Nia hatete,
“Malisan sei kona Kam nia oan Kanaán!
Nia sei sai atan ida nebee kiik liu ba nia maun sira.”
26 Noé dehan tan,
“Hahii ba NAI, Sem nia Maromak!
Kanaán sei sai Sem nia atan.
27 Maromak sei aumenta Jafet nia rain halo luan,
Jafet nia jerasaun moris dame malu ho Sem nia jerasaun,
maibee Kanaán sai Jafet nia atan.”
28 Komesa husi bee boot nee hotu, Noé sei moris tan tinan 350.
29 Nia mate ho tinan 950.