10
Jafet nia jerasaun
1 Rai nabeen liu tiha, Noé nia oan Sem, Kam ho Jafet mos hetan oan. Sira nia jerasaun mak tuir mai nee.
2 Jafet nia oan sira mak Gomer, Magog, Madai, Javán, Tubal, Mezek ho Tiras.
3 Gomer nia oan sira mak Askenás, Rifat ho Togarma.
4 Javán nia jerasaun sira mak Elisá, Tarsis, ema Kitim sira ho ema Dodan.
5 Sira hela iha tasi ibun. Sira nia jerasaun fahe ba familia ho suku keta-ketak, suku ida-idak ho nia rain ho lian rasik.
Kam nia jerasaun
6 Kam nia oan sira mak Kuxe, Misraim, Put ho Kanaán.
7 Kuxe nia oan sira mak Seba, Havila, Sabtá, Raamá ho Sabteká.
Raamá nia oan sira mak Sabá ho Dedán.
8 Kuxe nia oan mane ida tan naran Nimrod. Nia nee mak funu nain primeiru iha mundu.
9 Nia forsa nee mai husi NAI Maromak, too nia mos sai kasador diak ida. Nee mak ema baibain dehan, “O nee kasador diak ida hanesan Nimrod, ida nebee hetan forsa husi NAI.”
10 Fo-foun Nimrod ukun sidade Babél, Erek, Akad ho Kalné, sidade hirak nee hotu iha rai Sinear.
11 Depois nia baa tan too rai Asíria. Iha nebaa nia harii sidade Nínive, Rehobot Ir ho Kalá.
12 Nia mos harii sidade boot Resen iha Nínive ho Kalá nia klaran.
13 Misraim nia jerasaun mak ema Ludim, Anamim, Leabim, Naftuim,
14 Patrusim, Kasluim, ho Kaftorim. Ema Kasluim sira nee mak ema Filistin sira nia bei-ala.
15 Kanaán nia oan boot mak Sidon, nia oan ida tan naran Ete.
16 Kanaán nia jerasaun seluk mak ema Jebus, Amori, Girgas,
17 Heveu, Ark, Sin,
18 Arvad, Zemar ho Hamat.
Kanaán nia jerasaun sira nee namkari baa dook,
19 too sira nia rai baliza husi Sidon ba iha Gerar too iha Gaza. Baliza husi nee ba tan Sodoma, Gomora, Admá ho Zeboím, too iha Lasa.
20 Povu sira nee hotu Kam nia jerasaun. Ida-idak ho nia familia, nia lian, nia suku ho nia rain rasik.
Sem nia jerasaun
21 Jafet nia maun Sem mak ema Eber sira nia bei-ala.
22 Sem nia oan sira mak Elam, Asúr, Arpaxad, Lud ho Aram.
23 Aram nia jerasaun mak ema Us, Hul, Geter ho Mas.
24 Arpaxad nia oan Xela. Xela nia oan Eber.
25 Eber iha oan mane nain rua. Ida naran Peleg, tanba iha tempu nebaa ema iha mundu fahe malu. Eber nia oan seluk naran Joktan.
26 Joktan nia jerasaun mak ema Almodad, Selef, Hazármavét, Jerá,
27 Hadoraun, Uzál, Dikla,
28 Obal, Abimael, Sabá,
29 Ofir, Havila ho Jobab. Sira nee hotu Joktan nia jerasaun.
30 Sira nia rain baliza hahuu husi Mesa too iha Sefar iha parte foho lorosae nian.
31 Povu sira nee hotu Sem nia jerasaun. Ida-idak ho nia familia, nia lian, nia suku ho nia rain rasik.
32 Sira nee hotu Noé nia jerasaun, ida-idak ho nia suku rasik. Tempu rai nabeen hotu ona, sira nee mak namkari halo nakonu mundu.