☰ Jénesis 11
11
Uma aas Babél
1 Uluk ema hotu iha mundu nee koalia lian hanesan, sira nia lingua ida deit. 2 Iha tempu nebaa sira muda husi lorosae* too iha rai tetuk ida iha Sinear,† depois sira hela iha nebaa.
3 Sira dehan ba malu, “Mai ita halo tijolu, tunu halo di-diak.” Sira baibain halo uma, la uza fatuk, maibee hada tijolu halo metin ho alkatraun. 4 Depois sira dehan, “Mai ita harii sidade ida ho uma ida nebee aas too iha lalehan, para ita bele hetan naran boot. Se lae ita bele fahe malu namkari iha mundu tomak.”
5 Maibee NAI Maromak tuun mai hodi haree sidade ho uma aas nebee mak ema kriatura sira halo dadauk nee. 6 Nia hatete, “Haree ba, ema sira nee povu ida deit, lian ida deit, foin mak hahuu book aan, hanesan nee ona. Entaun aban-bainrua sira halo planu saida deit, bele realiza. 7 Mai Ita tuun baa halo rungu-ranga tiha sira nia lian, para sira la bele kompriende malu tan.” 8 Nunee NAI Maromak halo sira fahe malu namkari iha mundu tomak, entaun sira la halo tan sidade nee ona. 9 Nee mak ema hanaran fatin nee Babél,‡ tanba NAI halo rungu-ranga tiha mundu tomak nia lian iha nebaa, no halo sira namkari lemo rai.
Sem nia jerasaun too Abrão
10 Sem nia jerasaun hanesan tuir mai nee. Rai nabeen liu tiha tinan rua, Sem tinan 100 ona, nia hetan oan mane ida naran Arpaxad. 11 Depois nia sei moris tan tinan 500. Nia hetan tan oan mane ho oan feto.
12 Bainhira Arpaxad tinan 35, nia hetan oan mane ida naran Xela. 13 Arpaxad sei moris tan tinan 403. Nia hetan tan oan mane ho oan feto.
14 Bainhira Xela tinan 30, nia hetan oan mane ida naran Eber. 15 Xela sei moris tan tinan 403. Nia hetan tan oan mane ho oan feto.
16 Bainhira Eber tinan 34, nia hetan oan mane ida naran Peleg. 17 Eber sei moris tan tinan 430. Nia hetan tan oan mane ho oan feto.
18 Bainhira Peleg tinan 30, nia hetan oan mane ida naran Reú. 19 Peleg sei moris tan tinan 209. Nia hetan tan oan mane ho oan feto.
20 Bainhira Reú tinan 32, nia hetan oan mane ida naran Serug. 21 Reú sei moris tan tinan 207. Nia hetan tan oan mane ho oan feto.
22 Bainhira Serug tinan 30, nia hetan oan mane ida naran Naor. 23 Serug sei moris tan tinan 200. Nia hetan tan oan mane ho oan feto.
24 Bainhira Naor tinan 29, nia hetan oan mane ida naran Tera. 25 Naor sei moris tan tinan 119. Nia hetan tan oan mane ho oan feto.
26 Bainhira Tera halo ona tinan 70, nia hetan oan mane nain tolu naran Abrão, Naor ho Haran.
Tera nia jerasaun
27 Istoria kona ba Tera nia jerasaun hanesan tuir mai nee. Tera nia oan sira mak Abrão, Naor ho Haran. Haran hetan oan mane ida naran Ló. 28 Bainhira nia aman Tera sei moris, Haran mate iha sidade Ur, iha nia moris fatin iha ema Kaldeia sira nia rain. 29 Naor kaben ho Haran nia oan feto Milka. Haran mos iha oan ida tan naran Iská. Abrão kaben ho Sarai. 30 Maibee Sarai nee la bele hetan oan.
31 Iha loron ida, Tera lori nia oan Abrão, nia bei-oan Ló ho nia feto foun Sarai, sira husik hela sidade Ur iha ema Kaldeia sira nia rain, atu baa rai Kanaán. Maibee too iha sidade Haran, sira hela deit iha nebaa. 32 Tera moris too tinan 205, depois nia mate iha Haran.
* 11:2 Lian Ebreu iha nee laduun klaru. Bele signifika “husi lorosae”, “iha lorosae” ka “ba lorosae”. † 11:2 Sinear nia naran seluk Babilónia. ‡ 11:9 Naran Babél rona ba atu hanesan liafuan Ebreu ida nebee dehan “halo rungu-ranga”.
☰