12
Nai Maromak haruka Abrão sai husi nia rain
1 Loron ida NAI Maromak dehan ba Abrão, “Husik tiha o nia rain, husik o nia maluk sira ho o nia aman nia uma kain hodi baa iha rai nebee Hau sei hatudu ba o.
2 Hau sei foo jerasaun barak ba o too sai nasaun boot;
Hau sei foo bensaun ba o;
Hau sei halo o nia naran boot;
o sei sai bensaun ba ema seluk.
3 Hau sei foo bensaun ba ema nebee foo bensaun ba o;
Hau sei foo malisan ba ema nebee foo malisan ba o.
Liu husi o, nasaun hotu-hotu iha mundu sei hetan bensaun.”
4-5 Entaun Abrão baa ona, tuir NAI Maromak haruka. Nia alin nia oan Ló mos baa hamutuk ho nia. Bainhira nia sai husi sidade Haran, Abrão tinan 75. Nia lori nia feen Sarai ho Ló. Sira mos lori riku-soin nebee mak sira hetan ona, ho mos atan sira nebee sira hetan iha Haran. Sira hotu sai husi nebaa hodi baa iha rai Kanaán.
Bainhira sira too iha nebaa,
6 sira lao nafatin too iha ai huun boot ida iha Moré besik aldeia Sikem. Iha tempu nebaa ema Kanaán sira hela iha rai nee.
7 NAI Maromak hatudu Aan ba Abrão hodi dehan, “Hau sei foo rai nee ba o nia jerasaun.” Entaun Abrão hada fatuk halo altar ida ba NAI Maromak, tanba NAI hatudu Aan ba nia iha fatin nee.
8 Depois Abrão muda ba parte foho, iha aldeia Betél ho aldeia Ai nia klaran. Betél iha lorosae, Ai iha loromonu. Sira harii sira nia tenda iha nebaa. Iha fatin nee Abrão halo tan altar ba NAI Maromak. Nia temi NAI nia naran hodi adora Nia.
9 Depois Abrão muda husi fatin ida ba fatin ida too iha rai Negeb.
Abrão ho Sarai iha rai Ejitu
10 Iha tempu ida, rai Kanaán hamlaha boot. Entaun Abrão baa iha Ejitu atu hela lai iha nebaa.
11 Bainhira nia besik atu tama Ejitu, nia hatete ba nia kaben Sarai, “Hau hatene o feto ida nebee bonita loos.
12 Bainhira ema Ejitu sira haree o, sira sei dehan, ‘Ida nee nia feen.’ Entaun sira sei oho hau maibee husik o moris.
13 Nee duni o hatete ba sira dehan, o nee hau nia feton. Nunee sira sei husik hau moris hodi haree hau diak tanba sira gosta o.”
14 Hotu tiha Abrão tama iha Ejitu. Iha nebaa ema Ejitu haree katak Sarai nee bonita teb-tebes.
15 Liurai nia funsionariu sira haree nia, sira baa gaba nia iha liurai nia oin. Depois sira lori nia baa iha liurai nia uma.
16 Nunee liurai haree Abrão diak tanba nia gosta Sarai. Nia foo bibi, karau, kuda buru, atan mane, atan feto ho kuda kamelu ba Abrão.
17 Maibee tanba liurai lori fali Abrão nia kaben Sarai baa hela iha nia uma, entaun NAI Maromak foo moras aat oi-oin ba liurai ho nia uma kain tomak.
18 Nunee liurai bolu Abrão hodi dehan ba nia, “O halo saida mai hau? Nusaa mak o la foo hatene hau katak nia nee o nia kaben?!
19 Nusaa mak o dehan fali, nia nee o nia feton? Tanba o koalia nunee mak hau lori nia mai atu hola nia. O nia kaben mak nee. Lori nia baa ona!”
20 Depois liurai foo orden ba nia ema sira, nunee sira lori Abrão ho nia kaben ho nia riku-soin hotu sai husi Ejitu.