13
Abrão ho Ló fahe malu
1 Nunee Abrão sai husi Ejitu, nia fila fali ba iha rai Negeb ho nia kaben ho buat hotu-hotu nebee nia iha. Ló mos tuir sira.
2 Abrão nee sai riku teb-tebes ona. Nia iha animal, osan mutin ho osan mean barak teb-tebes.
3 Nia sai fali husi Negeb hodi muda husi fatin ida ba fatin ida too nia fila fali ba nia hela fatin uluk iha aldeia Betél ho aldeia Ai nia klaran.
4 Uluk nia halo ona altar iha fatin nee. Agora mos nia temi NAI Maromak nia naran hodi adora Nia iha nebaa.
5 Durante nee Ló lao hamutuk nafatin ho Abrão. Ló nia bibi, nia karau ho nia ema barak.
6 Maibee rai nee la too ba sira atu hela hamutuk, tanba sira nia riku-soin barak teb-tebes. Nee mak halo sira la bele hela hamutuk.
7 Nunee Abrão nia atan sira ho Ló nia atan sira nebee mak tau matan ba sira nia animal komesa istori malu. Iha tempu nebaa, ema Kanaán ho ema Feris hela iha rai nee.
8 Nunee Abrão hatete ba Ló, “Ita nain rua nee familia. Entaun ita ho ita la bele istori malu, o nia atan ho hau nia atan mos la bele istori malu.
9 Rai nee tomak nakloke ba o. Diak liu ita nain rua fahe malu. Se o hili rai iha parte liman karuk, hau sei baa iha parte liman loos. Se o hili parte liman loos, hau baa iha parte karuk.”
10 Entaun Ló hateke ba-mai, nia haree rai tetuk iha mota Jordaun nian, rai nee tomak iha bee barak, too iha aldeia Zoar. Rai nee diak hanesan toos NAI Maromak nian, hanesan rai Ejitu. Iha tempu nebaa, NAI Maromak seidauk halo rahun sidade Sodoma ho Gomora.
11 Nunee Ló hili hotu rai tetuk iha mota Jordaun nee. Entaun sira nain rua fahe malu tiha. Ló baa iha lorosae,
12 Abrão hela nafatin iha Kanaán. Ló muda baa besik sidade Sodoma hodi harii nia tenda iha sidade sel-seluk nia klaran iha rai tetuk Jordaun nian.
13 Maibee ema Sodoma sira nia hahalok aat teb-tebes. Sira halo sala todan beibeik hasoru NAI Maromak.
14 Bainhira Ló sai ona, NAI Maromak hatete ba Abrão, “Foti o nia matan hodi haree di-diak ba oin, ba kotuk, ba liman karuk, ba liman loos.
15 Rai hotu-hotu nebee o haree nee, Hau sei foo ba o ho o nia jerasaun, para sai imi nian too tinan ba tinan.
16 Hau sei halo o nia jerasaun barak hanesan rai rahun, too sura la bele.
17 Agora hamriik ba, lao haleu rai nee tuir nia naruk ho nia luan. Rai nee hotu Hau sei foo ba o.”
18 Hotu tiha Abrão muda baa hela besik ai huun boot sira iha Manre, besik aldeia Hebron. Iha nebaa nia harii altar ida hodi adora NAI Maromak.