14
Abrão salva Ló
1 Tempu nebaa, iha liurai nain haat baa halo funu hasoru liurai nain lima. Sira nain haat nee mak liurai Anrafel husi rai Sinear, Ariok husi Elazar, Kedorlaomer husi Elam ho Tidal husi Goim.
2 Liurai nain lima nee mak Bera husi sidade Sodoma, Birxa husi sidade Gomora, Sinab husi sidade Adma, Semeber husi Zeboím ho liurai husi Bela (aldeia nee ema mos hanaran Zoar).
3 Liurai nain lima nee halibur sira nia tropas hamutuk iha rai tetuk Sidim (agora ema bolu tasi Mate).
4 Funu nee nia huun nunee: Uluk liurai Kedorlaomer ukun liurai nain lima nee durante tinan sanulu resin rua. Maibee too iha tinan sanulu resin tolu sira hamriik kontra nia.
5 Too iha tinan sanulu resin haat, liurai Kedorlaomer ho nia belun liurai nain tolu halo funu manaan ema Refa iha rai Asterot-Karnaim. Sira mos manaan ema Zuz iha rai Ham, ema Em iha rai Savé-Kiriataim,
6 ho ema Hori iha parte foho Seir nian, too iha aldeia El-Parán besik rai fuik maran.
7 Hotu tiha sira fila fali ba iha aldeia En-Mispá t (ema hanaran mos Kades). Sira manaan ema Amalék nia rain tomak, ho mos ema Amori sira nebee hela iha rai Hazazon-Tamar.
8-9 Depois liurai nain lima nee prepara sira nia tropas iha rai tetuk Sidim hodi funu hasoru liurai nain haat nee.
10 Fatin nee iha rai kuak barak nakonu ho alkatraun been. Iha funu nee, liurai Sodoma ho liurai Gomora ho sira nia tropas halai. Sira balu monu tama ba alkatraun laran, sira seluk halai ba rai foho.
11 Nunee liurai nain haat nebee manaan funu nee baa iha sidade Sodoma ho sidade Gomora hodi hadau sasaan ho hahaan hotu iha sidade rua nee. Depois sira fila.
12 Liurai sira nee mos kaer Abrão nia alin nia oan Ló hodi hadau hotu nia sasaan, tanba nia hela iha Sodoma.
13 Maibee iha ema ida halai sai baa foo hatene Abrão, ema Ebreu nee. Tempu nee Abrão hela besik iha Manre nia ai huun boot sira. Manre nee ema Amori, nia ho nia alin nain rua Eskol ho Aner halo belun ona ho Abrão atu ajuda malu kuandu iha funu.
14 Bainhira Abrão rona dehan ema kaer tiha ona nia alin nia oan, nia halibur nia ema sira nebee hatene halo funu, hamutuk ema 318. Sira duni tuir liurai nain haat nee too iha aldeia Dan.
15 Iha nebaa Abrão fahe nia ema ba grupu-grupu hodi asalta inimigu iha kalan. Inimigu balu konsege halai. Abrão ho nia ema duni tuir nafatin sira too iha aldeia Hoba, besik sidade Damasku iha parte norte nian.
16 Iha nebaa Abrão hadau fali sasaan hotu nebee mak liurai sira nee hadau tiha ona. Nia lori fila fali Ló ho nia sasaan hamutuk ho feto-mane nebee liurai sira nee kaptura tiha.
Liurai Melkizedek foo bensaun ba Abrão
17 Bainhira Abrão manaan funu hasoru liurai Kedorlaomer ho nia maluk liurai nain tolu nee, liurai Sodoma baa simu nia iha rai tetuk Savé (baibain ema bolu rai tetuk Liurai).
18 Depois liurai Melkizedek husi sidade Salém, lori paun ho tua foo ba Abrão. Melkizedek nee nai lulik hodi serbi Maromak Aas Liu.
19 Nia foo bensaun ba Abrão dehan,
“Maromak Aas Liu, Kriador lalehan ho rai,
foo bensaun ba o.
20 Hahii Maromak Aas Liu,
tanba Nia entrega o nia inimigu sira ba o nia liman laran.”
Depois buat hotu-hotu nebee Abrão hadau husi nia inimigu sira, nia foo parte ida husi parte sanulu ba Melkizedek.
21 Abrão foo tiha sasaan hirak nee ba Melkizedek, liurai sidade Sodoma mak koalia fali ba Abrão. Nia dehan, “Ami nia ema ho sasaan nebee senhor hadau fila fali husi inimigu nia liman laran nee, hau husu atu senhor entrega fila fali mak ema sira nee deit, sasaan nee husik senhor nian hotu ba.”
22 Maibee Abrão hataan ba liurai Sodoma dehan, “Hau foti hau nia liman hodi jura iha NAI Maromak Aas Liu nia oin, Nia mak Kriador lalehan ho rai.
23 Hau jura katak, senhor nia sasaan sira nee, ida mos hau la simu. Atu kabas lahan ida ka sandalias talin ida mos hau sei la foti. Se lae ita boot bele dehan, ita boot halo hau sai riku ona.
24 Hau sei la simu buat ida. Hau so simu deit hahaan nebee mak hau nia ema sira haan tiha ona. Maibee husik hau nia belun nain tolu Aner, Eskol ho Manre foti sira nia parte, tanba sira lao hamutuk ho hau.”