15
Nai Maromak halo promesa ba Abrão
1 Hotu tiha NAI Maromak lia tuun ba Abrão hanesan iha mehi hodi hatete, “Abrão, keta tauk. Hau sei defende o. Hau sei foo bensaun boot ba o.”
2-3 Maibee Abrão hataan, “NAI Maromak Kbiit Nain, Ita Boot bele foo riku-soin barak mai hau mos, folin la iha, tanba hau nafatin la iha oan. Nunee bainhira hau mate, hau nia atan Eliezer ema Damasku mak sei hetan riku-soin sira nee hotu.” Abrão dehan tan, “Ita Boot la foo oan mai hau, entaun hau nia atan ida nebee hela ho hau nee mak sei sai nain ba buat sira nee hotu.”
4 NAI Maromak lia tuun tan, “Lae, laos o nia atan nee mak sei sai nain ba riku-soin nee, maibee o nia oan rasik mak hetan.”
5 NAI lori Abrão sai ba liur hodi dehan, “Hateke ba lalehan. Haree took fitun sira nee, o bele sura ka lae?” Nia dehan tan, “O nia jerasaun mos sei sai barak hanesan fitun sira nee.”
6 Abrão fiar NAI Maromak, tanba nia fiar mak NAI bolu nia nudar ema ida nebee moris loos.
7 Depois NAI Maromak dehan, “Hau mak NAI. Hau mak uluk lori o sai husi sidade Ur iha ema Kaldeia sira nia rain para foo rai nee ba o hodi sai o nian.”
8 Maibee Abrão husu, “NAI Maromak Kbiit Nain, oinsaa mak hau bele hatene katak rai nee sei sai hau nian?”
9 NAI hataan, “O baa hili karau inan ida, bibi timur inan ida ho bibi malae aman ida, lori mai. Animal sira nee tenki tinan tolu. Lori mos manu lakateu ida ho manu pombu ida mai.”
10 Entaun Abrão baa lori animal sira nee hotu mai oho. Nia fera karau, bibi ho bibi malae nee fahe ba rua, tau iha rai halo linha rua, see oin ba malu. Maibee manu sira nee nia la fera fahe ba rua.
11 Depois manu fuik sira nebee baibain haan naan semo tuun mai atu haan naan nee. Maibee Abrão duni tiha.
12 Bainhira loro matan tuun dadauk, derepenti Abrão toba dukur liu tiha. Nia mehi dehan, nakukun mai falun metin tiha nia. Nunee nia tauk teb-tebes.
13 Depois NAI Maromak hatete ba nia, “Rona di-diak! O nia jerasaun sei sai ema lao rai iha nasaun nebee laos sira nian. Ema rai nain sei halo sira hanesan atan. Rai nain sira sei hanehan sira durante tinan atus haat.
14 Maibee Hau sei kastigu nasaun nebee mak halo sira sai atan nee. Depois sira sei sai husi nebaa ho riku-soin barak teb-tebes.
15 Kona ba o, o sei moris too katuas liu, depois baa ho hakmatek hodi hasoru o nia bei-ala sira. Ema sei hakoi o ho diak.
16 Too o nia jerasaun ba dala haat mak sira fila fali mai iha nee hodi harahun ema Amori sira. Agora tempu seidauk too atu kastigu ema Amori sira nee tanba sira nia hahalok seidauk aat demais liu.”
17 Bainhira loro matan monu ona, rai mos kalan ona, derepenti iha sanan rai ida, ahi suar sae husi laran, iha mos ahi oan ida, buat rua nee lao liu husi naan linha rua nee nia klaran.
18 Momentu nee, NAI Maromak hametin Nia aliansa ho Abrão dehan, “Hau sei foo rai nee ba o nia jerasaun sira, komesa husi mota Ejitu too iha mota boot Eufrates.
19 Agora suku oi-oin mak hela iha rai nee: ema Keni, ema Keniz, ema Kadmon,
20 ema Ete, ema Feris, ema Refaim,
21 ema Amori, ema Kanaán, ema Girgas ho ema Jebus sira.”