16
Hagar ho nia oan Ismael
1 Abrão nia kaben Sarai nafatin seidauk iha oan. Nia iha atan feto ema Ejitu ida, naran Hagar.
2 Nunee Sarai hatete ba Abrão, “NAI Maromak la foo hau atu kous oan. O baa toba ho hau nia atan feto nee, dala ruma hau bele hetan oan liu husi nia.” Abrão mos konkorda.
3 Entaun Sarai lori nia atan Hagar ema Ejitu nee foo ba nia kaben Abrão para sai nia feen kiik. Momentu nee Abrão hela iha rai Kanaán tinan sanulu ona.
4 Abrão toba ho Hagar, depois Hagar isin rua. Maibee bainhira nia hatene katak nia isin rua ona, nia komesa haree nia nain Sarai nee la vale ona.
5 Depois Sarai dehan ba Abrão, “Hau mak foo atan nee ba o para sai o nia feen kiik. Maibee bainhira nia hatene nia isin rua, nia haree hau la vale ona. Nee hotu o nia sala! Husik NAI Maromak mak tesi ita nain rua nia lia.”
6 Abrão hataan, “Nia nee o nia atan, nia iha o nia liman laran. O hakarak halo saida deit ba nia, konformi o.” Entaun Sarai komesa halo aat Hagar, too Hagar halai tiha.
7 Hagar halai ba iha rai fuik maran. Too besik bee matan ida iha dalan ba Sur, NAI nia anju hasoru nia iha nebaa.
8 Anju nee hatete, “Hagar, Sarai nia atan, o mai husi nebee? O atu baa nebee?”
Hagar hataan, “Hau halai sai husi hau nia nain Sarai.”
9 Depois NAI nia anju dehan ba nia, “O fila fali ba o nia nain hodi hakruuk ba nia.”
10 NAI nia anju hatutan, “Hau sei halo o nia jerasaun sai barak teb-tebes, too sura la bele.
11 O isin rua hela, o sei tuur ahi oan mane ida. O tenki tau nia naran Ismael, tanba NAI Maromak rona ona o nia halerik.
12 Bainhira labarik nee boot ona, nia sei sai hanesan kuda buru fuik. Nia sei kontra ema hotu-hotu, ema hotu-hotu mos sei kontra nia, too nia ho nia maluk sira haree malu la diak.”
13 Tanba NAI Maromak koalia ho nia, entaun Hagar bolu NAI dehan, “Ita Boot mak Maromak nebee haree hau.” Nia dehan, “Maromak haree hau, agora hau mos konsege haree Nia.”
14 Nee mak ema tau naran ba bee matan nee, Beer-Laai-Roi. Nia fatin iha aldeia Kades ho Bered nia klaran.
15 Entaun Hagar fila fali. Nia tuur ahi oan mane ida, Abrão hanaran nia oan nee Ismael.
16 Bainhira Hagar ho Abrão nia oan Ismael moris, Abrão tinan 86.