17
Maromak halo aliansa ho Abrão
1 Bainhira Abrão tinan 99, NAI Maromak hatudu Aan ba nia hodi hatete, “Hau nee Maromak Kbiit Nain. O tenki moris iha Hau nia prezensa hodi halo buat nebee loos.
2 Hau sei halo aliansa ho o. Hau sei halo o nia jerasaun sai barak teb-tebes.”
3 Rona nunee, Abrão hakneak hakruuk too rai. Depois Maromak dehan ba nia,
4-5 “Aliansa nee, husi Hau nia parte, Hau promete nunee: O sei sai nasaun barak nia aman. Tanba nee, o nia naran laos Abrão tan ona. Maibee o nia naran Abraão.
6 Hau sei halo o nia jerasaun barak teb-tebes hodi sai nasaun oi-oin, no o nia jerasaun balu sei sai liurai.
7 Hau foo Hau nia promesa ba o ho mos o nia jerasaun sira nafatin ba nafatin. Promesa nee vale tinan ba tinan husi jerasaun ba jerasaun. Hau mak o nia Maromak ho o nia jerasaun sira nia Maromak.
8 Agora o hela iha nee hanesan ema lao rai. Maibee aban-bainrua Hau sei foo rai Kanaán nee tomak ba o ho o nia jerasaun sira, para sai nain ba rai nee too tinan ba tinan. No Hau mak sira nia Maromak.”
9-10 Maromak hatete tan ba Abraão, “Husi o nia parte, Hau foo obrigasaun ba o ho o nia jerasaun sira tenki halo tuir too tinan ba tinan. Obrigasaun nebee imi tenki halo tuir mak nee: Mane hotu-hotu tenki sunat.
11 Imi tenki sunat mane hotu-hotu nudar sinal ba aliansa nebee Hau halo ho imi.
12-13 Husi jerasaun ba jerasaun, bebee mane moris mai too ona loron walu tenki sunat. Atu imi nia familia ka atan sira nebee moris iha imi nia uma laran ka atan sira nebee mak imi sosa husi ema seluk, tenki sunat hotu. Sunat nee hanesan sinal iha imi nia isin lolon hodi hatudu Hau nia aliansa. Aliansa nee vale nafatin too tinan ba tinan.
14 Mane nebee mak la sunat, tenki soe sai tiha husi Hau nia povu tanba nia kontra Hau nia aliansa.”
15 Maromak dehan tan, “Kona ba o nia kaben, o la bele bolu tan nia naran Sarai, maibee bolu fali nia naran Sara.
16 Hau sei foo bensaun ba Sara, para imi nain rua bele hetan oan mane ida. Tebes! Hau sei foo bensaun ba Sara para nia sai inan ba nasaun barak, no nia jerasaun balu sei sai liurai.”
17 Abraão hakneak hakruuk too rai. Maibee nia laran hamnasa fali. Nia hanoin dehan, “Katuas tinan atus ida hanesan hau nee, sei hetan tan oan ka? Sara tinan 90 ona, halo nusaa mak bele isin rua?!”
18 Nia dehan ba Maromak, “Halo Ita Boot nia bensaun tuun ba Ismael deit ona.”
19 Maibee Maromak hataan, “Lae, o nia kaben Sara sei hetan oan mane ida, o tenki foo naran Isac. Hau nia aliansa nee sei tuun ba nia ho nia jerasaun too tinan ba tinan.
20 Hau mos rona ona saida mak o husu atu foo ba Ismael. Tanba nee, Hau mos foo bensaun ba nia. Hau sei aumenta nia jerasaun halo barak. Nia sei iha oan mane sanulu resin rua, ida-idak ukun nia suku rasik. Ismael nia jerasaun sei sai nasaun boot ida.
21 Maski nunee, maibee Hau nia aliansa nee ho Isac. Iha tinan oin mai, tempu hanesan nee, Sara sei tuur ahi imi nia oan Isac.”
22 Koalia hotu tiha, Maromak husik hela Abraão hodi baa ona.
23 Iha loron nee kedas, Abraão halo tuir Maromak nia orden. Nia sunat nia oan Ismael ho mane hotu-hotu iha nia uma laran. Atu atan nebee moris iha nia uma laran ka atan nebee nia sosa, hotu-hotu sunat.
24 Bainhira sira sunat nee, Abraão tinan 99 ona,
25 no Ismael tinan 13.
26 Iha loron nee kedas Abraão ho nia oan Ismael sunat.
27 Nunee mos mane hotu-hotu iha nia uma laran, atu atan nebee moris iha nia uma ka atan nebee nia sosa husi ema seluk, sira hotu sunat hamutuk ho Abraão.