18
Bainaka nain tolu mai hasoru Abraão
1 Iha loron ida, NAI Maromak hatudu Aan ba Abraão besik ai huun boot sira iha Manre. Iha tempu nebaa loro manas, Abraão tuur hela iha tenda oin.
2 Nia foti oin, haree ema nain tolu hamriik besik. Bainhira nia haree hetan sira, nia lao lalais husi tenda oin baa simu sira. Nia hakruuk too rai
3 hodi dehan, “Nai, se bele karik, keta lao liu deit.
4 Hau haruka ema lori bee uitoan mai hodi fase ita boot sira nia ain para ita boot sira bele deskansa lai iha ai mahon nee.
5 Ita boot sira mai ona iha hau ata nia fatin, entaun husik hau ata lori netik ai haan ruma mai para ita boot sira bele iha forsa fila fali mak foin kontinua lao tan.”
Sira hataan, “Diak, halo ba.”
6 Entaun Abraão baa lalais iha tenda laran hodi hatete ba Sara, “Lalais! Foti trigu uut diak nian saka ida mai, deut hodi halo paun.”
7 Depois Abraão halai baa haree nia karau. Nia hili karau oan bokur ida hodi foo ba nia atan oho. Nia atan koa lori lalais baa tein.
8 Hotu tiha Abraão lori susu been, keiju ho naan nebee foin tein nee foo ba bainaka sira nee. Bainhira bainaka sira haan, nia hamriik besik sira iha ai huun.
9 Bainaka sira nee husu ba nia, “O nia kaben Sara iha nebee?”
Abraão hataan, “Nia iha hela tenda laran.”
10 Depois bainaka ida husi sira nain tolu nee dehan, “Tinan oin tempu hanesan nee, hau sei mai fali haree o. Iha tempu nee, o nia kaben Sara iha ona oan mane ida.”
Sara rona hela husi odamatan tenda nian, iha Abraão nia kotuk.
11 Tempu nee Abraão ho Sara katuas ho ferik liu ona, Sara nia fulan mos para tiha ona.
12 Nunee Sara hamnasa iha nia laran deit hodi hanoin dehan, “Hau namlaik ona, hau nia senhor mos katuas tiha ona. Halo nusaa mak hau bele hetan bensaun ida nee?!”
13 NAI Maromak hatete ba Abraão, “Nusaa mak Sara hamnasa fali? Nusaa mak nia hanoin nia la bele iha oan tanba nia ferik liu ona?
14 Hau nee NAI Maromak! Iha buat ruma difisil liu ba NAI atu halo ka? Tinan oin tempu hanesan nee, Hau sei mai fali haree o, hanesan ohin Hau hatete ona. Iha tempu nee, Sara iha ona oan mane ida.”
15 Rona nunee, Sara tauk hodi nega dehan, “Hau la hamnasa ida!”
Maibee NAI hataan, “Lae, o hamnasa duni.”
Abraão husu ba NAI Maromak atu salva ema Sodoma
16 Depois bainaka nain tolu nee hamriik lao fali. Abraão mos akompanha lai sira. Too dalan klaran, sira hateke tuun ba sidade Sodoma.
17 NAI Maromak dehan ba Nia Aan, “Hau atu taka ba Abraão kona ba buat nebee mak Hau atu halo ka?
18 Lae, Hau sei foo hatene, tanba nia jerasaun sei sai nasaun boot ho forti. Nasaun hotu-hotu sei hetan bensaun liu husi nia.
19 Hau hili tiha ona nia para manda nia oan sira ho nia uma laran atu tuir Hau nia dalan hodi moris loos. Se sira tuir nunee mak Hau sei kumpri Hau nia promesa ho Abraão.”
20 Entaun NAI Maromak foo hatene ba Abraão dehan, “Hau rona ona ema barak halerik kona ba ema iha sidade Sodoma ho Gomora, tanba ema sira nee nia sala todan demais liu.
21 Nunee, Hau sei tuun baa hodi haree rasik para hatene, sira nia hahalok aat duni hanesan buat nebee ema halerik nee ka lae. Se laos hanesan nee, Hau sei hatene.”
22 Depois bainaka nain rua seluk lao dadauk ba Sodoma, maibee Abraão nafatin hamriik iha NAI Maromak nia oin.
23 Abraão besik ba NAI Maromak hodi hatete, “Ita Boot atu dasa moos hotu ema nebee moris loos ho ema aat hamutuk deit ka?
24 Se karik iha ema nain lima-nulu moris loos iha sidade nee oinsaa? Ita Boot sei dasa moos sidade tomak ka, Ita Boot salva sidade nee tanba sira nain lima-nulu nebee moris loos nee?
25 Ita Boot nunka atu oho ema moris loos hamutuk ho ema aat dala ida. Se lae, ema moris loos ho ema aat hanesan deit. Hahalok nee la merese ba Ita Boot. Juis ba mundu tomak tenki tesi lia ho lo-loos.”
26 NAI Maromak hataan, “Se Hau hetan ema nain lima-nulu mak moris loos iha sidade Sodoma, Hau sei la foo kastigu ba sidade nee, tanba sira.”
27 Abraão koalia tan dehan, “Hau nee rai rahun ho ahu kdesan deit, maibee hau halo brani hau nia aan hodi koalia ona ba Nai.
28 Se la iha ema nain lima-nulu mak moris loos, maibee falta deit nain lima, Ita Boot sei halo rahun sidade nee tanba deit falta ema nain lima nee ka?”
NAI Maromak hataan, “Se Hau hetan nain haat-nulu resin lima, Hau la halo rahun sidade nee.”
29 Abraão koalia tan dehan, “Se iha deit ema nain haat-nulu mak moris loos, oinsaa?”
NAI Maromak hataan, “Tanba sira nain haat-nulu nee, Hau sei la harahun sidade nee.”
30 Abraão hatete tan, “Nai keta hirus, foo lisensa mai hau koalia tan. Se konsege hetan deit ema nain tolu-nulu, oinsaa?”
NAI hataan, “Se Hau hetan deit nain tolu-nulu, Hau la harahun sidade nee.”
31 Abraão husu tan, “Hau brani koalia nafatin ba Nai. Se konsege hetan deit ema nain rua-nulu, oinsaa?”
NAI hataan, “Tanba sira nain rua-nulu nee, Hau sei la harahun sidade nee.”
32 Depois Abraão dehan, “Nai keta hirus, husik hau koalia dala ida tan. Se konsege hetan deit ema nain sanulu, oinsaa?”
NAI Maromak hataan, “Tanba sira nain sanulu nee, Hau sei la harahun sidade nee.”
33 Bainhira NAI Maromak koalia hotu ona ho Abraão, Nia baa ona. Abraão mos fila fali ba nia hela fatin.